Mwanzo 26
26
Izaki ampata mashaka inti ya Gerari
1Ikisa íkizuka tena upya njala ya tufani, kamba njala îpitire wakati wa Iburahima. Basi Izaki koka inti ya Gerari, ka Abimeleki nfalume wa Mafilisteu. 2Ikimwisukira ruhuya ya Mola wetu yakumwambira: “Usuke Miswiri, fala ikala inti yanisaka kukolotera. 3Uinshi noyo inti-yo kamba myeni. Omi nikuwa pamoja nowe na núkubariki. Kwa javyo, inti-yo piya núkupa uwe pamoja na ujukulu wako, kwa kutimiza kilapo ca tamaa yanimpere wawayo Iburahima. 4Nikongeza ujukulu wako, uwe mwingi kamba nondwa za binguni, na níwapa ezo inti-zo piya. Na kwa sababu ya ujukulu wako, mataifa piya mulumwengu nzima ájanliiwa. 5Piya-vyo kwa kuwa Iburahima kasikira mwito wangu na katimiza shuruti zangu, ámuri zangu, pamoja na kauli zangu.”
6Basi Izaki akikola kuinshi Gerari. 7Sambi wanu wa inti wakindadishi vyaari naye nkawake. Iye ákiwajibungi daima kuwa “Eyu nlumbuwangu”. Ákopa kusema kwamba “nkawangu” kwa kuwa ákiwaza kimoyomoyo kuwa wenye-kaya wasije kunulaya kwa sababu ya Rebeka, konta ákiwa mwema pakulu. 8Bandi ya kupita wingi wa suku, kwa suku moja Abimeleki nfalume wa Mafilisteu ire ákiwa pajanela, akimmona Izaki ampatike nkawake Rebeka. 9Abimeleki akimwita Izaki akimwambira: “Apa! Epa eyo nkawako! Namunani mbana kunambira kuwa nlumbuwo?” Izaki akinjibu: “Omi níkiropereza ntamana sukwambireni kuwa nkawangu.” 10Abimeleki akamba tena: “Kinani cautitendire-ci? Paiwa kâlawirira munu kalala na nkawako-yo, kosa nanga riwa retu ofwe, nanga iwa uwe ndi utenzire.” 11Basi Abimeleki akilavya ámuri akamba: “Munu mmojawapo asaka kumwandibu iye pamoja na nkawake onse, áhukumiwa kifo!”
12Noire inti ire, Izaki kavyala mmasamba mwake na noure mwaka ure akivuna zaida ya mara miya kwa mbeyu yaavyarire ire, konta Mola wetu kampa baraka. 13Basi Izaki suku anta suku ákitajiri mpaka akifikirira kuwa ndi mwenyé mali wa kwinshimika. 14Ákiwa nawo mifuwo ya makondoo na ng'ombe, na watumisi wengi wawenye, mpaka Mafilisteu wakanza kuntendera wiyana. 15Ndi ntamana wakuka mmirimbu yawasimbire watumisi wa Iburahima, wawaye Izaki tangu ari hai, wakififirira na misanga. 16Mwinsho Abimeleki akimwambira Izaki: “Fadari lawa muinti-mu, konta kuwa tajiri nkulu kutipunda ofwe.”
17Izaki akilawa kure akuka akitenga ema zake nanyenje ya nrati wa Gerari, akikola kuinshi nopare. 18Sambi Izaki akanza kufufula mirimbu îsimbiwe enzi za wawaye Iburahima, yawafifírire Mafilisteu bandi ya kufwa Iburahima. Na kwa kila nrimbu akita zina noro ríkitiwanga enzi za maremu wawaye Iburahima. 19Na munrati wa Gerari ure novyo, watumisi wa Izaki wasimba nrimbu, wakisinganira maji akibubuka, 20noparepare wasunga wa Gerari wakanza kumana na wasunga wa Izaki, wakamba kuwa “Eya maji, etu!” Izaki akita nrimbu ure Eseki (Umani), konta kwa sababu ya noure nrimbu ure upita umani iye na wasunga ware. 21Basi watumisi wa Izaki wakisimba nrimbu mwengine na wasunga wa Gerari wakingira kululumarira newo novyo. Na Izaki akita nrimbu ure zina ra Sitna, mana ake “Kululumarira”. 22Izaki akitanuka mahala pare, akuka akisimba nrimbu mwengine tena, na aalawirire munu mwengine tena wakwamba kinu julu yake. Izaki akita zina ra “Matamuko”, konta iye kaamba: “Sambi Mola wetu katipa matamuko na tikuja kuwa wanu wengi eyi inti-yi.”
23Wakati walawire pare, Izaki akúka Beresheba. 24Noire suku yaafikire ire usiku, Mola wetu kamwisúsira ruhuya kamwambira javi: “Omi ndi Mwenyezimungu wa wawayo Iburahima, usope kwa kuwa Omi níkurehemu, núkubariki na nikóngeza ujukulu wako kwa sababu ya kumpenda Iburahima, ntumisi wangu.” 25Basi pare Izaki akijenga uralu wakocera nyama za kafara, akimwabudu Mola. Noparepare akitenga ema zake na watumisi wake wakanza kusimba nrimbu.
Urafiki wa Izaki na Abimeleki
26Kwa suku moja Abimeleki noire-ire na Ahuzathi, mmashauri wake, pamoja na Pikoli nfalume wa makava walawa Gerari wakuka kuwonana naye Izaki. 27Na kuwawona Izaki kawadairi: “Umwe amunisaka na munitúwisa inti yenu. Mbana muja kusowera nomi?” 28Ewo wakinjibu: “Konta ofwe tiwonérera kweli-kwelini kuwa Mola wetu ákiwa pamoja nowe. Ndi patiwazire kuwa vyema titende jambo ra urafiki wakusanjirana nowe, vítajibu ofwe nowe tipatane. 29Nanga viwa javi: Uwe nanga kulapa kuwa autitenda mabaya, kamba nofwe novyo vyatitowire kukwandibu. Vyatúkukutafiti sana mpaka tukwasa kuka vyako ka wema. Sambi epa uwe kweli-kwelini kujanliiwa na Mola.” 30Basi Izaki akiwatendera furaha, wakirya na wakínywa. 31Pakucere subuu yake, kila mmoja akilapa upande wake. Izaki akilayana nawo kwa imani wakuka vyawo. 32Kwa noire suku ire watumisi wa Izaki wakija wakimpa habari ya nrimbu wawákisimba ure wakamba: “Tisingánira futi maji.” 33Izaki nrimbu ure akita zina Sheba, mana ake “kilapo” ntamana noyo kaya ulu-yo ikwitiwa Beresheba mpaka rero.
34Ezau patimize úmuri wa myaka arubaini, akiwalomba tena waka wawiri, Yuditi mwana wa Beeri na Basemati mwana wa Eloni. Wó-wawiri wawa zawo wákiwa waHeti. 35Fala nowo wanawaka-wo wákiwatayanga nyongo Izaki na Rebeka ya kuwalwazisa kiswa.
Currently Selected:
Mwanzo 26: wmwBI
Označeno
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.