Pi zi tiki 38
38
Yuda gaiɗi Tamar
1Amma war mefeŋ ni ɗa, Yuda a halasi siɗi tawalakaini par ahani ɗif ktai na Adullam yikini Hirra. 2Woni Yuda a tiliti ahini ɗif na Kananiya na yikini ɓa: Suwa. A tikitisi aŋ muni a fana gaiɗi. 3Te tika fel, te waa ahi ktai, a sini yikini ɓa: Er. 4Te tika fel zamai pra, te wa ahi ktai, te sini yikini ɓa: Onan. 5Asakal, azi ktai pra, te wa ahi te sini yiki ɓa: Sela. Yuda a nasi fu a Kezib, won hlai na te poko Sela. 6A tikitini muni wiini ahini n'avut na Er, muni na yikiɗi ɓa: Tamar. 7Er a ahini Yuda n'avut, a za meefeŋ arni EPIƊ-ƊAI, EPIƊ-ƊAI a fuɗaŋ edi. 8Nɵa Yuda a miɗini wiini Onan: Hala siɗi munini tawalku, yimiti suku maini tawalni mofaɗi nɵa, zini seyem wiini tawalku n'a mra. 9Onan a sɗa ɓa ali n'a wiiɗi li ɗa e ɗi wiini kai, won hlai n'a fana gaiɗi munini tawalni a hina sini a ka azumai kadai kapai a za seyem wiini tawalni kai. 10Wala n'a zaŋ ɵa ɗa a firiya agulni EPIƊ-ƊAI kai, EPIƊ-ƊAI a fuɗa ni edi lai. 11Yuda a miɗiɗi wiiɗi Tamar na munini ahini: Sumna warni greŋ ahani apuku, haa ahiya na Sela a za abai haw, buri a hiina ɓa kapai ahi hanɗa lai a mra maiɗi tawalakaini nɵa kai. Tamar te hala te sumna ahani epiɗi.
12Mefeŋ a za yaw ahini Suwa na munini Yuda te mra. Won hlai na tuwiɗi a vada li, Yuda a hala amai a Timna gaini marmaini na Hirra na Dullam par, ahaɗi ɗai zi ɗûkûli ayirni adumaini na war farani. 13Ɗai e miɗiɗi wiiɗi Tamar maini nɵa: Tala suwulku a na hala amai a Timna aŋ ɗukla ayirni adumai edi, 14te mula sapaɗi zi groho edi, te faaɗa siɗi gaini alfai, te bunda ɗif a siɗiti kai, te sumna mini magalani fuŋ n'abai na Enayim n'a na warɗi futi na Timna. Buri nɵa te sɗa ya ɓa Sela a za abai ya, amma te sa sini aŋ munini kai.
15Yuda a tiliti, a yimiti aŋ muni zi zawar, buri te bara wala arɗi bar, 16A ɵiɓa kona siɗi ɗaw a miɗiɗi: He! mu halasi aŋ piyuku, buri a siɗiti ɓa te munini ahini nɵa kai. Te waya seŋ te muɗa: Kapai ku fana gaya ɗa, wala na ku saŋa ɗa a maɗa? 17A muɗa, aga mu ɵunukusi ahi hek n'a na war faraŋa par ktai. Te muɗa: A siɗa aŋ za, na ɓa ku zagaŋa li wala ktai jak haa sini ɵeŋni hek hanɗa. 18A muɗa: N'aga mu zukuku ɗa a maɗa? Te waya seŋ: Tampon na wiini yikuku, samya na pini gaiɗi amaraŋai na t'aŋ tuku. A siŋɗi, a fana gaiɗi, a yimiɗi fel. 19Te faka amai te hala, te mula alfai na siɗi edi, te mula sapaɗi zi groho siɗi.
20Yuda a ɵina ahini hek tini marmaini na Dullam par, kapai a miliniɗi wazagai n'a zagaŋɗi edi tiɗi muni par lai. Marmaini a nivitisi kai. 21A zilbiɗi ɗai zi fuŋ na woni: Muni zi zawar na te na ka ɵimaɗi futi na Enayim t'aŋ wata ɗa? E wiyini seŋ: Zawar te na ka ahaɗi na duk kai. 22A wayasi sini Yuda a miɗini: Mu nivitisi kai, ɗai zi fuŋ maa e miɗi ɓa zawar te na fu ahaɗi duk kai. 23Yuda a muɗa: A seŋɗi kiiɗi! Zumu sumu aŋ yewere kai, ta na mu ɵiniɗi ahini hek kaalai, tuku na ku nivitisi kai ɗa kaalai! 24Amma tile hu asakal, e kinisi labar wiini Yuda ɓa: Tamar na munini ahiku te za maɵara, a ni ta kai, gaini maɵaraɗi te yima fel kaai. Yuda a muɗa: E yimitisi anene, e yiti edi. 25Won hlai n'e ɗa e yimitisi anene, te ɵina pini suwulɗi aŋ miɗini: Mu yima fel ɗa gaini epin-gezani wazagai hanɗa. Asakal par te muɗa: Tala haw! Tampon hanɗa gaini samiya gaiɗi amaraŋai ɗa a wiini asiya ɗa? 26Yuda a sɗaŋ a muɗa: Jre na wiiɗi a suwaŋa ta, buri mu sitini wiini ahiya na Sela kai. Amma a fana gaiɗi kir kai.
27Amma war mefeŋɗi zi pûkû e ɗi fu warɗi e ɗi teyek, 28War pûkûɗi Tamar, ktai arbaɗi teyekai a witisi tini edi, muni zi pûkû te yimiti, te rga sogom na mekele hirra siɗi te muɗa: Hanɗa a ni n'a niyasi edi avut. 29Asakal par a wiyiti tini amai: A niyasi edi a tawalni ɗa, te muɗa: Ku bula ɗa a baŋa na maɵa, e sini yiki ɓa Peres a dara a muɗa baŋa zi bili. 30Tawalni a niyasi asakal par, ni na gaini sogom na mekele hirra wulani tini, a sini yiki ɓa Zera.
Currently Selected:
Pi zi tiki 38: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964