SOERA MOZE I. FAZA 28.
FAZA 28.
I. Ifahowoeʼõ Jakobo Izaʼaki ba ifatenge chõ Labano. II. Ihalõ nono Zimaʼeli Ezaoe. III. Iʼila nora ba zoroego Jakobo, ba wangifi, ba itema gamaboeʼoela li Lowalangi. IV. Iʼandrõ saoha gõlõ chõ Lowalangi ba ifaboeʼoe woloʼõ chõnia.
1I. Ba hoemede Gizaʼaki chõ Jakobo ba ifahowoeʼõ ia; ba ibeʼe na li chõnia, imane: Bõi halõ nono alawe Ndrawa Ganaʼana. (F. 24, 3). 2Faoso, ae ba Mezofotamia, ba nomo Mbetoeeli, ama ninaoe, ba daʼõ halõ chõoe ndra alawe, ono zibajaoe Labano, samboea. (Hos. 12, 13). 3Ba jamoefahowoeʼõ ndraʼoegõ Lowalangi si lõ ambõ faʼabõlõ, ba jamoefoʼono ndraʼoegõ jamoeʼojaʼõgõ, enaʼõ w̃alo soi ndraʼoegõ! 4Ba jamoebeʼe chõoe howoehowoe andrõ chõ Gaberahamo, chõoe ba ba maʼoewoemõ, a wõoe, enaʼõ ochõtaoe dania danõ andre, ba zi so ndraʼoegõ si fatewoe, nitehe Lowalangi chõ Gaberahamo. (Moz. V. 34, 4). 5Ba ifofanõ Jakobo Izaʼaki, ba isaw̃a Mezofotamia, chõ Labano, ono Mbetoeeli, Dawa Garamo, gaʼa Rebeka, ina ndra Jakobo Ezaoe.
6II. Ba me irongo Ezaoe, no ifahowoeʼõ Jakobo Izaʼaki ba no ifatenge ba Mezofotamia, enaʼõ ba daʼõ ihalõ chõnia ndra alawe, wa no ifahowoeʼõ ia, awõ wa no ibeʼe li chõnia, wangoemaʼõ: Bõi halõ nono alawe Ndrawa Ganaʼana! 7awõ wa no ifondrondrongo Jakobo li ndra amania inania, weʼamõi ba Mezofotamia, 8ba aboto ba dõdõ Gezaoe, wa anoezoe dõdõ namania ndra alawe Dawa Ganaʼana. 9Ba mõi chõ Zimaʼeli Gezaoe ba ihalõ Mahalata, ono Zimaʼeli ono Gaberahamo andrõ, talifoesõ Nebajoti, nõnõnõnõ ndrongania si tohõna. (F. 36, 3).
10III. Ba mofanõ Jakobo, iheta ia ba Mbereseba, isaw̃a Harana: 11Ba iroegi zi mõrõ ia, noa saʼae aechoe loeo. Ba samboea ihalõ kara, si so ba daʼõ, ibeʼe tandrajania, ba ifadõlõ ia tooe mõrõ ba naha andrõ. 12Ba mangifi ia, ora nifasindro ba danõ siroegi banoea si jaw̃a zoezoe, ba mangõrõngõrõ ba daʼõ malaʼika Lowalangi. (Joh. 1, 52). 13Ba so si jaw̃a ba mbagi Jehowa, imane: Jehowa ndraʼodo, Lowalangi doeaoe Aberahamo, ba Lowalangi Gizaʼaki: tanõ andre, si mõrõ ndraʼoegõ tooe, ba chõoe oebeʼe dania ba ba maʼoewoemõ. (F. 35, 1; 48, 3). 14Ba maʼoewoemõ dania, ba si mane ngawoea nene ba danõ [waʼoja], ba mibologõ dania ami tánõ ba gaechoela ba tánõ ba gatoemboecha ba mijõoe ba miraja, ba moroi chõoe tefahowoeʼõ dania fefoe soi ba goeli danõ, ba moroi ba maʼoewoemõ.
15IV. Ba faofao ndraʼo chõoe ba oetimba chõoe zi lõ sõchi, fefoe gofoe heza mõiʼõ, ba oeʼohe mangawoeli ndraʼoegõ ba danõ andre; lõʼõ sa farõi ndraʼo chõoe, irege no oefaloea nifaboeʼoegoe chõoe. (Jes. 43, 1). 16Ba tokea Jakobo, ba imane: Si ndroehoe, so Jehowa ba naha andre, ba no lõ oeʼila! 17Ba ataʼoe ia ba imane: Sihocha mboeda naha daʼe; si ndroehoe nahia Lowalangi daʼe, bawandroehõ zoroego! 18Ba me moloeo, ba ihalõ gowe andrõ Jakobo, tandrajania mege, ifasindro harefa, ba ifadoewa wanicha ba detenia. 19Ba ibeʼe tõi naha andrõ Mbetiëli; Loesi dõinia fõna. 20Ba ifaboeʼoe linia Jakobo, imane: Na itolodo Lowalangi, na itimba chõgoe zi lõ sõchi ba lala andre, nitõrõgoe iadaʼe, na ibeʼe gõgoe, niʼā, ba noechagoe, niʼonoecha, 21ba na [ibeʼe] mangawoeli ndraʼo ba nomo namagoe, lõ hadia ia, ba ja Lowalangigoe Jehowa. 22Ba gowe andre, nitaroeʼõgoe harefa, ba ja osali Lowalangi, ba hadia ia fefoe, nibeʼeoe chõgoe, ba lõ zi lõ oefoeli chõoe zamboea niʼofoeloe.
Currently Selected:
SOERA MOZE I. FAZA 28.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.