41
Ga Faro Wetegeni Awalabụ
1Na aba na ta shiywa shi yebi shɛ zhɛrɛ, ga Faro wetegeni ụwalabụ, bee shikeni nụ ụpalanụ Urefu Nayɛl. 2Baa kwụbɛ inɛ icenje nɛ nyemenji, nɛ kaa zhɛmanjɛ, ti yaa banɛ yee munje Urefu ata, yaa ya ambɛ nụ ụpalanụ ubwa. 3Baa kwụbɛ inɛ inyɛ icenje, nɛ 'nyanganɛ kokorokwu kokorokwu ti yaa banɛ yee munje nu Urefu ata yaa 'wa aŋ, i zhɛshɛ o, yee shikekeni to dongonu inɛ yee ebe ihiiŋ nu ukwoswo Urefu ata. 4Nazhɛ inɛ ɛtɛ nɛ 'nyanganɛ nɛ kaa zhɛshɛ, i yɛ inɛ ye ebe nyemenji icenje, ga Faro zhinjɛ malabụ. 5Bee leyeneni malabụ, bee wetegeni ụwalabụ uyebi, baa kwụbɛ usanga ukaraba uko gba na to miaụŋ mi cenje a na kaa 'yajɛ eshe cụsụ cụsụ a na kaa zhɛmanjɛ. 6Baa kwụbɛ akaraba anya ecenje a na 'nyɛ, a na uvwugo uwaŋna-banụ hwocinji, tɛɛ unshɛ na aba ene ebe. 7Nazhɛ akaraba ata a 'nyɛ tweri ene ebe ecenje a na 'yajɛ eshe cụsụ cụsụ. Ga Faro zhinjɛ, yaa shɛ ụwalabụ. 8Ibɛ po ohwulu herikeni bu, iyi heri nu uvungwa baa tumwanɛ maa ga a suyanɛ ashɛjɛ Ijipti keeni atwa shihaŋsa kpaaŋ. Ga Faro mbishi aŋ awalabụ ata ubwa, ama i zasa bụtụ okwo bu ko na eri bo mbiso bu ecilo aba o.#Dan 2:2
9Nazhɛ uhiu bipeni ba agwuma meni nu ukwopi hiɛŋ Faro, N teyinje hwayɛ ga tipindo tu na Ngaa njɛ. 10Aka na abɛ njɛ la isɛbwɛ na anjɛ-ugondu bu, ebi n shiyeni nu umwono-tishi keeni uhiu bɛnjɛ bi iyimɛyɛ ni i'ɛlɛ bungbaracɛ ba ajama. 11Etu wetegeni awalabụ na amɛ ụjita uko gbaa, tu bwa tu Gamba, ụwalabụ ụ bụtụ bụtụ kaa 'yajɛ ecilo ubwa. 12Usemberi we Ehibru uko namba apata no tu, na ba ndana uhiu bungbaracɛ iyi, aka na eti mbishi bu awalabụ tu, bee ti mbishi ecilo awalabụ tu. 13Ɛɛ sɛ ga gana na tu baa tu dumanganɛ ecilo aba. Gabụ na bu n gwuricinje nu ugondu mu, ebi sweci kaa bɛnjɛ bi iyimɛyɛ.
14Nazhɛ ga Faro tumwanɛ butumwa maa ga a suyanɛ Josɛf, ɛɛ bɛcinjɛ bu kakayɛ nu umwono ata tishi ni izɛlɛgwu. Aka na ta a 'nyanjɛ bụ, bee sheyinji tugwuno tu bwa, bee teni na agba Faro.
15Nazhɛ ga Faro hiɛŋ Josɛf, N wetegeni awalabụ, i zasa kaa bụtụ okwo bu ko na eri ba duma ecilo aba o. N hwụjɛ kaa ɛɛ hiɛŋ, aka na abụ hwụjɛ ụwalabụ na bụtụ wetegeni, bi eri ba duma ecilo ubwa.
16Go Josɛf jishijɛ Faro, bɛɛ hiɛŋ, Shɛ Gamba ma nda iŋ o, Agwatana ubwa zhɛ ma bụ pana ajɛshɛgwa amɛ-olom.
17Nazhɛ ga Faro hiɛŋ Josɛf, Hioko, N wetegeni ụwalabụ, Ngee shikeni nu ukwoswo Urefu Nayɛl. 18Inɛ icenje, nɛ nyemenji, nɛ kaa zhɛmanjɛ banɛ nu Urefu ata yee munje, yaa ya ambɛ nụ ụpalanụ Urefu ata. 19Nazhɛ inɛ inyɛ icenje banɛ yaa 'wa iŋ ne ekwunyi, yee munje. Inɛ ɛtɛ namɛ ya kokorokwu kokorokwu i pilanụ sụ okwo cwɛŋ o, i 'nyanganɛ tebiye, N ta kwụbɛ shɛ inɛ gɛnɛ ɛtɛ na cɛnjɛ ti Ijipti kwukwuŋ. 20Nazhɛ inɛ ɛtɛ i 'nyanganɛ i yɛ inɛ ye ebe ihiiŋ i nyemenji icenje. 21Ama, okwo ti yaa yɛ iŋ, i sụbɛ shɛ maa i yɛ ba iyi o. Iwɛnɛ po i ta 'nyanganɛ waa gana ebe ihiiŋ. Nazhɛ Ngɛɛ zhinjɛ. 22Ngee wetegeni sasana ụwalabụ unya, Ngaa kwụbɛ usanga ukaraba uko gba na to miaụŋ mi cenje, a na kaa 'yajɛ eshe tebiye a zhɛmɛ kaa. 23Akaraba anya ecenje, a na lụmbɛ, a na zasa kaa eshe, a na uvwugo uwaŋna-banụ hwocinji unshɛ na aba aba. 24Nazhɛ akaraba ebe zasa eshe tweri akaraba ebe ecenje a na 'yajɛ eshe cụsụ cụsụ. Ngee mbishi anjɛ-tishino, ama i zasa bụtụ okwo bu ko na eri mo n eshicigono iŋ o.
25Nazhɛ go Josɛf hiɛŋ Faro, Ecilo awalabụ ga bụ a shɛ oko, Agwatana ubwa bi kepishingeni iyi nɛ baa jala tɛnda. 26Inɛ ɛtɛ ibiye icenje i shɛ shiywa shi cenje, akaraba ata ebiye ecenje a shɛ du shiywa shi cenje, ecilo awalabụ ga bụ a shɛ oko. 27Inɛ ɛtɛ icenje nɛ 'nyanganɛ i zhɛshɛ, nɛ munje na aba aba i shɛ shiywa shi cenje, akaraba ata ecenje a na zasa eshe, a na uvwugo uwaŋna-banụ lụmbɛcɛnjɛ, a shɛ du shiywa shi imunɛ-tiya shi cenje. 28Gana na Ngee bi mbishi maa Agwatana ubwa bi mbiseni iyi nɛ baa jala tɛnda gana ata yaa shɛ gom. 29Shiywa shi cenje, iyi zhɛ ya bala cɛnyi na cɛnjɛ ti Ijipti kpaaŋ. 30Ama na aba shiywa sha ata shi cenje, imunɛ-tiya zhɛ ya layɛ, isɛbwɛ iyi nɛ ga balawa la cɛnyi na cɛnjɛ ti Ijipti zhɛ yo 'wo atwa. Imunɛ ɛtɛ zhɛ yo songo cɛnjɛ tu ga. 31A zha shɛ kaa e teyinje ya okwo iyi ga balawa la na cɛnjɛ tu ga iwɛ imunɛ ɛtɛ nɛ namɛ o, iwɛnɛ ti yɛɛ zhɛ ya wụmangwụ tebiye. 32Ecilo awalabụ bụ na namɛ kpalụ yebi i shɛ maa Agwatana imwangwa iŋ, bɛɛ zhɛ kaa ba nda iŋ kakayɛ. 33Jalakaka bụtụ bu ko na 'yebi iyi tɛnda na kaa incɛ hwuwayɛ go, maa shikicinji bu na cɛnjɛ tu ga ti Ijipti kpaaŋ. 34Bɛ shɛ ba dwalakaka atwa na zhɛ ngbaraka cɛnjɛ tu ga maa e lesheji iyi itana na cɛnjɛ ti Ijipti kpaaŋ, na amɛ shiywa shi cenje shɛ na iyimɛyɛ zhɛ ya bala. 35Pana aŋ ụhwada maa e sutengeni iyimɛyɛ ye elele na shiywa shɛ ga she ci, iwɛ maa e tileni iyi izɛgwu na ashɛpwụ a'wụtụ a'wụtụ iwɛ iyimɛyɛ, maa a na ngbaraka iŋ. 36Ga a intanɛ iyimɛyɛ ɛtɛ iwɛ cɛnjɛ tu ga, iwɛ shiywa shi cenje shɛ na imunɛ zhɛ ya layɛ na cɛnjɛ ti Ijipti, iwɛ maa kede imunɛ ɛtɛ iti iricinji o.
37Ahaŋsa ata shɛ gana maa a zhɛmɛ ne eshe Faro keeni anjɛ-ugondu ubwa kpaaŋ. 38Ga Faro hiɛŋ anjɛ-ugondu ubwa, Ti te eri to gwushigo bụtụ na Mpiala ma Agwatana mu namɛ na amɛ ubwa gana Josɛf ga hŋ? 39Nazhɛ ga Faro hiɛŋ Josɛf, Taa ta Agwatana ibi mbiseni ijɛ kpaaŋ, i zasa ya bụtụ na ta namba, na incɛ na kaa 'yajɛ ahaŋsa gana bụ o. 40Gabụ bi zhɛ ba sha uhiu na cɛnjɛ ti mi, atwa mi kpaaŋ zhɛ na nda iyi elele nɛ ebi peni aŋ unu, semi ni idwɛtwɛ kiri Ngɛɛ zhɛ mo bu hwulo.#Ugo 7:10 41Ibɛ po ga Faro hiɛŋ Josɛf, Gabụ Ngaa njɛ ugwomina na cɛnjɛ ti Ijipti kpaaŋ. 42Nazhɛ ga Faro hwucice bukanɛ bu useyida ubwa na buvwa bwa bee hwuŋteni Josɛf na buvwa bwa, bee hwuŋteni bu utogwo ilinɛn ubiye, baa shanɛ bụ shɛgba sha azhɛnarɛya ni i'ilu ibwɛ. 43Bee peni bu ụhaŋtụ cɛnjɛ na 'wa una ubwa maa bu na suka. Aa ugaga nu umbe ubwa, ɛɛ hiɛŋ, Kwuzongo ma! Kwuzongo ma! Gana baa njɛ Josɛf ugwomina na cɛnjɛ ti Ijipti kpaaŋ ta. 44Shɛ inɛ ɛtɛ kiri o, ga Faro hiɛŋ Josɛf, Gamba ga Faro na, i zasa bụtụ be elele zhɛ ba nda iyi elele uzawa ụhwada bụ na cɛnjɛ ti Ijipti kpaaŋ o. 45Ibɛ po ga Faro po Josɛf izeci ye Ijipti ti ga Zafɛnat-penia. Bee zenenji bu biyikwo na ɛɛ hiɛŋ izeci ibwɛ ga Asɛnat, yɛu-yo-o Potifɛra na shɛ bunongbo bu ụshɛpwụ na ɛɛ hiɛŋ izeci ubwa On. Gabata go Josɛf beni na agba Faro bee rinji cɛnjɛ ti Ijipti kpaaŋ.
46Shiywa shi Josɛf shɛ namɛ talacɛ te e meci bu, na aka na ti bee teni nu ugondu Faro agwuma Ejipti tɛnda. Go Josɛf beni na agba Faro, baa sanɛ bee duleji cɛnjɛ ti Ejipti kpaaŋ. 47Cɛnjɛ ti meci iyimɛyɛ tebiye, yaa barɛ na amɛ shiywa sha ata shi cenje. 48Ibɛ po go Josɛf sutengeni iyimɛyɛ ye elele na amɛ shiywa sha ata shi cenje shɛ na iyi balanɛ atwa na cɛnjɛ ti Ejipti. Ee sutengeni iŋ na ashɛpwụ a'wụtụ a'wụtụ, bee sutengeni iŋ nu ụshɛpwụ ụ'wụtụ we elele, inɛɛ nɛ aa hwɛŋ ne shihilo shɛ na shi rungwotwonu aŋ. 49Go Josɛf sutengeni iyimɛyɛ nɛ shɛ inɛ izɛgwu te gembi gana ahwayɛ itekwu, uuwa bi eri shi du ba rɛta iŋ ya o, iwɛnɛ ti yee hwuleji ya tɛrɛta.
50Go Josɛf meci miaụŋ-me-eyi mi yebi ne biyikwo bwa ga Asɛnat, na shɛ yɛu Potifɛra bunongbo bu On, nazhɛ shiywa sha ata shi imunɛ-tiya shi ci. 51Go Josɛf po yɛu nɛ ee metenji bu hiiŋ izeci ti ga Manasɛ.#41:51 Manasɛ: Egini ta Manasɛ i shɛ, isɛbwɛ ụbaụta tu'wo. Bi hiɛŋ, Agwatana njɛ maa gɛ isɛbwɛ ụbaụta na Ngaa njɛ la hwɛɛ, ti ihwɛ bishi mi n 'wi kpaaŋ. 52Boo po inɛ iyebi izeci ti ge Ifrem,#41:52 Ifrem: Egini te Ifrem i shɛ, Agwatana m peni miaụŋ. bi hiɛŋ, Agwatana m peni maa ma mata miaụŋ na cɛnjɛ tu na Ngaa njɛ ụbaụta. 53Ta shiywa sha ata shi cenje shi iyi tubala na cɛnjɛ ti Ijipti shɛ kwunanjɛ. 54Nazhɛ shiywa shi imunɛ-tiya shi cenje shi kwuni, gana na ti go Josɛf jɛmɛ la gom. Imunɛ layɛ na cɛnjɛ te elele kpaaŋ na aka ata, ama iyimɛyɛ tuba barɛ na cɛnjɛ ti Ijipti kpaaŋ. 55Aka na ta atwa cɛnjɛ ti Ijipti kpaaŋ kwuni imunɛ-tiya, nazhɛ aa ugananɛ Faro iwɛ iyimɛyɛ. Ga Faro hiɛŋ atwa Ijipti kpaaŋ, Zhaga ma no ofwo Josɛf, iyi elele nɛ bɛɛ hi hiɛŋ, ga shɛ ibɛ ahiɛ njɛ. 56Aka na ti imunɛ-tiya mburusonu ga na cɛnjɛ ta ata kpaaŋ, go Josɛf kepeshenji shimwono shɛ na bee ge sutengeni la iyimɛyɛ kpaaŋ, bee sengeni Ijipti iyimɛyɛ, iwɛnɛ ti imunɛ ɛtɛ hwuleji na cɛnjɛ ti Ejipti. 57Shɛ inɛ ɛtɛ kiri o, atwa cɛnjɛ tu unyizo kpaaŋ a zhajɛ ni Ijipti no ofwo Josɛf aa sa iyimɛyɛ, iwɛnɛ ti imunɛ rungwutwonu ya cɛnjɛ tu unyizo kpaaŋ.