Sơnròp Gơlik Gơs 42
42
Ală kòn klau Jakôp lòt pơl kòi tòm lơgar Ejiptơ. Jôsep đal git ală bi khai
1Jakôp pơnro gơs kòi tòm lơgar Ejiptơ, gen khai đơs mơ ală kòn klau khai lah: “Mbe lơh bol mê sền mat bal mơ gơp behơ̆ taih?” 2 Mơ khai đơs tai lah: “Do añ pơnro lah gơs kòi tòm lơgar Ejiptơ, bol mê pal lòt tềng hơ̆ nàng pơl kòi he in tồ bol he kis mơ ò chơt.” 3Jơt nă bi Jôsep dê mù hơ lơgar Ejiptơ nàng pơl kòi. 4Mơya Jakôp ò ai Benjamin, oh Jôsep, lòt bal mơ ală bi khai dê bơh kơlôi lah: “Rngòt gơs bơta gơtup gơtơl di khai mòn!” 5Tŭ hơ̆, lơgar Kanaan kung gơs jơgloh rung, gen tàng ală kòn klau Israel dê mù pơl kòi tòm Ejiptơ kung be ală cau ndai sơl.
6Mơ tai, Jôsep at bồ lơgar hơ̆; khai tac kòi jơh ală làng bol lơgar in. Mơ ală bi Jôsep dê tus tơmbic să di đap khai. 7Jôsep gŏ mơ git đal ală bi khai, mơya khai lơh muh mat krơi mơ bol khai mơ đơs dô jơnau jroh jram lah: “Mbơh ƀòn bol mê taih?” Bol khai ho lah: “Bơh lơgar Kanaan lòt tus nàng pơl kòi.” 8Behơ̆ Jôsep git đal ală bi khai, mơya bol khai ò git đal Jôsep.
9 Jôsep kah wơl bơta mpau khai neh gŏ bơh bol hơ̆, gen đơs mơ bol khai lah: “Bol mê la cau rwang lơgar tus nàng sền ală tiah lơbơn òsô tòm lơgar do.” 10Bol khai ho lah: “Ơ kơnràñ, ò di behơ̆ ò, ală cau dĭ kơnràñ dê lòt tus nàng pơl kòi lơm. 11Ală bol hi la cau song, cau dĭ kơnràñ ò di la cau rwang lơgar ò.” 12Khai ho mơ bol hơ̆ lah: “Ò di, ngan behơ̆, ală bol mê neh tus nàng sền ală tiah lơbơn òsô tòm lơgar do.” 13Bol khai đơs lah: “Ală cau dĭ kơnràñ la jơt bàr nă oh mi, ală kòn dô nă bèp tòm lơgar Kanaan; tŭ do kòn put gam ơm tòm hìu bèp hi dê ai dô nă neh roh.” 14Jôsep đơs: “Hơ̆ ngan la be añ neh đơs, ală bol mê la cau rwang lơgar ngan. 15Do la bơta añ lòng ală bol mê, añ ai bơta kis Pharaôn dê mơ srat să lah, dilah oh put bol mê dê ò lòt tus hơ do, gen bol mê ò gơs tŭ lơi geh lik bơh tiah do. 16Sồr tĕ dô nă cau tòm bol mê rê nàng rò oh put bol mê tus hơ do mơ ală bol mê pal ơm jàm tềng do. Añ pal lòng jơnau ală bol mê gen behơ̆ añ rơp git bol mê đơs ngan hala ò. Dilah ò đơs song, gen añ ai bơta kis Pharaôn mơ srat să lah, ală bol mê ngan la cau rwang lơgar.” 17Mơ Jôsep krơ̆ bol khai dô bă bal pe ngai tòm hìu jàm.
Jôsep bơklơn bol khai lam Benjamin mù hơ lơgar Ejiptơ
18Tus ngai dơ̆ pe, Jôsep đơs mơ bol khai lah: “Añ rngòt di Yàng Tom Trồ, lơh tĕ be bơta do gen geh kis. 19Dilah oh mi la cau song, gen lòi tĕ dô nă ơm jàm tềng do, ai bol mê rơp cèng kòi nàng jơh hìu nhă bol mê in sa. 20Mơ lam oh put mù hơ do gen jơnau ală bol mê dê la song ngan, mơ ală bol mê ò chơt.” Gen bol khai lơh jat behơ̆.
21Bol khai đơs bal lah: “Di ngan bol he gơs glài mơ oh he rau, bơh tŭ lài bol he gŏ hwềng khai moat jrùng tòm tŭ khai dan bơta nđàc, mơya he ò bài iat, gen tàng behơ̆ bơta bòl glar do tus mơ he.” 22 Ruben đơs lah: “Añ neh đơs mơ bol mê lah: Bañ lơh tìs glài mơ oh hơ̆ sơl ơ? Mơya bol mê ò iat, gen tàng tŭ do bol he pal tơm wơl mhàm khai dê.” 23Mơ Jôsep ngui dô nă cau sơpơ̆bơr nàng tòmbơhbơr mơ ală bi khai, gen tàng bol khai tồnlah Jôsep ò git wă jơnau đơs bol khai dê.
24Mơ khai ñă lòt bơh bol hơ̆ mơ ñìm. Gen khai rê wơl mơ tòmbơhbơr mơ bol hơ̆, mơ kup Simeôn bơh di oh mi khai mơ cap di đap bol hơ̆.
25Jôsep sồr cau dĭ ơn kòi bềng tòm ală rơnđò mơ ơn wơl priă tòm hơ̆ kòp nă khai in, mơ kung ai bơtơl tai bol khai in phan sa rò gùng. Cau dĭ lơh jat be jơnau hơ̆. 26Gen bol khai dap mơ kơt ală rơnđò hơđang ngkòi alàng mơ lòt.
27Tus di hìu ơpah bic, dô nă tòm bol khai hồ rơnđò nàng ai phan siam alàng, khai gŏ priă khai dê di bơr rơnđò. 28Gen khai đơs mơ ală oh mi khai lah: “Priă añ jê neh cau ơn wơl, gơs tòm rơnđò añ do!” Ală bol khai bìr bồ rơm să mơ đơs bal lah: “Ñchi Yàng Tom Trồ neh lơh bol he in be do taih?”
Jakôp ò ai Benjamin lòt
29Ală bol khai rê wơl hơ Jakôp bèp bol khai, tòm lơgar Kanaan, mơ yal khai in ală bơta neh gơlik gơs lah: 30“Cau at bồ lơgar Ejiptơ ai jơnau đơs jroh jram mơ bol hi, mơ pin bol hi la cau rwang lơgar. 31Mơya bol hi đơs mơ khai lah: ‘Bol hi la cau song, ò di la cau rwang lơgar ò. 32Bol hi la jơt bàr nă oh mi kòn dô nă bèp, dô nă neh roh thit, ai kòn put tŭ do gam ơm tòm hìu bal mơ bèp tòm lơgar Kanaan.’ 33Cau at bồ lơgar hơ̆ sồr lah: ‘Lơh be do gen añ git ală bol mê la cau song: tòm ală oh mi lòi wơl tĕ dô nă, ai bol mê rơp cèng phan sa ală hìu nhă bol mê in, 34mơ lam tĕ oh put tus hơ̆ añ; behơ̆ añ git ală bol mê ò di la cau rwang lơgar mơya la cau song. Añ rơp ai wơl oh bol mê in, mơ ală bol mê rơp kă bro tòm lơgar do.’”
35Tòm tŭ bol khai tuh kòi bơh rơnđò, gen do, kòp rơnđò gơs priă kòp nă cau dê, mơ tŭ bèp mơ ală oh mi gŏ kơldung priă he, gen bol khai rngòt ngan.
36Chòp, Jakôp bèp bol khai đơs lah: “Bol mê lơh roh ală kòn añ, Jôsep neh roh rau, Simeôn kung neh roh, mơ tŭ do bol mê kòñ lam Benjamin lòt tai sơl ơ? Ală bơta do gơtuh wơl di añ!” 37Ruben đơs mơ bèp lah: “Jào tĕ oh añ in, añ rơp lam khai rê wơl hơ bèp. Dilah añ ò lam khai rê wơl, gen bèp tơnchơt tĕ bàr nă kòn klau añ jê.” 38Mơya Jakôp ho lah: “Kòn put añ ò mù bal mơ bol mê ò, tài bơh bi khai neh chơt rau, gam mìng dô nă khai lơm. Dilah bơta gơtup gơtơl tus mơ khai tòm gùng bol mê lòt, gen bol mê rơp lơh cau sŏ kò do jê nùs mù tòm lơgar làng ƀồc.”
Currently Selected:
Sơnròp Gơlik Gơs 42: KPM2018
Označeno
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.