MARKIN 1
1
Baptispu Johon Manchuna
(Mt 3.1-12; Lk 3.1-18; Jn 1.19-28)
1Pathian Sapa Isua Krista thangahui ei hong tung anphutna chu. 2Deari Isai a lekhana, “Enta, ‘Ka palai na matona ka tira aman na lam sin inti.’ #Mal 3.1 3Philchar rama min khek he han, ‘Puma lamlian sin u tan alam ngai manzik u ro,’ ” atina anziak ang han. #Isa 40.3 (LXX)
4Johon Philchara Baptispu han asia andualna rang anrimna Baptisma rui rila a honga suak. 5Hatuka Judai ram le Jerusalem khuana mi ngai dora asuak u na, a kom ase na ei siat u ngai andualna zonga Jordon dunga han a kom Baptisma achang u.
6Hatuka Johon ha makingkang mul puan le anthuama, a kong me vun le akhita, a bu chu khairakuak le ram khuaining ei sak. #2 Rng 1.8 7Hatuka ei ti, “Ka nuka koi ka neka alian bet a hong lai tak keng, anbu lapa a kekok ri sutrua ngal ni makung. 8Koi chu ti le baptisma ka na pek u chachaka aman chu Ratha Anthiang le baptisma na pe unti,” tina arila.
Isua Themna le Baptisma
(Mt 3.13—4.11; Lk 3.21-22; 4.1-13)
9Hatuka hava nikhua ngai han hintin hin ei ni. Isua ha Galili ram Nazaret khua ata a honga Jordon dunga han Johona kom baptisma a honga chang. 10Havalai tak han ti ata asuak phing le anvan anphela, Ratha vasu anga ama chunga ahonga chum amu. 11Hatuka, “Nang ka naipasal madit khit nanga hin ka rai ei san,” atina anvan ata he a honga suak. #Anp 22.2; Sam 2.7; Isa 42.1; Mt 3.17; 12.18; Mk 9.7; Lk 3.22
12Hatuka Ratha han ama chu philchara atir lena. 13Hatuka chu Soitan anthem chunga philchara han ni sommanli ramsa ngai bila a oma, vanpalai ngaiin a haso adom u.
Puma Isua Sin Phut
(Mt 4.12-22; Lk 4.14-15; 5.1-11)
14Hatuka Johon ansur suana Isuan Pathian thangahui rila Galili rama a hong, Pathian thangahui rila ei ti, 15“Ahun akip zei Pathian ram um a honga nai zei anrim u tan thangahui hi iam u ro,” ati tira. #Mt 3.2
16Hatuka Galili tindil kola ase tira, Simon le Simon a parual Andria chu tindila han len a denga amu na nga sur mi ei ni u. 17Hatuka Isuan akom u na, “Na zi u ro, mi sura na sin u ka ti,” ati. 18Hatuka len amaka azi len u.
19Hatuka la rei luia ase u le Jebedi a naipasal Jakob le a parual Johon chu amu na, hangai ha len asin thei ngai rakuang dena ei om u. 20Hatuka aman hangai ha a kui lena, hantin han a pa u Jebedi chu anlo ei ruai ngai koma han rakuanga amak u na azi u.
Mi Rathasia Don
(Lk 4.31-37)
21Hatuka Kapernaum khuana ava lut u na, hanke pongansani han ankhomna ina aluta a manchu. 22Achong manchu ngai chu achang a mandong tham u na, Lekhanziakpu ngai ang ni lui ariat athei khit anga hangai ha ei manchu sika han. #Mt 7.28-29
23Hatuka ei ankhom u na ina han kachai ratha annim avong mi angkhat aleia om. 24Ama han “Nazaret Isua, koini le nang imo nei anzomna anan siat ranga hongmo na ni? Nang hi ka na riat Pathian mi Anthiang na ni,” tia ankheka asuak len.
25Hatuka Isuan angona, “Dairek ro, a sung ata hong suak ro,” ati.
26Hatuka kachai annim han ama asuisaka, anring sabaka ankheka a sung ata a honga suak. 27Hatuka alom u na amu ngai doran achang a mandong sabak u hantin han, “Hiva hi imo ei ni hi? Anchuna thar ke hi le, kachai ratha animin um arang sabaka chong apeka a chong a tel kiar hile,” tia ankhal u na.
28Hatuka Galili ram kola ramtina arui anthang len.
Isuan Mitampa Amandam
(Mt 8.14-17; Lk 4.38-41)
29Hatuka ankhomna in ata asuak u na, Jakob le Johon abila Simon le Andria ina ava lut u. 30Hatuka Simon a nungak a nu raitun atong ana aleia zala, hava len han arui ha Isua kom aril len u. 31Hatuka aman a kut ava sura a mathuia, hantin han ei tun chu a mathana a dorbo adom len.
32Hatuka khului tiang ani alut suana, dam lui dora le ramhuai ei sur ngai a kom ei hong ruai u. 33Khomi dora makot kola han a hong anchun lup u. 34Hatuka mi tampa ana tina ana ngai ha a mandam. Kachai atampa anota, kachai ngaiin ama he ei riat u sika chong ngam u mak.
Galilia Isua Chong Ril
(Lk 4.42-44)
35Hatuka zing khua var man anthuia a suaka, philchar muna asena hava muna bor ava zong. 36Hatuka Simon le a lom ngaiin um anuk azi u. 37Hatuka ama ava mu u lehan a kom, “Mi doran ana rok sole,” ati u na. 38Hatuka aman a kom u na, “Mun ateia khua naia han se u rei, sovan um chong kei ril theina rang hava ha kei hong suakna sik ei ni,” ati.
39Hantin han chong arila kachai ngai a not tira, Galili ram dora ei anchun u na in tin a lut tira. #Mt 4.23; 9.35
Isuan Mi Mandam
(Mt 8.1-4; Lk 5.12-16)
40Hatuka a kom aphar khat a honga, “Na zot ten nana manthiang thei,” atia a makunga anboka a zong chian.
41Hatuka ama han lungkham alei mu sabaka a ban a sura, “Ka zot anthiang ta ro,” ati pe. 42Hantin han anlaiseka ei phar ha ahek lena anthiang len. 43Hatuka Isuan tute kom ite ril lui ranga anreng ro, ati. 44“Tenchu chaizung kom van en tan la, anthiangna ranga Mosi chongpek anga van dar ro ei riat thei u na ranga, ati pena aman se len.” #Lev 14.1-32
45Hanum nisela ama chu asuaka hava rui ha achalaka ankheka tang ahaia, a sintho hantin han anlanga. Isua ha khua lut thei lai maka Philchar rama ke ei om ani zei muntina mi a kom ke ei hong u.
Currently Selected:
MARKIN 1: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.