MATHAIIN 18
18
Vanrama Tumo Alian
(Mk 9.33-37; Lk 9.46-48)
1Hataka han zolai ngai Isua kom ahonga aril u, “Hanle vanrama tumo alian?” ati u. #Lk 22.24
2Aman naipangte khat a kom a paia hangai bila a manding, 3“Ataka kei na ti ni u zei nan thul u noka naipang anga na ni u nokten vanrama lut thak thei u no ta ni. #Mk 10.15; Lk 18.17 4Hasik han aninga hi naipangte anga annuai ha ama ha vanrama alian. 5Hatuka hiva anga naipang khat ka raminga apom tak chu koi ana pom ke.” ati na.
Asia Tho rang Anthemna
(Mk 9.42-48; Lk 17.1-2)
6“Tenchu ana iam tete ngai a malung ansiata angkhat ngal anba tak chu a ringa arikpa athunga tipuia anthuka anning a rang asa pe ual. 7Achulna ei hong suak sika ramual chung aping asik chu achulna ei la suak nget rang.Tenchu achung aping ha mi achulna ansuak ha.
8“Hatuka na kut mo na ken mo ana manba ten hava ha tan tan la pei ro kuta anni mo ke anni le mo taituan moia achul nek ten akhora ngala mo damna na lut na rang asa. #Mt 5.30 9Hatuka na mitin ana manba ten hava ha kela pei ro mit anni a Moisumpuia achul nek ten mit khata damna na lut rang asa ual. #Mt 5.29
Bera Anpei Ankhina
(Lk 15.3-7)
10“Enro, hi asinte ngai bila angkhat ngal dem no ro asik chu kei na ti ni u zei amani vanpalai ngai vana ka Pa matona a om chian u ke. 11Miring Sapa anpei ngai andam ranga ahong ke.
12“Imo na mandon u, mi khatin bera raza khat adona hava bila angkhat anpeia somakua akua maka muala sena ha bera anpei ha arok mak mo? 13Hatuka aman ving ten ataka kei na ti ni u zei ha somakua akua anpei lui hava ngai neka hava sika aman aliaka arai a mansan. 14Hava anga han asin ngai bila angkhat ngal ei siat rang vana na Pa un zot mak.
Min Asia Thoten
15“Hatuka na parualin na kom a masialten se ro nang le ama le na om u tik hatik han ha a masial manthei ro na chong a rangai ten na parual nei man ani zei. #Lk 17.3 16Tenchu a rangai nok ten hanuk angkhat anni mi tuang tan se ro.Hanke anni anthum ariat mura chong dora ei chatna rang. #Dan 19.15
17“Hatuka hangai chong atel nok ten kuibing ril ro hatuka kuibing chong atel nok ten na makunga Jentail mi le lei ansuang ngai le anrual rase.
Anphal Anphal Nok
18“Ataka kei na ril ani u zei nangnin phil chunga nei khar u tak ha vana ankhar inti hatuka phil chunga nei malong u tak ha vana anlong inti. #Mt 16.19; Jn 20.23 19“Ataka kei na ti ret ani u zei phila nangni annin nei zong u tak pei ha hava ruia malung khata na ni u ten, ka Pa vana mi kom ata hangai ranga hava ha antho inti. 20Asik chu anni anthum ka raminga munkhata ei om u na taka amani bila ka om.”
Andualna Ruia
21Hava han Pitor akom a honga, “Puma ka parualin voi itukmo ei masial ha kei madual rang. Voi sari tenpei mo?” ati. #Lk 17.3-4
22Isuan akom, “Voi sari na ti making tenchu voi somsari mun sari tenpei,” ati. #Anp 4.24 23Hasik han vanram hi reng khat le na mankhi thei, a suak ngai kom hisap alak rang ei zot. 24Aman hisap aphut le mi khat akom a hong tuanga ama ha talen a sang som ei antang. 25Tenchu ei thuan thei nok sika a puma pan a nungak a sanai a zuar zita athuan ranga chong ei pek. 26Hava han ha suak ha a ke kunga anboka a moka, “O puma, na maruang tot ro na thuan zit ka ti,” ati. 27Hava han ha suak a puma han lungkham a muna ama ha a mazoka ei antang a madual.
28“Tenchu ha suak ha tualpanga asena ama asuak chang pui angkhat anmu puia, ama ha siki razakhat ei mantang hava ha a sura a to-ok a dena. ‘Nei antang dora na thuan zit ro!’ ati pe. 29Hava ha ama asuak chang pui han ama ke kunga anboka anthem chunga, ‘Na maruang tot ro nei na mantang na thuan zit ka ti!’ ati. 30Hanum nuam pe maka ama ha lungina ava khum ei antang athuan sua nok maseng pei. 31Hava rui ha asuak chang pui u ngaiin amu u na achan a malung ei manna u hatuka a puma u kom ase u na hava ngai ei va ril zit u. 32Hanke a puma pan ama ha ava manpaia ei ti, ‘Suak salui nangin ka kom nei na lop sika nei antang ngai dora kei na madual. 33Hontinmo na chunga lungkham kei na mu hantin anga han na suak chang pui lungkham amu hi nang mak che mo?’ ati. 34Hatuka a pumapa atak asina mi zem ngai kom a peka ei antang athuan sua nok maseng pei. 35“Vana ka Pa nin um nangni ranga hantin han tho inti na unai ngai na malung taka na parual na madual u nok ten,” Isuan ati na.
Currently Selected:
MATHAIIN 18: RANGBSI
Označeno
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.