EKESOTE 6
6
Fakamalohii o Moisese e te Atua
1Nee ui leva e te Eteleno kia Moisese: I te aho nei e ke sio anai ki te mea ae ka au fai anai kia Falaone; e fakamalohii anai ia ia e he nima malohi ke tuku natou ke olo, pea e fakamalohii anai ia ia e he nima malohi ke kapu natou mai tona fenua.
2Pea nee toe palalau leva te Atua kia Moisese: Ko au ko te Eteleno. 3Nee au fakaha ia au kia Apalahamo, mo Isaake mo Sakopo, i toku higoa ae ko te Atua Mafimafi; kae nee mole natou iloi au i toku higoa ae ko te Eteleno. 4Nee au fakatuu foki taku hai mo natou, ke foaki kia natou te fenua o Kanaane, te fenua ae nee natou faifagona ai, ae nee natou nonofo fakatemi ai. 5Kua au logo ki te u tagi a te u fanau a Iselaele, ae e taomi e te kau Esipito aki te popula, pea kua au manatui leva taku fakapapau. 6Koia ke ke ui ki te u fanau a Iselaele: Ko au ko te Eteleno, e au fakaateainai anai koutou mai te u gaue ae e koutou taomia ai i te kau Esipito, pea e au haofaki anai koutou mai tanatou popula, pea e au haofaki anai koutou aki he nima malohi, mo ni tautea lalahi. 7E au too anai koutou ko taku hahai, pea e au liliu anai ko tokotou Atua, pea e kotou iloi anai ko au ko te Eteleno, tokotou Atua, ae e ina fakaateainai koutou mai te u gaue ae kua hili kia koutou e te kau Esipito. 8E au fakaulu anai koutou ki te fenua ae nee au fakapapau ke foaki kia Apalahamo, mo Isaake, mo Sakopo, pea e au foaki anai ia kia koutou, ko tokotou fenua, ko au ko te Eteleno.
9Pea nee palalau feia leva ia Moisese ki te u fanau a Iselaele. Kae o tupu ko te mamahi mo te mamafa o te popula, nee mole feala leva ke natou fakalogo kia Moisese.
10Pea nee palalau leva te Eteleno kia Moisese, o ui: 11Alu o palalau kia Falaone, hau o Esipito, ke ina tuku ke mavae te u fanau a Iselaele mai tona fenua. 12Nee tali leva e Moisese ki te Eteleno: Koeni foki, nee mole pe fakalogo te u fanau totonu a Iselaele kia au: Pe e feafeai anai he fakalogo a Falaone kia au, ae e mole palalau lelei?
13Nee folafola leva te Eteleno kia Moisese mo Alone, o tuku kia naua ni fakatotonu ki te u fanau a Iselaele mo Falaone hau o Esipito, ke fakamavae te u fanau a Iselaele mai te fenua o Esipito.
Tupuaga o Moisese mo Alone
14Koeni te u pule o te u famili fuli. Foha o Lupeni, ko te uluaki o Iselaele: ko Enoke, mo Palu, mo Eselone, mo Kalame. Ko te u famili aena o Lupeni.
15Foha o Simeone: ko Semuele, mo Samine, mo Oate, mo Sakine, mo Tesokale; mo Saulo, foha o te fafine Kanaane. Ko te u famili aena o Simeone.
16Koeni te u higoa o te u foha o Levi, mo tonatou hakoga: ko Kelesoni, mo Keati, mo Melali. Ko te u tau o te mauli o Levi ko te teau tolugofulu ma fitu. 17Foha o Kelesoni: ko Lipeni, mo Simei, mo ona famili. 18Foha o Keati: ko Amilame, mo Siteseale, mo Hepelone, mo Usiele. Ko te u tau o te mauli o Keati ko te teau tolugofulu ma tolu. 19Foha o Melali: ko Makeli mo Musi. Ko te u famili aia o Levi, mo onatou hakoga.
20Nee ohoana leva ia Amilame mo Sokepete, tona mahikitaga; pea nee ina fanaui leva kia Amilame ia Alone mo Moisese. Ko te u tau o te mauli o Amilame ko tau e teau tolugofulu ma fitu. 21Foha o Siteseale: ko Kole, mo Nefeke, mo Sikili. 22Foha o Usiele: ko Misaele, mo Elesafani, mo Sitili.
23Nee ohoana leva ia Alone mo Elisepa, ofafine o Aminatape, tuagaane o Nakesone; pea nee fanaui leva e Elisepa kia Alone ia Natape, mo Apiu, mo Eleasale, mo Itamale.
24Foha o Kole: ko Asili, mo Elekana, mo Apiasafe. Ko te u famili aia o te kau Kolite.
25Nee ohoana leva Eleasale, foha o Alone, mo he ofafine o Putiele, pea nee ina fanaui leva kia Eleasale ia Finesi. Ko te u pule aia o te u famili o te kau Levi, mo onatou famili.
26Ko te Alone foki aia mo te Moisese aia, ae nee ui ki ai e te Eteleno: Kolua fakamavae mai Esipito te u fanau a Iselaele, o mulimuli ki onatou fua tau. 27Ko naua aia ae nee palalau leva kia Falaone, ko te hau o Esipito, ke fakamavae te u fanau a Iselaele mai Esipito. Ko te Moisese aia mo te Alone aia.
Fakamooni o te vokasio o Moisese
28Pea nee palalau leva te Eteleno kia Moisese i te fenua o Esipito, 29nee ui leva e te Eteleno kia Moisese: Ko au ko te Eteleno. Fakaha kia Falaone, ko te hau o Esipito, te u mea fuli ae e au ui atu ki ai. 30Pea nee tali leva e Moisese ia mua o te Eteleno: Koeni, e mole au palalau lelei; e feafeai anai he fakalogo mai a Falaone kia au?
Trenutno izbrano:
EKESOTE 6: WB2011
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland