UMOZHIGO 42
42
Atagwụ Josɛf Zhe ni Ijipti maa o So Iyimɛyɛ
1Aka na ti ge Jekob hwụjɛ maa iyimɛyɛ namba ni Ijipti, bɛɛ hiɛŋ miaụŋ mu bwa me eyi, iwembe po ahiɛ mama mbiyanganụụ? 2Bɛɛ hiɛŋ aŋ, N hwụjɛ maa iyimɛyɛ namba ni Ijipti, zhaga ma maa hi ti sɛnjɛ iyimɛyɛ apata, iwɛ maa kede to 'wo imunɛ o.#Ugo 7:12
3Ibɛ po atagwụ Josɛf umpwa zwi ni Ijipti maa ɛ sɛ ga iyimɛyɛ. 4Ama ge Jekob tumwanɛ shɛ Bɛnjamin buhongwu Josɛf ba amɛ oko maa zha na atagwụ ata ubwa o. Iwɛnɛ tu baa njɛ inyɛsɛ maa nekeshi iyi iwɛ ike yɛ njɛ bu hwayɛ sasana.
5Gabata miaụŋ-me-eyi mi Isrɛl mi zhagajɛ na atwa na zhɛ du maa ɛ sɛ iyimɛyɛ, iwɛnɛ ti imunɛ-tiya namɛ du na cɛnjɛ ti Kenan.#Ugo 7:11
6Go Josɛf, ubwa kaa shɛ ugwomina cɛnjɛ ta ata ti Ijipti, ubwa ba sangana atwa cɛnjɛ ta ata kpaaŋ iyimɛyɛ. Ibɛ atagwụ ubwa zhajɛ ee kwuzenji na agba ubwa, ee ubi shishe sha aba na cɛnjɛ. 7Go Josɛf kwụbɛ atagwụ ubwa, bi mepi aŋ kaa, ama bu mama njɛ tuba gana bụtụ na mepi shi aŋ. Bee mbiseji aŋ n-ndumwa mụ wɛ, bɛɛ hiɛŋ aŋ, Ce ahiɛ banɛɛ?
Ɛɛ jishijɛ bụ, ɛɛ hiɛŋ, Tu banɛ na cɛnjɛ ti Kenan, atɛ zhajɛ maa ta sa iyimɛyɛ.
8Okwo tu go Josɛf mepi atagwụ ubwa, ama e mepi shi bu tuba o. 9Nazhɛ go Josɛf teyinje ụwalabụ na bee wetegeni la iwɛ aba. Bɛɛ hiɛŋ aŋ, Hiɛ shɛ eyeleji cɛnjɛ, hi zhajɛ maa hiɛ kwụbɛ okwo atwa cɛnjɛ ti ga shɛ asụnyasụ.#Umoz 37:5-10
10Ɛɛ hiɛŋ bụ, Awo, iyɛri, miaụŋ mu ga mụ bụ mu ugondu mi zhajɛ maa mu so iyimɛyɛ. 11Iyɛri, tɛ shɛ miaụŋ ma bụtụ bu ko hwɛɛ tu. Tɛ shɛ atwa tɛkana, miaụŋ mu ga mụ bụ mu ugondu mɛ shɛ shɛ eyeleji cɛnjɛ o.
12Go Josɛf hiɛŋ aŋ, Awo, tụsụnyasụ ta atwa cɛnjɛ tu ga ahiɛ zhajɛ tụkwụba.
13Ɛɛ hiɛŋ, Atuba miaụŋ mu ga bụ mu ugondu tu namɛ la atwa umpwa-na-atwa-eyebi te bishi tu ti meci, miaụŋ ma bụtụ bu ko atɛ shɛ na cɛnjɛ ti Kenan. Hioko, bihiakana tu ta namba taa hwayɛ pe bishi tu, bu na bu ko kiri uwo.
14Ama Go Josɛf hiɛŋ aŋ, Iwɛ-tɛkana Ngee hi mbishi maa eyeleji cɛnjɛ ahiɛ shɛ. 15Tu ga Faro ta hwungwa bana, ɛ zhɛ ma hi manga, hi zha shɛ hia bana epe kwukwuŋ semi aka na buhongwu ata hiŋ bu umɛwɛɛ zhajɛ epe. 16Tumwana ma bụtụ bu ko maa shapɛ buhongwu ata hiŋ, ta ahiɛ ta namɛ nu umwono ga tishi, iwɛ maa e menji n-ndumwa mi hiŋ okwo iwɛ-tɛkana ahia duma, shi bwonu tu ga Faro ta hwungwa bana, iwɛ-tɛkana eyeleji cɛnjɛ ahiɛ shɛ gom. 17Bee zweni aŋ nu umwono-tishi hwɛɛ aba, jitɛ itɛtu.
18Ti yaa namɛ jitɛ ɛtɛ itɛtu, go Josɛf hiɛŋ aŋ, Nda ma ijɛ Ngɛɛ zhɛ mo hi mbiso maa hi bini, iwɛnɛ po ma nda inyɛsɛ ya Agwatana. 19Yaa shɛ ahiɛ shɛ atwa tɛkana, asha lono ma maa yɛu-bino hiŋ ike shiyono nu umwono-tishi maa atwa vwɛ tuba suji iyimɛyɛ e hwuri ujiyo iwɛ imunɛ ya atwa nhwaŋ mi hiŋ. 20I shɛ tilɛɛ maa hi n shapɛrɛganɛ buhongwu ata hiŋ bu umɛwɛɛ, nazhɛ Ngɛɛ zhɛ ma mapa maa n-ndumwa mi hiŋ mɛ shɛ iwɛ-tɛkana, nazhɛ ahiɛ zha shɛ hio 'wo. Ee leni maa a njɛ gana ata.
21Aa mama hiaŋnụ abaaba, iwɛ-tɛkana, n-ndumwa mụ tụ wụmɛ no buhongwu tu, iwɛ ụbaụta na eti peni bu la aka na baa tu tabwa, ti shiri shi kaa acɛbɛ o. Iwɛbɛ po ụbaụta ga zhajɛ nu uhiuhiu tu hwayɛ ga.
22Gɛ Rubɛn jishijɛ aŋ, bɛɛ hiɛŋ, N hi mbishi shi la maa ta nda ma yɛu gɛ tidice iwɛwɛ hŋ? Ama hi shiri shi la acɛbɛ o. Hioko ma, a mbana ma tu tụpana itɛpwɛ tu'wo tu bwa hwayɛ ga.#Umoz 37:21,22 23E mepi shi kaa maa go Josɛf hwụjɛ rɛjɛmɛ ra aba o, iwɛnɛ te bilesheji namɛ na ashashɛ aba.
24Ibɛ po bɛɛ ishijɛ bee genji aŋ, bee zhe bɛɛ cwɛ-u'wo. Bee gwure no ofwo aba, baa jɛmɛ n-ndumwa na aba. Nazhɛ baa vwɛ Simion no olugwo aba bee umpi bu ne eshe aba.
25Go Josɛf eni atwa ubwa maa ge e shidenji iyimɛyɛ na azhɛka aba maa e gwuricingeni bụtụ bụtụ ukwuribi ubwa nụ ụzhɛka ubwa, maa ge peni aŋ du iyimɛyɛ iwɛ uhwaŋna tahaŋnụ ta aba. Aa ndanɛ aŋ ga gana ata.
Atagwụ Josɛf Gwuri ni Kenan
26Nazhɛ atagwụ ata Josɛf umpenji nzhinyacɛ ma aba i'wɛŋnɛ, ee beni apata. 27Ama gana na ta bụtụ aba bu ko kepishinji ụzhɛka ubwa maa pana izhinyɛci ibwɛ iyimɛyɛ no ofwo na ɛɛ zhɛ o woto nụ ụrụmɛ ata, baa kwụbɛ ukwuribi ubwa nu unu ụzhɛka ubwa. 28Bɛɛ hiɛŋ miaụŋ-mo-bino bwa, E n ngwuricingeni ma ukwuribi mu, u mbuna shiyeni nu unu ụzhɛka mu! Inɛ ɛtɛ herikeni aŋ shihwulu, aa njɛ inyɛsɛ tebiye, aa mama hiaŋnụ, Imbe nɛ Agwatana ma tɛ ndaa?
29Aka na ta atagwụ Josɛf ci bishi ba aba na cɛnjɛ ti Kenan, ee mbishi bu iyi elele nɛ jiteni aŋ, ɛɛ hiɛŋ, 30Bụtụ na shɛ ugwomina cɛnjɛ ta ata ti Ijipti bi ti mbiseji n-ndumwa mụ wɛ, baa tɛ njɛ eyeleji cɛnjɛ. 31Ama ti hiɛŋ bụ, Tɛ shɛ atwa tɛkana, tɛ shɛ shɛ eyeleji cɛnjɛ o. 32Tu namɛ la atwa umpwa-na-ba-eyebi te bishi tu ti meci, bụtụ tu bu ko zasaba ya o, ama bụtụ bu umɛwɛɛ ta namba pe bishi tu taa hwayɛ na cɛnjɛ ti Kenan.
33Nazhɛ uhiu cɛnjɛ ta ata iti hiɛŋ, Ni inɛ gɛ Ngɛɛ zhɛ Ma mapa okwo hiɛ shɛ ga atwa tɛkana. Ganga ma yɛu-bino hiŋ ike no ofwo mi, maa hi suji iyimɛyɛ hi hwuri ujiyo iwɛ imunɛ ya atwa nhwaŋ mi hiŋ. 34N shapɛrɛganɛ ma tuba bihiakana ata hiŋ. Nazhɛ Ngɛɛ zhɛ Ma mapa maa hiɛ shɛ shɛ eyeleji cɛnjɛ o, ama atwa tɛkana ga ahiɛ shɛ. Nazhɛ du Ngɛɛ zhɛ Ma hi ganganɛ yɛu-bino hiŋ, maa hi na ya udukwo na cɛnjɛ tu ga.
35Gana na te e zuzweji iyimɛyɛ nɛ zweni na azhɛka aba, ukwuribi bụtụ bụtụ umpi wee shiyeni nụ ụzhɛka ubwa. Aka na ta a kwụbɛ tu'umpo tu ukwuribi ata, aa njɛ inyɛsɛ hwɛɛ aba, te bishi ba aba. 36Ge Jekob bishi ba aba hiɛŋ aŋ, Hi hwuwi miaụŋ mi mi. Go Josɛf zasaba ya o, ge Simion kaa zasaba ya o, ɛhi zhɛ hia shapanana Bɛnjamin, Gamba ngooko ijɛ vwutengeni kpaaŋ.
37Gɛ Rubɛn hiɛŋ bishi bwa, Yaa shɛ Ngee bu gwuricingeni shi Bɛnjamin, asha kwụna miaụŋ mi mi me eyi mi yebi. N utegeni bu, N zhɛ me bu gwuricingeni bu.
38Ama ge Jekob hiɛŋ aŋ, Yɛu mi zha shɛ yo zwo ya ne hiŋ o, iwɛnɛ po batagwụ bwa uwo, ubwa kaa kiri vwɛ ya. Yaa shɛ iyi iwɛ vwuteni bu na tahaŋnụ tu ga ɛhi zhɛ, asha hi zhɛ hio tocingo tuhwaŋla ti mi ne e'uye na amɛ-tụhaŋtụ.
Currently Selected:
UMOZHIGO 42: RBT
Označeno
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008