1 Kolinita 2
2
Folo yana laumamala Keliso yana alika keloseya fa'ina.
1 #
1Ko 1:17
Siule tobohiyakweyao miKolinita, tuwaina omi agaimiya ga'ela be Yaubada yana venuwa'ata Keliso fa'ine gahawavemogatala ana toveya, keke laumamala nuwa'abi'abina amine o ka'i hifufu nuwanuwahuyana amine gadalukahihi, keke. 2Nuwahinagekuya gavehimeyeku higa vaita keke tamo gavana fa'ina gadanuwanuwa tu Yesu Keliso anakaibe gadalukahihiyena, higa yana alika keloseya fa'ina gadalulumamala. 3Fa'ina omi agaimiya ga'ela ana toveya keke yaku wafaiwala gada'ela, tu yaku wamatauta yaku wa'asehawahega ga'ela. 4#1Te 1:5Ada keke hifufu nuwa'abi'abina o ka'i gahe nuwanuwahuyana amine gadalulaumamala o gadavehavehawala keke. Alu'aluwa Mahalina gifaiwalaveleku be yaku laumamala gifaiwala-yo ase'asemi gi'onana. 5Alu'aluwa Mahalina yana faiwala againe galumamala be yami vetumagana keke tomiyababi yadi nuwahuya againe ginave'inuba, au Yaubada yana faiwala againe ginave'inuba.
Alu'aluwa Mahalina Yaubada yana nuwahuya giveleda.
6Atu gahe nuwanuwahuyana sa'eyana galulukahihiyena. Badi Yesu ana vetumagana againe hive'asevatu-ma agaidiya mena gahe nuwanuwahuyana galulukahihiyena. Gahe-nadi ma keke vaita tomiyababi tova hidevama himimiyami-ma yadi nuwahuya amine, o ka'i yadi tovehimeya yadi nuwahuya amine, keke. Fa'ina badi tovehimeyai-dina adi egana gihavahavaina. 7#Kl 1:26Gahe nuwanuwahuyana iya galulukahihiyena-ma Yaubada yana nuwahinage, higa yana nuwahuya nuwahinagene gidadauda amanadi. Mena yana nuwahuya ma sevasevauyana, ada kadu boi tuwai-mo'ena hida babi aimo keke gidabubuni ana toveya givevai be yana nuwahuya againe ide tovetumagana Bana amine kanakikaiwabu fa'ina. 8#Lu 23:34; Af 13:27Tomiyababi tova hidevama himimiyami-ma yadi tovehimeya hida Yaubada yana nuwahuya hifaniyena. Ka'i hidahalamanena digo, Tokaiwabu-mo'a keke kelose againe hidatutuvefoseni. 9#Ais 64:4Tu iya gavehavehawala Veyao Tuwaina ana buki gigahe amine gigayo,
Gavadi gavadi keke tamo hakwadi gida'itadi o ka'i gidanogalidi, gavadi gavadi keke tamo hakwadi tauna nuwane gidanuwenuwedi, medema gaitoma yamumudi Yaubada gikidewedewedi badi yadi nuwanuwa Bana againe hisena-ma fa'idiya.
10Hida gaitomai-dina sevasevauyadi tu Yaubada Alu'aluwana gi'iveninisena be ide tovetumagana agaideya gihawavemogataledi. Fa'ina Alu'aluwa Mahalina gaitoma moya'aina ana nuwanuwa gi'itahalamanena. E, kadu Yaubada Tauna yana nuwahinage gihalamane-'owona. 11Kaliva ma yana nuwahinage keke kadahalamaneni, au bana tauna alu'aluwana anakaibe gihalamanena. Meda anafaiweya Yaubada yana nuwahinage keke kadahalamaneni, au Yaubada Alu'aluwana anakaibe yana nuwahinage gihalamanena. 12#Yo 16:13Yaubada keke hida babi ana nuwanuwa gidaveleda. Tauna Alu'aluwana ide tovetumagana agaideya gi'iveninisena be yana nuwanuwa fa'ina ginakivetuvetunuda, ada Yaubada yana abavetala moya'aina ide agaideya kana'itahalamanena fa'ina. 13Ada au mena Yaubada yana nuwanuwa nuwanuwahuyana alulumamalena. Yama hifufu inubana keke kaliva yadi nuwahuya againe au Alu'aluwa Mahalina againe, ada Bana gikivetuvetunuma amine alulumamala. Hai kaliva nuwahinagediya Alu'aluwa Mahalina Tauna gimimiyami, medema Alu'aluwa Mahalina yana nuwanuwa fa'ina akivetuvetunudi.
14 #
1Ko 1:18
Tu hai kaliva nuwahinagene Alu'aluwa Mahalina Tauna keke gidamiyami, medema Yaubada Alu'aluwana yana nuwanuwa gikilowena, fa'ina mema vaita iyohoyoho amine bana matane. Gifaniyena fa'ina Alu'aluwa Mahalina anakaibe yana nuwanuwa anafaiweya ginavehawaleda be kana'itahalamanena. Ka'i Alu'aluwa Mahalina Tauna keke nuwahinagedeya gidamiyami kadu keke adafaiweya yana nuwanuwa kana'itahalamaneni. 15Hai kaliva nuwahinagene Alu'aluwa Mahalina Tauna gimimiyami, medema gaitoma moya'aina inubana fa'ina anafaiweya gina'itanuwanuwa, ka'i Yaubada againe o ka'i hida babi againe ma anafaiweya gina'itahalamanena. Atu bana kaliva nuwahinagene Alu'aluwa Mahalina Tauna keke gidamiyami, medema keke anafaiweya bana wa'Alu'aluwa Mahalina gina'itanuwenuweni au yana nuwanuwa gifaniyena. 16#Ais 40:13Mena itanuwanuwa keke anafata ma Veyao Tuwaina ana buki givehawaleda gigayo,
Hakwa'adi Kaiwabu nuwana gihalamaneni-yo anafaiweya ginakivetuvetununi? Keke tamo.
Tu ime'eyao ma Keliso nuwana gisevedamana agaimeya be Bana ginuwanuwa amine meda anafaiweya ime anuwanuwa. Fa'ina badi keke wa'Alu'aluwa Mahalina amine yo nuwama hidahalamaneni-yo adifaiweya hinakivetuvetunuma.
Trenutno izbrano:
1 Kolinita 2: viv
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2003, Wycliffe Bible Translators, Inc. All rights reserved.