Sáni Mateo 17
17
Jesusi ménterueni jáxent'asti
(Mk 9.2-13; Lk 9.28-36)
1Kuímu jurhiatekua jimpo, Jesusi juátarhu ma niraspti ka Pédruni ka Santiaguni ka erachi jémpa Juánuni pát'aaspti. 2Ka jima imechani japarini ménterueni jáxent'aspti, tata jurhiateni mereanharhint'aspti, ka xukuparhakua t'íntskueni t'uput'upuxent'aspti. 3Ka Moisesinksï ka Eliasïnksï exespti, enkaksï Jesusini jinkuni uantontskorheni jápka. 4Ka Pédru Jesusini arhispti: “Tata xáni enkaksï sési jaka ixu, enkari uék'a tanimu uapats'ïtakuechanchi úauaka, ma chétiuati ka máteru Moisesiri ka máteru Eliasïri.” 5Enka Pédru uantani jápkateru, janikua meremeresï ma antats'ïkueraspti ka janikuarhu uantakua ma kurhaakorhespti uantani jarhani: “I jintesti jucheti Uátsïti enka ji xáni uék'a, kurhach'a je.”
6Jesusiri jurhenkorherichaksï íni ampe kurharini, kókuatsespti jimpokaksï kánekua chérakorhespka. 7Ka Jesusi antarheraaspti ka p'árheaparini arhiasti: “Jauara je, ásï jáma je chéni.” 8Enkaksï jurhenkorhericha eraapka, Jesusiniterkuksï exesptia.
9Ka enkaksï juátarhu uératini kétsemantani jápka, Jesusi arhiaspti: “Ampe enkats'ï exeka, ásï nemani aiankuntsï je enka Acheti Uáp'a nótki tsíntani jauaka.” 10Ka jurhenkorherichaksï Jesusini kurhamarhespti: “¿Antiksïsï juramukua jurhentpiricha uantak'i eska Eliasï urheta juuaka?” 11Ka Jesusi arhiantaaspti: “Ísïsti eska Eliasï urheta juuaka, ka eska ima iámentu ampe sési péntaaka. 12Ka jíksïni arhixaka eska Eliasï jurhaskia, ka nóksï mítent'asti. Kántastiksï eskamentuksï na uékaka kántani. Mák'uenksï Acheti Uáp'ani nósesi kántaati.”
13Ka jurhenkorherichaksï jánhaskaspti eska Jesusi Juánu itsï atats'ïkpiririsï ampe arhiani jápka.
Jesusi tumpini ma nóampakitini petarhetant'a'sti
(Mk 9.14-29; Lk 9.37-43)
14Enkaksï k'uiripuni antarhentapka, acheti ma Jesusini antarheraspti ka tinkuixurhikutini arhispti: 15“Tata, p'amok'u jucheti uátsïtini, p'íntani jámsïnti, ka kánekua nósesi jarhasïnti, enka p'íntka chpírirhu uékap'esïnti o itsïrhu uékamesïnti. 16Chéti jurhenkorherichani juákuaska ka nóksï ústi ampakerantani.” 17Ka Jesusi uantaspti: “¡Xáni enka no mintsikanhak'a ka no kurhankunhani! ¿Anti na jatini jamperi chánksïni jinkuni jauateru? ¿Na xánteruksïni tekaantaa? Axuentsï juáche je tumpini.” 18Jesusi xukaspti nóampakitini, ka nóampakiti tumpini uérhentaspti ka tumpi jimak'u ampakentaspti.
19Ka jurhenkorherichaksï Jesusini támu páspti ka sïpatekuarhkuksï kurhamarhespti: “¿Antisïni jucha no u petarhetant'a'ni?” 20Ka Jesusi arhiaspti: “Jimpokats'ï Diósïni no kánekua mintsikasïnka. Sési jimpoksïni arhixaka, eskats'ï xántku mintsikapirinka eska mostaseri tskípu nák'u k'énharhik'a, anteni juátantsï arhipirinka: ‘Jiniani ni’ ka juáta mótseati, ka nómpe ma jauati enkats'ï no úaka úni. 21[Íni jásï nósesi járhatichaksï kómakua ka karhinta japarintkusï petarhetpenhantat'i.]”
Jesusi ménteru uantanukukorhent'asti
(Mk 9.30-32; Lk 9.43-45)
22Enkaksï Galilea jámani jápka, Jesusi arhiaspti: “Acheti Uáp'anksï intsïnharhitpeati, 23ka uántikuatiksï, k'óru tanimu jurhiatekua jimpo tsíntaati.” Jurhenkorherichaksï ísï kurharini kánekua kómu p'ikuarheraspti.
Tiósïo anapu maiampekua
24Enkaksï Jesusi ka imeri jurhenkorhericha Kafarnaumi niárapka, Pédrunksï antarheraspti tiósïo anapu tumina tánantsticha ka kurhamarhesptiksï: “¿Chéti jurhentpiri tumina tiósïo úrakua íntspesïnki?” 25Ka Pédru: “Jo” Arhiaspti.
Enkaksï k'umanchekuarhu inchant'apka, Jesusi Pédruni uantap'aspti ka arhispti: “¿Nári erankuntasïnki? Parhakpeni anapu irechechaksï, ¿Néchani maiamperataraasïnki? ¿Imeri irechekuarhu anapuechani o uérakua anapuechani?” 26Ka Pédru arhispti: “Uérakua anapuechani.” Ka Jesusi arhispti: “Jiák'anksï irechekuarhu anapuecha nómpema íntspeati. 27Nóchi ikiatauaka, japuntarhu ni ka kurucha p'ímatarakuani k'uanima ka p'ímaakari kuruchani ma, arhachaku ka taiakatari exent'aaka. P'íchakuntsï ka imani jimporini maiampeche ka t'út'u maiampekorhe.”
Trenutno izbrano:
Sáni Mateo 17: DKPJ
Označeno
Deli
Kopiraj
Želiš, da so tvoji poudarki shranjeni v vseh tvojih napravah? Registriraj se ali se prijavi
Biblia en P´urhépecha, Michoacán, México © Sociedad Bíblica de México, A.C.