MATHAI 18
18
Lianpen hihna diktak
(Mrk. 9.33-37; Luk. 9.46-48)
1Huahun laitak in nungjuite Jesu kiangah a hungpai ua, “Van gam ah kua alianpen dia?” achi ua. #Luk. 22.24.
2Tuachi`n Jesu`n naupang neu khat a kiangah asam a, alak uah adingsak a, 3“Adiktak in kung hilh ahi, na kikhel ua naupang neunou nungbak kei uleh, van gam ah na lut ngaikei ding uhi. #Mrk. 10.15; Luk. 18.17. 4Tuajiakin kuapeuh hih naupang neunou banga ki ngaingiam, huami van gam ah alianpen ahi ding hi. 5Kuapeuh ka min jiak a hichibang naupang neu khat kipahpih in keimah hung kipahpih ahi ding hi.
Khialsakthei khemnate
(Mrk. 9.42-48; Luk. 17.1,2)
6“Hinanleh kuapeuh kei hung gingta mineute lak a khat khialhna puksak pen, a ngawng ah buhgawina suang lianpi awhsak in tuipi thuktak sung ah kikhialeh amah a dingin ahoihjaw ding. 7Puknate jiakin leitung tung agik hi! Puknate pen ahung om ding mawng ahi a, hinanleh pukna omsakpa tung agik hi!
8“Tualeh na khut in hiam, na keng in hiam khialhna a ahung puksakleh, tan inla paimang in! Khut nih hiam keng nih hiam nei a tangtawn meidil a paih a na om sangin, piangsual a, ahihkeileh kengbaiin hiam hinna a lut nang a ding in ahoihjaw hi. #Mat. 5.30. 9“Tualeh na mit in khialhna a ahung puksakleh kheikhia inla paimang in, mit langnih nei a gawtmun a lut sangin mit langkhat neia hinna a lut nang a ding in ahoihjaw hi. #Mat. 5.29.
Belam mang gentehna thu
(Luk. 15.3-7)
10“Hih mineute lak a khat zong simmoh lou dingin pilvang un, ajiak a vantungmite un van a om ka Pa mel amu gige uh chih kung hilh ahi. 11Mihing Tapa ahihleh mangthangte hundam ding a hungpai ahijaw hi.
12“Bang nachi ngaih ua? Mi khat in belam za nei henla, alak ua khat vakmang taleh, sawmkua leh kuate nusia in, mual ah paiin, a vakmang pen vazong lou ding maw? #Luk. 19.10. 13Adiktak in kung hilh ahi, va mukikta henla hileh sawmkua leh kuate tungah sangin, tua belam tungah a kipakjaw ding hi. 14Tuachimah bangin hih mineute lak a khat zong amanthat ding na Pa uh van a om deihlam ahikei hi.
Sanggamte khialhna thu a houlimna
15“Tualeh na sanggampa`n na tung a sil a bawlkhialh leh nougel guak theih in a khialhna ah hilh in, nathu angaihleh na sanggam na zou ahi. #Luk. 17.3. 16Hinanleh na thu angaih nuam keileh, ‘theihpihtu mi nih hiam thum hiam kam a hihkip a aomtheihna dingin, mi khat hiam nih hiam tonpih in.’ #Deut. 19.15. 17Tuachi a amauhte thu angaihnuam kei laileh saptuamte kiang ah tun in. Hinanleh saptuam thu zong angaihnuam kei laileh amah pen nang a ding in lawki leh siahkhonmi bang in koih in. #18.17 lawki=Pasian awiloute chihna ahi.
18“Adiktak in kung hilh ahi, leitung a na hen uh khatpeuh, van ah hen ahi ding. Tualeh leitung a naphel jousiah uh van ah zong phel ahi ding hi. #Mat. 16.19; Jhn. 20.23.
19“Adiktak in kung hilh kik ahi: leitung a nalak ua mi nih asilnget lam ua a kithutuak uleh ka Pa van a om bawlsak in aom ding uhi. 20Mi nih hiam thum hiam ka min a akikhopna teng uah ka omjel hi,” achi hi.
Sila ngaihdamlouh thu a gentehna
21Tuachiang in Peter a hungpai a akiang ah, “Toupa, ka sanggam ka tung ah khialleh bangzahvei ahia ka ngaihdam ding? Sagihvei tanin ahi diam?” achi a. #Luk. 17.3,4.
22Jesu`n a kiang ah, “Sagihvei tan in kung chikei, Sagihvei mun sawmsagih tan in kung chijaw ahi. #Gen. 4.24. 23‘Tuajiakin van gam pen kumpipa kuahiam a silate kiang a dangka thu hihchian tum tawh kibang ahi.’ 24Ahihchian pat takin, mikhat talent sangsawm ba akiang ah ahung paipih ua. 25Hinanleh piak ding a neihlouh jiakin apu in amah tawh, a zi tawh a tate tawh tualeh aneih jousiah tawh juak a dit ding thu apia hi. 26Tuachi`n silapa`n khupbok in abia a, ‘Pu aw, ka tungah zahngai tadih inla, A un in kungdin ding!’ achi a. 27Tuachi`n tua silapa pu-in ahehpih mahmah a, a khahkhia a, a batteng a ngaihdamta hi.
28“Hinanleh hua silapa apawt a, asila hihpih lak a khat amah dangka zakhat ba avamu a. ‘Nabat hungpian!’ chi`n a ngawng ah amek a. 29Huachi`n asila hihpihpa`n akeng bulah khupbok in, ‘Ka tungah zahngai tadih lai in, aun in kungdin ding!’ chi`n angen ngutngut a. 30Hinanleh amah a utkei a; abat adit zoh masiah thong ah akhumta hi. 31Tuachi`n asila hihpihte`n asilbawl amuhtak un adah mahmah ua; tualeh hungpaiin asilbawl teng apu uh a hunghilhta uhi. 32Tuatakin apu un amah asam a, a kiang ah, ‘Aw sila giloupa! Nung nget ngutngut jiak a na batteng hung ngaihdam ing a. 33Ken nang kung hehpih bang a, nangzong na sila hihpihte na hehpih sawm ding hilou maw,’ achi a. 34Tuachi`n apu ahehta a, a batteng apiakzoh masiah migawtte kiangah apiata hi.”
35“Michih in na lunggiltak ua na sanggamte uh tatkhialhna na ngaihdam kei uleh, ka Pa van a om in zong tuachimah bang in natung uah abawl ding,” achi hi.
Currently Selected:
MATHAI 18: THKHBSI
Označeno
Share
Copy
Want to have your highlights saved across all your devices? Sign up or sign in
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.