EKESOTE 7
7
1Nee ui leva e te Eteleno kia Moisese: Sio, e au fakaliliu ia koe ko te Atua kia Falaone; pea ko Alone, tou taokete, e liliu anai ko tau polofeta. 2Ko koe, e ke fakaha anai te u mea fuli ae e au fakatotonu atu kia koe, pea ko Alone tou taokete, e palalau anai kia Falaone, ke tuku te u fanau a Iselaele ke mavae mai tona fenua. 3Pea ko au, e au fakafefeka anai te loto o Falaone, pea e au liuliuga anai aku fakailoga mo aku milakulo i te fenua o Esipito. 4E mole fakalogo anai ia Falaone kia kolua. E fafa anai toku nima ki Esipito, pea e au fakamavae anai mai te fenua o Esipito aku fua tau, taku hahai, te u fanau a Iselaele, aki ni tautea lalahi. 5E iloi anai e te kau Esipito ko au ko te Eteleno, i te aho ae e au folahi ai anai toku nima ki Esipito, pea e au fakamavae anai mai lotomalie o natou te u fanau a Iselaele.
6Nee fai leva e Moisese mo Alone te mea ae nee fakatotonu e te Eteleno kia naua: nee na fai leva ki ai. 7Nee tau valugofulu ia Moisese, pea nee tau valugofulu ma tolu ia Alone, i te aho ae nee na palalau ai kia Falaone.
Fetogi o te tokotoko o gata
8Nee ui leva e te Eteleno kia Moisese mo Alone: 9Kapau e ui atu anai e Falaone kia kolua: Kolua fai he milakulo! E ke ui anai kia Alone: Too tou tokotoko, o li ia ia kia mua o Falaone. E liliu anai ia ko he gata. 10Nee alu leva ia Moisese mo Alone kia Falaone, pea nee na fai leva te mea ae nee fakatotonu age e te Eteleno kia naua. Nee li leva e Alone tona tokotoko kia mua o Falaone mo ana tagata faifekau; pea nee liliu leva te tokotoko ko he gata. 11Kae nee paui leva e Falaone ni tagata poto mo ni tagata faikikite, ae ko te u tagata gaohi mea fakatalakitupua o Esipito, pea nee natou toe fai leva te mea aia ki anatou mea fakatemonio. 12Nee natou li leva ki te kele onatou tokotoko fuli, pea nee natou liliu leva ko ni gata. Kae nee folo leva e te tokotoko a Alone anatou tokotoko. 13Nee fakafefeka leva e Falaone tona loto, pea nee mole fakalogo leva ia ia kia Moisese mo Alone o mulimuli ki te mea ae nee ui ki ai e te Eteleno.
Tautea e hogofulu: te vai nee toto
14Nee ui leva e te Eteleno kia Moisese: E fakafefeka anai e Falaone tona loto; e mole ina tali anai ke tuku te hahai ke olo. 15Ke ke alu anai kia Falaone kei uhu; e ulu mai anai ia ia o alu ki te vaitafe; pea e ke alu anai ki ona mua i te laugutu o te vaitafe. E ke too anai i tou nima te tokotoko ae nee liliu o gata, 16e ke ui anai kia Falaone: Ko te Eteleno, te Atua o te kau Hepeleo, nee ina fekaui mai au kia koe, ke ui atu kia koe: Tuku taku hahai ke olo, o tupu ke natou tauhi kia au i te toafa. Pea koeni, o kaku mai ki te aho nei, nee mole pe ke fakalogo. 17Pea koeni te folafola a te Eteleno: I te mea aeni e ke iloi ai anai ko au ko te Eteleno. E au taai anai te vai o te vaitafe aki te tokotoko ae e too i toku nima; pea e liliu anai te vai o toto. 18E mamate anai te u ika fuli ae e mauli i te vaitafe, pea e mamanu anai te vaitafe, pea e mole feala anai ke toe inui te vai o te vaitafe e te kau Esipito.
19Nee ui leva e te Eteleno kia Moisese: Ui kia Alone: Too tou tokotoko, pea faoi tou nima ki te u vai fuli o te kau Esipito, ki onatou vaitafe lalahi, mo onatou vaitafe liliki, mo onatou vai tanaki, mo onatou vaikeli, mo onatou tanakiaga vai fuli. E liliu anai te u vai fuli o toto; pea e mau anai te toto i te fenua katoa o Esipito, o kaku ki loto o te u ipu akau mo te u ipu maka. 20Nee fai leva e Moisese mo Alone te mea ae nee fakatotonu e te Eteleno. Nee hiki leva e Alone tona tokotoko, pea nee ina taai leva te vai o te vaitafe ia mua o Falaone mo ana tagata faifekau; pea nee liliu leva o toto te vai katoa o te vaitafe. 21Nee mamate leva te u ika ae nee mauli i te vaitafe, pea nee mamanu leva te vaitafe; nee mole toe feala leva ke inu te kau Esipito ki te vai o te vaitafe, pea nee mafola leva te toto i te fenua katoa o Esipito. 22Kae nee toe fai foki e te kau gaohi mea fakatalakitupua o Esipito te mea aia ki anatou mea fakatemonio. Nee fakafefeka leva e Falaone tona loto, pea nee mole fakalogo leva ia ia kia Moisese mo Alone, o mulimuli ki te mea ae nee ui ki ai e te Eteleno. 23Nee toe liliu leva Falaone ki tona fale; pea nee mole tokaga leva ia ia ki te u mea aia. 24Nee keli leva e te kau Esipito katoa ni luo ia tafa o te vaitafe, ke mau he vai ke inu; koteuhi nee mole feala ke inu te vai o te vaitafe. 25Nee hili leva aho e fitu ki te tautea e te Eteleno o te u vai o te vaitafe.
Kelenui i te fenua
26Pea nee ui leva e te Eteleno kia Moisese: Alu kia Falaone, pea ke ui leva kia ia: Koeni te folafola a te Eteleno: Tuku taku hahai ke olo, o tupu ke natou tauhi kia au. 27Kapau e ke fakafisi ke tuku ia ke alu, pea e au tauteai anai tou fenua katoa aki ni kelenui. 28E fonu anai te vaitafe i te u kelenui; e natou hahake anai, pea e natou feulufi anai ki tou fale, ki tou kogafale moe mo tou palepale, ki loto o te u fale o au tagata faifekau mo te u fale o tau hahai katoa, ki loto o au gutuumu pane mo ou kogamea natu falaoa. 29E kake anai te u kelenui ia koe, mo tau hahai, pea mo au tagata faifekau.
Trenutno izbrano:
EKESOTE 7: WB2011
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland