Sáni Mateo 18
18
IX. ARHITS'ÏKPERAKUA NA IRETANI JINKUNI IREKANI
(18.1-35)
¿Ne sánteru k'ériski?
(Mk 9.33-37; Lk 9.46-48)
1Imani jurhiatekua jimpot'u jurhenkorherichaksï Jesusini antarheraspti ka kurhamarhesptiksï: “¿Ne sánteru k'ériski auantarhu anapu irechekuarhu?” 2Ka Jesusi sapini ma uantap'aspti ka teruk'ani péraspti, 3ka uantaspti: “Sési jimpoksïni arhixaka, ekats'ï cha no sapini jáxent'aska, nóts'ï inchaaka auantarhu anapu irechekuarhu. 4Ima enka kétsekua uérka ka ísï jámani eska i sapi na jámka. Imasï auantarhu anapu irechekuarhu sánteru k'ériti. 5Ka ima enka jucheti jakankurhikua jimpo sapini ma sési erokaaka, jíntenirini sési erokaxati.”
Na enka xáni nósesika k'amanharhint'ani
(Mk 9.42-48; Lk 17.1-2)
6“Ne uék'i enka sapini ma terunkutaaka enkarini jínteni mintsikani jaka, sánteru sésiuati eska japuntarhu k'uinimanhaaka tsakapu urhuratarakua ma jóch'akukata. 7¡Áke, parhakpeni anapu terunkutpekua ampe! Japusti, k'óru. ¡Jarhonheni, ne enka máteruni terunkutaaka! 8Ísï jimpo, ekakini ják'i o jantsiri terunkutaraska, kachuk'u o kachuntu ka k'uaniku, sánteru sésiuati eskari tsípekuarhu tokot'atini o tokok'utini inchaaka, ka nóri chpírirhu k'uanipanhani jima enka nómeni póp'ek'a. 9Ka ekakini éskua terunkutaraska, p'itanharhi, sánteru sésiuati eskari tsípekuarhu ma éskua jinkuntku inchaaka, ka nóri tsimani jukarini chpírirhu k'uanip'anhani.”
Karichi kuátakateri uantantskua
(Lk 15.3-7)
10“Exe je, ásï jáma je sapirhatichani támu péraani, jimpokaksïni sési jimpo arhixaka eskaksï ánjeli jémpecha, jucheti Táteni auantarhu anapuni erateni jarhasïnka. 11[Jimpoka Acheti Uáp'a tsînchetichanisï juka p'ímutant'a'ani.]”
12“¿Náts'ï exesïnki? Eka nema iúmu ekuatse karichichani káak'a ka ma ísï kuátani, ¿Anti no juátarhu jurak'uasïnki t'ámu ekuatse ka témpeni iúmu t'ámu karichichani? ¿Anti no nirasïnki imani jirinhanti enka kuátaka? 13Ka enka exent'ak'a, sési jimpoksïni arhixaka eska kánekua tsípeaka imani karichini jimpo, eska máteru karichichani jimpo enka no kuátaaka. 14Mák'uentu, chári Táte enka auantarhu jaka, no uékasïnti eska i sapi ma tsîncheaka.”
K'uanisïnti erachini púakuntani
(Lk 17.3)
15“Ekakini chéti erachi ma nósesi ampe úcheska, uantaxeku enkats'ï jantiochani jámani jauaka, ekakini kurhach'aska mák'uts'ï úkorhent'askia. 16Ka ekakini no kurhach'aska, pát'a nemani o pát'aa máru, ka imaksïni kurhach'akorheati ampe enkats'ï cha xáni uantaaka. 17Ka eka imechantu no kurhach'aaska, tánkorhekuarhu uantantsï, ka enka tánkorhekuani no kurhach'aska, ísïri exeaka eska no jakak'utiska o eskaksï ima enkaksï Róma anapu tumina tának'a.”
18“Sési jimpoksïni arhixaka eska ampe enkats'ï parhakpeni k'ataaka, auantarhut'u k'atakata pakaraati, ka enkats'ï xáni parhakpeni kuerantaaka; auantarhut'u kuerantskata pakaraati.”
19“Sési jimpoksïni arhixaka, ekats'ï nema jinkuni íni parhakpeni terukutaaka uantamukukorheparini ampe kurhak'orheni, jucheti Táteksïni íntskuati enka auantarhu jaka. 20Jimpoka jima enkaksï tsimani o tanimu tánkorhent'atini jauaka jucheti jakankurhikua jimpo, jít'u jima jauaka.”
21Ka Pédru antarheraspti Jesusini ka arhispti: “Tata, ¿Namuni xanhari púakunta jucheti erachini enkarini nósesi ampe úcheaka? ¿Iúmu tsimani xanhari jamperi?” 22Ka Jesusi arhispti: “Nókini arhixaka iúmu tsimani xanharku, tanimu ekuatse témpeni uéntani iúmu tsimani xanharirisï púakuntaaka.”
Jántspiri ma enka no úekaka tekaantani
23“Ísï jimpo, auantarhu anapu irechekua xáxesti, eska irecha enka imeri jántspirichani kántsperata miiukuantaapka. 24Eka uénapka miiuntani, pásptiksï ma enka témpeni milloni kánkuempka. 25Ka jimpoka ima jántspiri no játsispka néna maiamuntani, irecha juramuspti eskaksï jántspirini atarantapirinka tempa ka uáp'echa jinkuni ka imani ampe enka xáni kánkorhempka, ka ísï kántsperatani k'uerach'atarani. 26Ka jántspiri irechani tinkuixurhikutini kómarhisïrempti: ‘Tata, tekaachentsïrini sánterku, jíkini maiamuntaaka.’ 27Ka irecha p'amok'uspti, jurak'uspti ka nómpe ma euantaspti.
28Ka jántspiri irecho uéntatini, exent'aspti pámpiri jémpani ma enka iúmu ekuatse taiakata kánkuempka, ka mápchakuspti arhini: ‘Juánkia tuminani.’ 29Pámpiri jémpa tinkuintukutini kómarhisïrempti: ‘Tekaachentsïrini sánterkia, jíkini maiamuntaaka.’ 30K'óru ima méntku no uékaspti ka ónhatarkorhespti, ka no petarkorheni eka no urheta iámu maiamuntapirinka. 31Máteru pámpirichaksï exerini ampe enka xáni úkorhepka, kánekuaksï kómu p'ikuarheraspti, ka irechanksï iámu ampe niraspti aiankunt'ani. 32Ka irecha jántspirini p'itak'orhespti ka arhispti: ‘Xáni enkari nóampakeka, nókini euantaska eskarini xáni káncheni jápka jimpokarini t'u kómarhintaspka. 33T'út'uri chéti pámpirini p'amok'upirinka ísï eskani ji na p'amok'uka.’ 34Ka irecha ikiatintku juramuspti eskaksï no jurak'unt'apirinka k'uikirheni, eka jamperi iámu maiampent'apirinka.” 35Ka Jesusi útasï uantasptiteru: “Mák'uenksïni kántaati mántani arhini jucheti Táte enka auantarhu jaka, ekats'ï cha mintsita jinkuni chári erachini no púakuantaska.”
Trenutno izbrano:
Sáni Mateo 18: DKPJ
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Biblia en P´urhépecha, Michoacán, México © Sociedad Bíblica de México, A.C.