Pi zi tiki 37
37
Weseŋ n'a pɵa Yosef
1Yakob a sumna midini afti na Kanaan won hlai na epini a halasi a sumna warni aŋ jak. 2Labar na midiɗi alini Yakob a na maini nɵa:
Yosef, won hlai n'a za buza doogo pi muguzak li, a giɗima adumai gaini haakai gaiɗi tawalakaini.
Yosef a arwagwi n'a paya gaiɗi aliɗi Bilha gaiɗi Zilpa na falakaini epini. Yosef a kasi labar na meefeŋ na ɗai e miɗiŋ midiɗi paŋ wiini epini. 3Izrayel a firiya Yosef a sûwiɗi tawalakaini na zamai ɗa paŋ, buri a navaŋ war welni, a ɓilini sapai na juvi gara zi pai wulani. 4Tawalakaini paŋ e siɗi ɓa a firiyaŋ a sûwiɗi nagai paŋ; e rgi warɗi miɗini, e kiɗi aŋ miɗini war wule zi diri kir kai.
5Yosef, weseŋ a pɵaŋ. A virniŋɗi wiiɗi tawalakaini, e bili gaw sini a suwa pra. 6A miɗiɗi: Ziɓiri weseŋ n'a pɵaŋa: 7Mu ɗumu fu edi war vowai aŋ rgumu algama, won hlai hanɗa, vidi na wiya te ɗiya amai zaw, te hina amai zaw. Vidi na wiiki a gûniti azumai, a hurga azumai wuzaɗi. 8Tawalakaini e wiyini seŋ: Ku dara ku ŋa midiyi aŋ pai ɗi? Zaw ku ŋa midiyi aŋ n'epingezayi ɗi. E bili gaw sini a suwa pra burini weseŋ zi pɵi gaini seŋni zi miɗi ɗa.
9Yosef, weseŋ a pɵaŋ pra, a virniŋɗi wiiɗi tawalakaini, a miɗiɗi: Tili weseŋ a pɵaŋa maini nɵa pra, futi, tile gaini meeɵek doogo pi ktai lai a hurga azumai wuza. 10A virniŋni wiini epini gaiɗi tawalakaini; epini a ɓaraŋ a miɗini: Weseŋ n'a puɵuku hanɗa a weseŋ na maɵa ɗa! Ta gaiɗi amuku gaiɗi tawalakaiku aga mi hilisi mi hûrgû azumai wuzaku kiɗi ɗi? 11Tawalakaini e zi sile sini, amma epini a giɗima seŋ hanɗa warni.
Wûrini n'edi gaini yimini n'edi arbaɗi par
12Tawalakaini e hili a Sikem aŋ giɗimi farai na wiini epiɗi. 13Nɵa epiɗi a miɗini wiini Yosef: Tawalakaiku e ɗi na edi war hlai zi simi farai na Sikem tiɓ ɗi? Halasi mu ɵunuku piɗi. A waya seŋ: M'an na. 14A miɗini: Hala tiliɗisi tawalakaiku ɗa gaini farai ɗa lai e ɗa maɵa ɗa, kapai ku kaŋasi labar. A ɵinaŋɗi war Huduk na Hebron par, Yosef a co a Sikem.
15Ɗif ktai a navaŋ aŋ giliŋa blaŋ edi war basga a zilbaŋ: Ku paya ɗa a maɗa? 16A waya seŋ a muɗa: Mu piyiɗi e ɗi tawalakaya. Siŋkaŋa hlai n'e simi faraiɗi woni ta kai ɗi. 17Ɗif a wiyini seŋ: E jûgûɗi won na par zok, buri mu ɵina miɗi e ɗa miɗi ɓa: Hulumu a Dotan. Yosef a tika futi piɗi tawalakaini, a niviɗi a Dotan. 18E tiliŋɗi edi gaigai par, wuzani hlai n'a cosi gobi gaiɗi, e rgi miɗi buri e fiɗiŋ edi. 19E miɗi arbaɗi marɗi: Tili epini weseŋ zi pɵi a na halasi. 20Daaba kiɗi, mu fuɗuŋmu edi, mu buluŋmu warɗi kiliŋi ktai su. Mu muɗumu ɓa: Wala na buza na tuwur a lumaŋ ta, kapai mu tulumu sdani weseŋ zi pɵi n'aga a za ɗa.
21Ruben a ɵina hanɗa a firiya a kurɗaŋ tiɗi par, a muɗa: Mu fuɗuŋmu kai.
22Kapai a sɗa aŋ koraŋ edi tiɗi par, aŋ wayaŋ aha sini epini lai, Ruben a miɗiɗi: Ki mi fel edi kai, biliŋ warɗi kiliŋi na te na edi war basga hanɗa su, ki fiɗiŋ kai.
23Amma won hlai na Yosef a cosi amai siɗi, e yimiŋ, e wuti sapai na sini edi, sapai na juvi gara zi pai na te na fu sini, 24e biliŋ azumai warɗi kiliŋi, kiliŋi na ɗa te na fu kadai yem warɗi kai. 25Asakal par e simni azumai aŋ simi.
Won hlai na e yimi arɗi amai, e tili vok na wiiɗi ɗai zi cakala e hilisi a Galaad par duɓani ɵiginiɗi, e sikilisi sugoy zi ɗûgûdi zi lûgûzi, gaini fiyawni luwaŋai n'e zûûli ɗai gaini n'e girdiŋ sini kopoŋ kapai a hofa kai ɗa lai, aŋ kiŋ aha warɗi Egipte. 26Yuda a miɗiɗi wiiɗi tawalakaini: Na ɓa mu fuɗumu tawalmu edi, mu ŋuyumu felni lai, dermu na woni ɗa a ma ɗa? 27Hulumu, mu wuruŋmu edi tiɗi Ismayelitekai, mu zunumu wala na meefeŋ kai, buri ɓa tawalmu a neŋ sumu. Tawalakaini e ɵini mini.
28Ɗai zi cakala na Madianitekai n'e ɗa vii won na ɗaw e yimisi Yosef amai warɗi kiliŋi par, e wûriŋ edi tiɗi Ismayelitekai arzaŋ Sikel caaɓa, nagai e hili gaini aha war Egipte. 29Won hlai na Ruben a wayasi miɗi kiliŋi, a navasi Yosef warɗi kai. A ŋirwa sapa na sini edi. 30A wayasi siɗi tawalakaini a muɗa: Arwagwi ɗa aŋ kai! Ta kapai mu za maɵa ɗa?
31E militi sapaini Yosef, won hlai n'e fiɗi hek li, e zibiti arni fel ɗa, 32e siktitini sapai na juvi wiini epiɗi e miɗi: Tiyi mi niviti edi na puk, tiliti haw, te wiini ahiku tiɓ zaw, te na kai ɗi. 33A siɗiti ɓa te na, a ɗuula a muɗa: Te sapaini ahiya ɗa, wala na buza na tuwur a fuɗaŋ su, a lumaŋ ta! 34Yakob a ŋiruwa sapa na sini edi, a rga sapa warni, a za groho na wiini ahini mefeŋ viya. 35Won hlai n'alini na maɵagai gaiɗi na falakai e hilisi buri e sini arai zi pi, a dara a yima arai zi pi kai. A muɗa: Aga mu niya azumai pini ahiya, war hlaiɗi ɗai zi mri gaini tuwi ɵa; Yakob a hina pini tuwi ɵa. 36Madianitekai e wûriŋ aha war Egipte tini Potifar, abaiɗi askarai zi gɗam na wiini pai, ɗif na kɓur na wiini Faraw.
Currently Selected:
Pi zi tiki 37: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964