1 Kolinita 3
3
Badi miKolinita yadi vetumagana keke gidatubuga.
1 #
Hi 5:12-13
Tobohiyakweyao, omi vaita we'owe'o amine, keke Yaubada wadahalamane-hagihagiyeni. Tuwaina buye kamiyami ana toveya keke akufaiweya kaliva nuwadi Alu'aluwa Mahalina againe hise-mo'ena ma amine agaimiya gadalaumamala. Au dibumi koyona ana nuwanuwa againe aimo wamiyami fa'ina, omi vaita we'owe'o yami vetumagana keke gidatubuga-ma galumamalemi. 2Huhu fwefweya hihuhuna-ma meda anafaiweya yaku laumamala omi agaimiya. Keke a'a o'olina lakahidiyao hi'au'ana-ma amine Yaubada yana nuwahinage yaku laumamala againe gadave'ami, fa'ina keke amifata. Kadu tova adamoya a'a o'olina keke amifata. 3Omi aimo babi ana nuwanuwa amine wahuluhuluva. Wa'itami, aimo wagaga'uma'uma kadu buye wavekwavekwageya fa'ina makewa'e babi ana nuwanuwa amine wahuluhuluva. E, badi Yaubada keke hidahalamaneni-ma amine wadedewadewa. 4Mena dewa sa'eyana ma tufoimi wagayo, “Iya Folo yana kaliva,” kadu tufoimi wagayo, “Iya Afolosi yana kaliva.” Hida huluvai-nadi badi Yaubada keke hidahalamaneni-ma yadi huluva amine.
Yaubada bonana ana tolaumamala vaita tofaha amine.
5Bana mena Afolosi vaita hakwa'adi? Iya Folo vaita hakwa'adi-yo fa'imeya wavekwavekwageya? Ime kaliva kabi'omeyao, ama egana tofaisewa ada gavaimi faisewa sa'eyana sa'eyana Kaiwabu givehimeyema, medede amine afifaisewa. Ime omi hinafamiya afaisewa fa'ina, Kaiwabu againe wavetumagana. 6#Af 18:4,11,27-28Wa'ita, yama faisewa vaita faha amine. Iya otova ase'asemiya gafahana, bana Afolosi yana kivetuvetunu againe faha gi'ita'itave'avina tu bana Yaubada anakaibe a'a gikivetubugina. 7Fa'ina bana otova ana tofaha kadu faha ana to'itave'avina badi keke kikaiwabudiyao. Bana Yaubada anakaibe kikaiwabuna fa'ina Bana a'a gikivetubugina. 8Bana otova ana tofaha kadu faha ana to'itave'avina yadi kaiwabu leleleya. Kaliva sa'eyana sa'eyana yadi faisewa amine Yaubada adi laufata ginaveledi. 9#Ef 2:20Meda ime ama'iselu Yaubada yana tofaisewa Bana buye afififaisewa. Vaita Yaubada yana faha omi'iyao. Kadu vaita Yaubada yana manuwa'iyogoyogona omi'iyao.
Yaubada bonana ana tovehawala vaita manuwa
ana to'aiyogona amine.
10Tu Yaubada yana manuwa'iyogoyogona fa'ina aku vehimeya giveleku be yana veluga againe omi yana manuwa ami aiyogona gavebutuna. Iya gamidilumamalemi higa vaita to'aiyogona halamanina amine manuwa ana ogola gakivemididina tu mali kaliva yadi vehawala againe lumalumana hiyogoyogona. Omi tovehawala wana'itave'avimi be vehawala vaita yowana o'olina againe manuwa wanayogo-hagihagiyena. 11#1Fi 2:6Bana mena holili'abi ma ahe gakivemididina higa Yesu Keliso au yami vetumagana luluna. Keke tamo hakwadi mali holili'abi anafaiweya ginakivemididini. Yaubada yana manuwa ana holili'abi au sa'eyanaga, higa Yesu Keliso. 12Badi Yaubada bonana ana tovehawala vaita manuwa ana to'aiyogona amine. Tufoidi yadi vehawala againe vaita kasikasi, tutuwana, kainumula againe manuwa hidayogoyogoni. Tufoidi ma vaita mulumulu, dikwadikwa, mobo againe hidayogoyogoni. 13#1Ko 4:5Aimo vedewayauga ana tova kaliva moya'aida yada faisewa gina'ivemogatalina be yamumuna o ka'i koyona amine moya'aidi hina'itana. Fa'ina vedewayauga ana toveya ai'ala'alata yada faisewa gina'alahiluvaluvana, ka'i o'olina o fwalelena amine kayogona. 14Hai kaliva yana vehawala tunutunugina ma ai'ala'alata mena yana iyogoyogona gina'ala'unaunana medema ana laufata ginavaina. 15Tu hai kaliva yana iyogoyogona gina'ala-'owona medema yana faisewa ginayawowola, ada keke laufata ginavaini. Tu bana tauna keke ginabwavi, au kaliva lokoloko manuwa gi'ala'alahina againe hiluluvemauga amine, Yaubada bana kalivai-nadi ginalugolegolena.
Omi Yaubada yana manuwa amine.
16 #
1Ko 6:19
Tobohiyakweyao, omi keke ma'i wadahalamaneni? Omi Yaubada yana manuwa amine, ada Yaubada Alu'aluwana nuwahinagemiya give'abaga. 17Ka'i tamo hakwadi Yaubada yana manuwa ginakivekoyona digo, Yaubada bana kalivai-nadi ginaluyawelina. Fa'ina Yaubada yana manuwa au abaga sevesevehailana, ada omi'iyao Bana yana manuwa.
Keke kaliva adi egana kanayakahini.
18Keke taumiyao agaimiya wanave'alololo. Ka'i tamo hakwadi omi tovetumagana agaimiya unuwanuwa vaita o tonuwahuya, au tomiyababi matadiya udavekwavakwava-yo Yaubada matane udavetonuwahuya. 19#Yob 5:13Fa'ina tomiyababi Yaubada keke hidahalamaneni-ma yadi nuwahuya vaita iyohoyoho amine Yaubada matane. E, Veyao Tuwaina ana buki gigahe amine gigayo,
Babi ana tonuwahuya aikaunuwanuwadiyao nonogana Yaubada agedi givebahina be yadi nuwahuya vaita iyohoyoho amine ginaseyemaunena.
20 #
Sam 94:11
Kadu gahe velugana buki-nadi againe gigahe gigayo,
Kaiwabu tonuwahuya yadi nuwanuwa gihalamane-'owona, higa mema yogo ma gaitoma-kawowo.
21Yaubada babi ana tonuwahuya fa'idiya hidedemi gigahe fa'ina, keke tamo hakwadi agaimiya kaliva adi egana unayakahini vaita fa'idiya una'alatutula. Wa'ita, gaitoma moya'aina au mema yami gaitoma, 22higa iya Folo ada badi Afolosi be Fita, kadu hida babi ana gaitoma, kadu yawaimi ana aiyeta, kadu alika ana tova, kadu gaitoma moya'aina tova adamoya gidadauda amanadi, kadu gaitoma moya'aina aimo tova mulina ginalakayemu amanadi. E, mena gaitoma moya'aina omi yami gaitoma, be ami veluga fa'ina. 23Tu omi'iyao ma Keliso yana gaitoma, ada kadu Keliso Yaubada yana gaitoma.
Trenutno izbrano:
1 Kolinita 3: viv
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2003, Wycliffe Bible Translators, Inc. All rights reserved.