Pi zi tiki 29
29
Yakob a nava gaiɗi Rakel
1Yakob a faka aŋ hili, a hala midini afti na piɗi futi na dawai par, 2Mefeŋ ktai a niviti kiliŋi edi war basga tiɓ, farani adumai gaini haakai ɵimaɗi gaini pi tiɓ tiɓ hu, buri e sini yem warɗi kiliŋi hanɗa par. Miɗi kiliŋi aŋ gaini dûgû gaiɗi fukuni n'amai duk. 3Won hlai na farani farai ɗa a tapasi li woni, ɗai e likititi fukuni n'amai ɗa edi miɗi kiliŋi par, e sini yem wiini adumai, asakal par e wiyiti fukuni miɗi kiliŋi ta.
4Yakob a zilbiɗi ɗai zi giɗimi: Tawalakaya ki ɗi na wata par ɗa? E wiyini seŋ: Tiyi mi ɗi na Haraŋ par. 5A miɗiɗi: Ki siɗi Laban n'ahini Nakor ɗa ya ɗi? E wiyini seŋ: Mi siɗiŋ ya. 6A zilbiɗi: A na jam hekɗi, e wiyini seŋ a na jam kadai, tala ahini na Rakel ɗa maa te na halasi gaini adumai na wiini tuku na. 7A muɗa: Tili futi te na hai, a sarti na ki tipi adumai woni kai, sini yem wiini adumai asakal par ki wiyiŋ edi a suma kuzum pra. 8E wiyini seŋ: Mi kiɗi aŋ zi hanɗa kai, na ɓa farani adumai aga a diŋgasi paŋ kafa kai ɗa. Won hlai n'a diŋgasi li, mi likititi fukuni edi miɗi kiliŋi par, mi sini yem wiini adumai.
9Ni a na muɗa gaiɗi ɗai hai, Rakel te cosi gaini adumai na wiini epiɗi, buri na t'ahiyagoi zi giɗimi farai. 10Woni hlai na Yakob a tiliti Rakel ahini Laban na kinani, gaini adumai na wiini Laban na kinani, a halasi a likititi fukuni edi miɗi kiliŋi par, a sini yem wiini adumai na wiini Laban na kinini ɗa. 11Yakob a gûbiti Rakel, e yimi marɗi, a tuwa gaini wulani amai. 12Yakob a siŋka sini wiiɗi Rakel ɓa a zigelni epiɗi, a ahiɗi Rebeka, te lawa te ka seŋ hanɗa wiini epiɗi. 13Won hlai na Laban a ɵina labarni Yakob n'ahiɗi tawalni a lawa miɗi e yimi marɗi kiŋ kiŋ a kaŋsi ahani, Yakob a virnini seŋ na aza paŋ. 14Laban a miɗini: Tuku ku keɵkeŋa gaini neŋ-sa lai jre jre. Yakob a sumna gaini tile ɗaw.
Yakob a miliɗi alini Laban na sulu aŋ falakai
15Mefeŋ ktai, Laban a miɗini wiini Yakob: Aga ku zina pa kadai buri ɓa ku zigelŋa ɗi, muɗaŋa haw vrakku aga a za maɵa ta ɗa? 16Amma Laban a na fu gaiɗi ali na falakai sulu, n'amai yikiɗi Leya, na wulaɗi yikiɗi Rakel, 17Leya arɗi a wa juf kai, amma Rakel te wa juvi, ku dara ku bunda arku edi siɗi par kai. 18Yakob a diriti Rakel, a muɗa: Buriɗi Rakel n'ahiku n'agwi aga mu zuku sda buza muguzak. 19Laban a muɗa: Buriya ta ɗa, a pɗem ɓa mu sutuku a suwa na mu sitini wiini ɗif zamai, sumna gaya. 20Yakob a za sda buriɗi Rakel buza muguzak, a talaŋ arni aŋ mefeŋ n'agwi kadai buri a diriti gara. 21Nɵa Yakob a miɗini wiini Laban: Sitiŋa muniya ɗa, sartiŋa a va li, mu dara mu tikiti.
22Laban a tipiɗi ɗai na war fuŋ ni paŋ a ziti fet zi tiki n'amai. 23Hlai na futi te nawa li, Laban a yimiti ahini na Leya a kitini wiini Yakob, Yakob a yimiti sini. 24Laban a siti bagaini na Zilpa wiiɗi ahini aŋ bagaiɗi, 25Dawai par Yakob a bunda hiyak won hlai n'a tiliti te Leya, a miɗini wiini Laban: Na ku zaŋŋa hanɗa a maɗa, mu zuku sda buriɗi Rakel kaiɗi, ku duulaŋa buri maɗa? 26Laban a wiyini seŋ a muɗa: De na wiyi woni n'a na ɵa kai, ku siti ahi n'agwi wiini wus wuzaɗi tawalɗi n'amai ɗa kai. 27Vada draiɗi na kosko ɗaw vat, na ktai lai aga te sa suku pini sda zamai n'aga ku zaŋ ahaya burini buza muguzak pra. 28Yakob a za maini nɵa a vada draiɗi Leya na kosko ɗaw vat, Laban a sitini ahini na Rakel aŋ muni. 29Laban a sitiɗi bagaini na Bilha aŋ bagai wiiɗi ahini na Rakel. 30Yakob a tikiti Rakel, a diriti gara te sûwiti Leya, a za sda zamai wiini Laban buza muguzak pra.
Alini Yakob
31Won hlai n'EPIƊ-ƊAI a sɗa ɓa Leya ɗa e firiyiti kai ɗa a siɗi ali viya, Rakel te hina muɗaŋ kadai. 32Leya te tika fel te wa ahi ktai, te sini yiki ɓa: Ruben, buri te muɗa: EPIƊ-ƊAI a tala miisiŋa, tiyana mafa aga a daraŋa. 33Te tika fel katawai pra, te wa ahi ktai, te ɗuula te muɗa: Nkam, EPIƊ-ƊAI a sɗa ɓa e diriŋa kai, a saŋasi na hanɗa lai, te sini yiki ɓa: Simeyon. 34Te tika fel katawai pra te wa ahi ktai, te muɗa: Tiyana par mafa aga a naga sa ta buri mu wiini ali na maɵagai hu, buri hanɗa e sini yiki ɓa Levi. 35Te tika fel pra te wa ahi ktai, te ɗuula te muɗa: Tiyana zaw aga mu kola EPIƊ-ƊAI, buri te sini yiki ɓa Yuda, te ɗiya gaini wii lai.
Currently Selected:
Pi zi tiki 29: MUSGUM
Označeno
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964