43
Jakôp kong ai Benjamin lòt
1Mơ tai, bơta jơgloh rung tòm lơgar la dờng ngan. 2Tòm tŭ bol khai neh sa jơh kòi bol khai cèng bơh lơgar Ejiptơ rau, gen bèp bol khai sồr lah: “Bol mê mù wơl tĕ mơ blơi dô êt phan sa he in.” 3Juda đơs lah: “Cau neh đơs nền mơ bol hi lah: ‘Dilah oh put ò mù bal mơ bol mê, gen rơp ò tŭ lơi bol mê gŏ mat añ.’ 4Dilah bèp ai oh lòt bal gen sồng bol hi mù hơ Ejiptơ nàng pơl kòi bèp in. 5Mơ dilah bèp ò ai khai mù gen bol hi ò bài mù ò, bơh cau hơ̆ neh đơs lah: ‘Dilah oh put ò mù gen rơp ò gơs tŭ lơi bol mê gŏ mat añ.’” 6Israel đơs lah: “Ñchi bơh tài bol mê neh lơh iơh di añ, mơ yal cau hơ̆ in git lah bol mê gơs dô nă oh tai taih?” 7Bol khai ho lah: “Cau hơ̆ lùp nền bơh bol hi mơ hìu nhă bol hi lah: ‘Bèp bol mê gam kis sơl? Bol mê gam gơs dô nă oh tai sơl?’ Bol hi neh ho ală sèng lùp hơ̆. Mbe bol he git khai rơp sồr hi lah: ‘Cèng tĕ oh put hơ do’ taih?”
8Juda đơs mơ Israel bèp khai lah: “Ai tĕ oh klau hơ̆ lòt bal mơ añ gen bol hi rơp ñă lòt tồ bol hi in, bèp mơ ală kòn hi in kis mơ ò chơt. 9Añ rơp leng gàr oh añ, bèp kư̆ lùp oh bơh di añ. Dilah añ ò lam oh rê, ò ơn oh di đap bèp gen añ do rơp gơkòl glài mơ bèp sùm sùm kòp rài. 10Mơ tai, dilah bol hi ò òbat nyà, gen bol hi neh lòt mơ rê bàr dơ̆ wơl rau.” 11Chòp Israel, bèp bol khai đơs lah: “Dilah bơta neh behơ̆, gen bol hi pal lơh be do: cèng tĕ tòm ală rơnđò ală phan màng rlau jơh lơgar dê, dô êt sơnơm mơ dô êt dà lơwe, ală phan tĕ biap mơ cài trŭ, gar pistachio, mơ plai gus nàng lơh phan ơn khai in. 12Cèng tĕ priă lin bàr dơ̆ mơ hơ̆ tai, mơ tơm wơl priă mơ bol khai neh ơn dê bơr rơnđò bol mê dê, digơlan hơ̆ la dô bơta hŭi tìs. 13Bol mê ñă lòt tĕ, lam oh put mơ mù tus hơ cau hơ̆. 14Hòi dan Yàng Tom Trồ Gơnap Gơnoar Làm Jơh ai bơta nđàc bol mê in di đap khai, mơ toh Simeôn mơ Benjamin bol mê in. Mơ đah mơ añ, dilah roh kòn, gen añ pal kong behơ̆.”
Jôsep wă rò sơrmah sơrmài oh khai la Benjamin
15Behơ̆, ală oh mi cèng phan ơn mơ priă lin bàr dơ̆ mơ hơ̆ tai, mơ lam Benjamin mù hơ Ejiptơ mơ ntào di đap Jôsep.
16Dơ̆ Jôsep gŏ gơs Benjamin bal mơ bol hơ̆ gen sồr cau gơnoar at bồ hìu khai lah: “Lam ală bol do mut tòm hìu, kup phan lơh poac mơ yò sào, bơh bol khai rơp sào mơ añ tòm gùl ngai do.” 17Cau gơnoar at bồ hìu lơh jat be jơnau Jôsep neh sồr, khai lam bol hơ̆ mut tòm hìu Jôsep. 18Bol khai rngòt ngan tài bơh cau lam bol khai tòm hìu Jôsep, gen bol khai đơs bal lah: “Hơ̆ la bơh jền priă neh dap wơl tòm rơnđò bol he dê dơ̆ lài òr, gen tàng bol khai lam he hơ tiah do, nàng jòi bơta tồ pù lơh bol he, kup bol he lơh gơs dĭ, mơ kup ală alàng bol he dê.”
19Gen ală oh mi tus rềp mơ cau gơnoar at bồ hìu Jôsep dê mơ tòmbơhbơr mơ khai di bơr mpồng, mơ lah: 20“Dan să mơ ồng! Bol hi neh dô dơ̆ rau tus hơ do nàng pơl kòi; 21mơ tŭ hi rê wơl tus di klàm rlô, hồ ală rơnđò do, khà priă kòp nă gam wơl dê bơr rơnđò hi dê, kơnjơ̆ kàr lơi gam wơl kàr hơ̆. Do, bol hi cèng wơl khà priă hơ̆. 22Mơ bol hi kung cèng bơtơl priă tai nàng pơl kòi. Bol hi ò git cau lơi neh ơn wơl priă tòm rơnđò hi dê.” 23Cau gơnoar at bồ hìu đơs lah: “Dan bơta ring lơngai ơm bal mơ oh mi! Bañ rngòt, hơ̆ la Yàng Tom Trồ ală oh mi dê, Yàng Tom Trồ bèp ală oh mi dê neh ai phan màng tòm ală rơnđò, ai priă ală bol mê dê neh jào añ in rau.” Gen, khai lam Simeôn tus hơ oh mi khai dê. 24Lồc behơ̆, khai rò oh mi mut tòm hìu Jôsep, cèng dà rào jơng bol khai in, mơ kung ai ală alàng sa ñhơt sơl. 25Gen ală oh mi rơndap phan ơn, gơn Jôsep rê gùl ngai, bơh bol khai git lah he rơp sào ngai tềng do.
26Tòm tŭ Jôsep tus, gen ală oh mi ai phan he neh cèng nàng ơn Jôsep in, lồc behơ̆, bol khai tơmbic să di đap Jôsep. 27Gen Jôsep lùp oh mi mbe gơlơh niam să sơl, mơ đơs lah: “Bèp kra mơ ală bol mê neh yal mơ añ hơ̆ gam niam să sơl? Khai gam kis sơl?” 28Oh mi ho lah: “Dĭ gơna kơnràñ dê la bèp bol hi gam niam să sùm mơ gam kis.” Gen oh mi kun bồ mơ khoai. 29Jôsep pò mat gŏ Benjamin oh tòm, kòn klau mè khai dê, gen khai lùp lah: “Hơ̆ la oh put mơ ală bol mê neh yal añ in ngan sơl?” Mơ đơs tơn lah: “Ơ oh put, dan Yàng Tom Trồ ai bơta nđàc mê in!” 30Bơh khai gŏ oh khai gen tàng Jôsep gơs nùs rngoh rngac, sơrbac sơrbang lik di tiah, jòi tiah nàng ñìm. Khai mut tòm ơdŭ dơlam mơ ñìm. 31Gen Jôsep lik tuh mat, lơh be ò gơs chi lơi mơ sồr yò sào.
32Cau yò Jôsep in sa is mơ ai ală oh mi in sa is. Ală cau Ejiptơ òs sa bal mơ khai kung sa is sơl. Tài bơh cau Ejiptơ ai lơh ngkòr ngkàc di cau Hebrơ, gen tàng bol khai ò sào bal. 33Behơ̆ ală oh mi nggui di đap Jôsep, dờng dềt pơnjat tap sèng bol khai dê, bol khai ai lơh krơi mơ rmê bal. 34Jôsep sồr cèng ală phan sa bơh di đap khai ai ală oh mi in, mơya pơnah đah Benjamin gen pram dơ̆ rlau mơ phan ală cau ndai dê. Bol khai ñô sa bơkah bơnga mơ chò hòp bal mơ Jôsep.