1 Kolinita 1
1
1Yo siule tobohiyakweyao moya'aimi Kolinita againe. Iya Folo Yaubada givegideku be gave'afositolo. E, Bana'e nuwanuwana iya Yesu Keliso yana kabu ganavaina fa'ina, Yesu Keliso yana afositolo adi maka giveleku. Iya'eku kadu tobohiyada Sosidenisi yama lukafoi omi agaimiya. 2#1Ko 6:11Omi Yaubada yana yo'ogaga Kolinita againe yami leta a'etoladina be wana'itana. Omi higa Yaubada yana yo'ogaga fa'ina gisevehailemi be Yesu Keliso againe wahawahegemi, kadu givegidemi be Yesu Keliso yana kaliva mahamahalimiyao wanamiyami. Omi givegidemi kadu gaveyao moya'aidi fafali matatabudi agaidiya yada Kaiwabu Yesu Keliso ana egana hikikilakahina, medema omi buye givegidemi, ada Bana'e yadi Kaiwabu kadu yada Kaiwabu, ada yo'o au sa'eyana. 3Yaubada Tamada kadu Kaiwabu Yesu Keliso hinanuwadogemi ada ase'asemi hinakiveniwalovina.
Folo miKolinita yadi vetumagana fa'ina givesiule.
4 #
Kl 1:3-4
Tova moya'aina yaku Yaubada againe omi fa'imiya gavesivesiule, higa omi Yesu yana kaliva fa'ina Yaubada yana nuwadoga omi agaimiya ahe givetalaiyena. 5Omi Keliso buye wave'atutamo'aimi fa'ina yana nuwakabubu moya'aina againe wamimiyami, ada au Bana ginuwadogemi fa'ina laumamala nuwa'abi'abina amine wagahegahe, kadu Yaubada yana nuwanuwa velemo'ena wahalamane-hagihagiyena. 6Yama hawavemogatala Keliso fa'ine ase'asemi gi'onana velemo'ena. 7Fa'ina keke tamo Alu'aluwa Mahalina yana abavetala againe wadakali'uho, au yana abavetala matatabuna againe wamimiyami tu yada Kaiwabu Yesu Keliso yana yewa'ela ana tova fa'ina walulauboda. 8#Fl 1:6; 1Te 3:13Bana ginakivetoyogimi be higa Yesu ana vetumagana againe wana'atu'atuvefa'ila tu tova ana abalauyabu, ada au aimo yada Kaiwabu Yesu Keliso yana yewa'ela againe wanamiyami keke ami wavita. 9#1Yn 1:3Hidede amine Yaubada ginakivetoyogimi fa'ina gikovami be Natuna yada Kaiwabu Yesu Keliso buye wanavevido. Ada Yaubada giwonadabadaba amine ginagugaiyena, fa'ina adafaiweya kanavetumaganena.
To'ekelesiya buye hivekwageya fa'ina Folo gidakeyedi.
10 #
Fl 2:2
Siule tobohiyakweyao, Kaiwabu Yesu Keliso ana eganeya gagahevagadonemi be vekwageya wanase-mo'ena. Keke wananuwanuwa tulina tulina. Au wananuwanuwa leleleya, yami nuwanuwa sa'eyana ami ayauna sa'eyana. 11-12#Af 18:24-28, 19:1-2Tobohiyakweyao, vekwageya gayakahina fa'ina Keloi yadi yo'o kalivadi tufoidi buye wavekwavekwageya ma hivenuwa'ataku, higa gahe tulina tulina amine omi kaliva sa'eyana sa'eyana walulukahihi. Tufoimi wagahe wagayo, “Ime Folo yana kaliva.” Kadu tufoimi wagayo, “Ime Afolosi yana kaliva.” Kadu tufoimi wagayo, “Ime Fita yana kaliva.” Ada kadu tufoimi wagayo, “Ime Keliso yana kaliva.”
13Gavadi-yo hidedemi wagahegahe? Keke Keliso Tauna gidalugologolohini vaita yana yo'o tulina tulina. Iya Folo keke kelose againe gadalaka-yo omi fa'imiya gada'alika. Keke iya Folo aku eganeya wadabafitaiso. Keke, keke-mo'a. (Keliso omi fa'imiya gi'alika. Keliso ana eganeya wabafitaiso. Fa'ina omi Keliso yana yo'o, keke iya yaku yo'o.) 14#Af 18:8Iya Yaubada againe gavesiule fa'ina keke tamo hakwadi agaimiya gadakivebafitaisoye, au yami yo'o kalivadi adi'iseluga gakivebafitaisoyedi, higa Kelisifo ada Gaiyasi. 15Hidema fa'ina keke tamo hakwadi agaimiya afaiweya unagahe vaita aku eganeya gadakivebafitaisoye be aku tomuliya fa'ina. 16#1Ko 16:15A, sa'eyana nuwaku gi'afolena, higa Sitefanasi kadu ana yo'o buye gakivebafitaisoyedi, tu kadu ka'i tamo hakwadi velugana gakivebafitaisoyena tu nuwaku giulu. 17#1Ko 2:1-2,5Keke kaliva ganakivebafitaisoyedi fa'ina, Keliso gida'iveniniseku. Au gi'iveniniseku be Venuwa'ata Yamumuna ganalumamalena. E, Keliso yana alika kelose againe kaliva fa'ideya ma galulumamalena. Keke tomiyababi yadi laumamala nuwa'abi'abina amine gadalulumamaleni. Ka'i tomiyababi yadi laumamala nuwa'abi'abina amine gadalumamalena digo, Keliso yana alika kelose againe ana nuwanuwa keke ase'asemi gida'onani, au vaita gahe-kawowo wadanogalini.
Yaubada yana faiwala kadu yana nuwahuya Keliso againe
giseyemaunena.
18 #
Lo 1:16
Tu kaliva adi egana bwavibwavina Yaubada matane ma hida venuwa'ata Yesu Keliso yana alika keloseya fa'ina hinogalina againe, hivaitana iyohoyoho amine. Tu ide ada waegana ma Yaubada gikikibababaleda ada ide Keliso ana keloseya Yaubada yana faiwala ka'ita'itana. 19#Ais 29:14Wa'ita, Yaubada Veyao Tuwaina ana bukiya tonuwahuya adi egana bwavibwavina fa'idiya gigahe gigayo,
Hida babi ana tonuwahuya yadi nuwahuya ganayawelina.
Hida babi ana tohalamana yadi halamana ganakive'iyohoyohona.
20Hai tohalamana-mo'edi? Tonuwahuya hai yadi nuwahuya? Hai tova hidevama ana tolaumamala nuwa'abi'abidiyao? Tomiyababi keke tamo yadi nuwahuya. Yadi nuwahuya vaita iyohoyoho ma Yaubada giseyemaunena. 21Yaubada Tonuwahuya-mo'a givehimeya be hida babi ana tonuwahuya keke taudiyao yadi nuwahuya againe Yaubada hinahalamaneni. Venuwa'ata ime alulumamalena-ma vaita iyohoyoho badi matadiya tu Yaubada givehimeya be gaveyao hida venuwa'ata hinavetumaganena, medema ginakibababaledi. 22#Md 12:38; Af 17:18Badi miYuda ma nuwanuwadi nagona tamo iya'iyaya hina'itani-yo muliya venuwa'atai-nadi hinavetumaganena. Ada miGilika higa yo'o tulidiyao kalivai-dina ma nuwanuwadi laumamala nuwanuwahuyana hinanogalini-yo hinavetumaganena. 23Tu ime'eyao ma Keliso yana alika kelose againe ide fa'ideya ma alulumamalena. MiYuda hivaitana Keliso ginanagoyedi tu yama laumamala Keliso yana alika fa'ina hinogalina againe hi'ago'uga. Ada badi yo'o tulidiyao ma yama laumamala Keliso yana alika keloseya hinogalina againe, hivelaiga higayo, “Mema iyohoyoho gahe-kawowo.” 24Tu ide gaveyao ma Yaubada gikovada be yana yo'ogaga agaidiya giseda, tufoida miYuda tufoida yo'o tulidiyao kalivai-dina, medema Keliso ka'itahalamanena higa Bana'e Yaubada yana faiwala kadu yana nuwahuya. 25Kaliva hivaitana Yaubada kwavakwavana fa'ina yana vehimeya againe Natuna gi'alika, tu hida Yaubada vaita yana vekwavakwava ma kaliva yadi nuwahuya gitubuhegena, kadu kaliva hivaitana Bana kowakowana tu yana gakowakowa kaliva yadi faiwala gitubuhegena.
Keke tamo hakwa'adi anafaiweya ginagakahikahini
Yaubada matane.
26 #
Md 11:25
Tobohiyakweyao wa'ita, omi kaliva ami ita vaita gavadi amine tu Yaubada gikovami be yana yo'ogaga agaidiya gisemi. Tufoimi moya'aimi keke tonuwahuya, au kwavakwavamiyao. Kadu tufoimi moya'aimi keke kikaiwabumiyao, au fanifanimiyao. Meda tufoimi moya'aimi keke ami egana lakahina kaliva matadiya. 27Tu Yaubada Tauna badi fanifanidiyao tomiyababi matadiya giluwafadi be tonuwahuya ginakivewowomumudi. Kadu badi kowakowadiyao kaliva matadiya Yaubada giluwafadi be tofaiwala ginakivewowomumudi. 28#Ye 2:5Kadu badi koyokoyo'avadiyao ada badi'iyao tomiyababi hivekiwogedi-ma Yaubada giluwafadi. E, badi hihawave'iyohoyohoyedi amanadi Yaubada giluwafadi be gaitoma kikaiwabuna tomiyababi matadiya ginaluyaweyawelina fa'ina. 29Hidede amine Yaubada fanifanidiyao adi loi giluve'udi be keke tamo hakwadi anafaiweya ginagakahikahini Bana matane. 30#Lo 3:22; Ef 1:7Tu omi'iyao ma kadu Yaubada yana vehimeya againe Yesu Keliso buye wave'atutamo'aimi. Yaubada Keliso gi'iveninisena be nuwada ginakifolefolena, ada yana nuwahuya kanahalamanena fa'ina. E, Bana'e yada koyona ana aba'aiyawela ana eda gifaisewana be ide yegayegadeyao Yaubada matane kamimiyami, ada yada koyona fatana Tauna gisena be gitutuvehobuda. 31#Yel 9:24; 2Ko 10:17Gaitoma hagihagina moya'aina inubana Keliso againe fa'ina, Yaubada Veyao Tuwaina ana bukiya gigahe amine kanahuluva gigayo,
Hai kaliva nuwanuwana gakahikahi, medema keke tauna ana egana ginakikilakahini. Au gilubodana be Kaiwabu ginagakahikahiyena.
Trenutno izbrano:
1 Kolinita 1: viv
Označeno
Kopiraj
Primerjaj
Deli
Želiš, da so tvoji poudarki shranjeni v vseh tvojih napravah? Registriraj se ali se prijavi
© 2003, Wycliffe Bible Translators, Inc. All rights reserved.