Sơnròp Gơlik Gơs 9
9
Yàng Tom Trồ ai lơngai Nôe in mơ bơto ală bơta sồr lam
1 Yàng Tom Trồ ai lơngai Nôe mơ ală kòn klau khai in mơ đơs lah: “Tơnggơs tĕ bơtơl oă, lơh bềng lìu hơđang ù. 2Ală phan poan jơng ơm hơđang ù, ală sềm hơđang trồ, mơ ală phan wìn kis hơđang ù, mơ ală ka tòm dàlềng rơp rngòt rngơt dê mê mơ mê rơp geh gơnoar hơđang bol gơ. 3Jơh ală phan lơi wañ mơ gơs bơta kis gen mê ngui lơh gơs phan sa. Añ ai jơh phan hơ̆ be Añ ai ñhơt tơlir. 4 Mơ bol mê bañ sa poac gam gơs bơta kis, hơ̆ la mhàm gơ. 5Ngan behơ̆, Añ rơp lùp wơl mhàm bơta kis bol mê dê: Añ lùp wơl gơ bơh ală phan poan jơng, Añ lùp wơl bơta kis kòn mơnus bơh di tê kòn mơnus dê, bơh di tê oh mi khai dê.
6 Dilah cau lơi lơh gơhòr mhàm kòn mơnus,
gen rơp gơs cau ndai lơh gơhòr mhàm cau hơ̆ wơl,
bơh Yàng Tom Trồ lơh gơs kòn mơnus
be rùp Kơnràñ dê.
7 Behơ̆, ală bol mê tơnggơs tĕ bơtơl oă mơ lơh bềng lìu hơđang ù.”
Bơta ho bal Yàng Tom Trồ dê mơ jơi kòn mơnus
8Yàng Tom Trồ kung đơs mơ Nôe mơ ală kòn klau khai dê lah: 9“Ai Añ, Añ lơh bơta ho bal mơ bol mê, mơ ală jơi bơtiàn bol mê dê, 10mơ ală phan kis ơm bal mơ bol mê, sềm, phan poan jơng tòm hìu, phan poan jơng hơđang ù, hơ̆ la ală jơi lik bơh ơhò, la jơh ală phan poan jơng hơđang ù. 11Behơ̆, Añ lơh bơta ho bal mơ bol mê, dà kŏ ò gơs tŭ lơi tơnchơt ală poac să tai, mơ kung ò gơs dà kŏ nàng tơnroh ù tai ò.”
Bơrlangkang lơh tềl sơnio bơta ho bal do
12Yàng Tom Trồ đơs tai lah: “Do la tềl sơnio bơta ho bal mơ Añ neh bơtào digùl Añ mơ bol mê mơ jơh ală phan kis ơm bal mơ bol mê, sùm sùm tòm kòp rài. 13Añ ơn bơrlangkang Añ jê tòm mhwal, ngui lơh gơs tềl sơnio bơta ho bal Añ jê mơ ù. 14Behơ̆, tŭ lơi Añ pơjum mhwal hơđang ù, mơ bơrlangkang lik tòm mhwal, 15gen Añ rơp kah wơl bơta ho bal Añ neh lơh mơ bol mê mơ ală jơi poac să gơs bơta kis, gen dà ò gơs tŭ lơi kŏ tai mơ tơnroh jơh ală jơi poac să ò. 16Mơ bơrlangkang rơp ơm tòm mhwal, Añ sền gŏ gơ tồ kah wơl bơta ho bal gam sùm sùm digùl Yàng Tom Trồ mơ jơh ală jơi poac să gơs bơta kis tòm ù.” 17Mơ Yàng Tom Trồ đơs mơ Nôe lah: “Hơ̆ la tềl sơnio bơta ho bal mơ Añ neh lơh digùl Añ mơ jơh ală jơi poac să ơm tòm ù.”
Ală kòn klau Nôe dê
18Ală kòn klau Nôe dê lik bơh ơhò la Sem, Cam mơ Japhet. Cam la bèp Kanaan dê. 19Ală cau hơ̆ la pe nă kòn klau Nôe dê, mơ bơh bol khai mơ gơs kòn mơnus lam tòm ù.
Nôe bơñul ñô, Kanaan kong srat sơntơm
20Mơ Nôe rơp lơòr ù mơ lơh suơn ño. 21Khai ñô tơrnòm ño bơñul, gen ơm kuh lòi rồ tòm sal khai. 22Mơ Cam, bèp Kanaan gŏ bơta ơm kuh lòi rồ bèp khai dê gen lik dê tiah yal mơ bàr nă oh mi khai dê. 23Mơya Sem mơ Japhet ai ào ơn dê pơnì mơ lòt ruc tus mơ tơntơ̆ dê bèp bol khai; mơ bơh mat bol khai wèt đah ndai, gen bol khai ò gŏ bơta ơm kuh lòi rồ bèp dê. 24Dơ̆ Nôe kah rngal bơh bơñul ñô, mơ git bơta kòn put neh lơh khai in. 25Gen đơs lah:
“Kanaan pal kong srat sơntơm!
Khai rơp lơh gơs cau dềt rhền rlau jơh tòm ală cau dĭ oh mi khai dê.”
26Khai đơs tai lah:
“Pal jòng ro Jehôwa Yàng Tom Trồ Sem dê;
Kanaan pal lơh gơs cau dĭ khai in!
27Dan Yàng Tom Trồ pò ơnàng ù tiah Japhet in,
mơ khai rơp ơm tòm sàl Sem dê, mơ Kanaan pal lơh dĭ Japhet in!”
28Tơnơ̆ mơ tŭ dà kŏ, Nôe kis pe rhiang pram jơt nam. 29Behơ̆, rài kis Nôe dê la sin rhiang pram jơt nam, gen khai chơt.
Currently Selected:
Sơnròp Gơlik Gơs 9: KPM2018
Označeno
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.