SOERA MOZE I. FAZA 27.
FAZA 27.
I. Ifahowoeʼõ Jakobo ba Ezaoe Izaʼaki. II. Edõna iboenoe Jakobo Ezaoe ba itolo Jakobo inania Rebeka.
1I. Ba me no atoea Gizaʼaki ba me no abõsi hõrõnia, fa lõʼõ saʼae iʼila niha, ba hoemede ia chõ nononia si aʼa Ezaoe, imane chõnia: He onogoe! Ba imane: Jaʼe ndraʼodo! 2Ba imane [Izaʼaki]: Atoea saʼae ndraʼodo, ba lõ oeʼila, ha waʼara matedo. 3Ba halõ wangõnaoe ba wealoe, naha nono wana, awõ wana, ae ba mbenoea ba halõ chõgoe gahoeloea; 4ba haogõ õgoe, somasido ba ohe chõgoe si bacha andre, enaʼõ oeʼā, ba oefahowoeʼõ ndraʼoegõ, gasagasa waʼamategoe. 5Ba no ifondrongondrongo Rebeka, me iw̃aʼõ daʼõ Izaʼaki chõ nononia Ezaoe. Ba me no mõi ba mbenoea Gezaoe fafana, ba wangai ahoeloea, 6ba imane Rebeka chõ nononia Jakobo: Faefá oerongo, me hoemede namaoe chõ gaʼaoe Ezaoe, me imane chõnia: 7Halõ chõgoe gahoeloea ba haõgõ õgoe, enaʼõ oeʼā, ba oefahowoeʼõ ndraʼoegõ, ba zanehe Jehowa, gasagasa waʼamategoe. 8Ba ijaʼe, jaʼoegõ onogoe, ba oʼõ niw̃aʼõgoe, wamobawa lala chõoe! 9Ae ba nambi ba halõ chõgoe ba daʼõ zi matoea nono nambi si sõchi, doea rozi, enaʼõ oehaogõ, õ namaoe, somasi ia. 10Ba õʼohe dania chõ namaoe si bacha, enaʼõ iʼā, ba ifahowoeʼõ dania ndraʼoegõ, gasagasa waʼamatenia. 11Ba imane Jakobo chõ ninania Rebeka: Hiza, ba no moboe sibai gaʼagoe Ezaoe, ba jaʼo, ba si lõ boe. (F. 25, 25). 12Ma dania ibajaisi ndraʼo amagoe, ba tobali sangoʼaja jaʼia ndraʼodo, ba tohare chõgoe wangelifi oebeʼe, ba tenga howoehowoe! 13Ba imane chõnia inania: Chõgoe jatohare wangelifi andrõ, si gõna ndraʼoegõ enaʼõ, onogoe; oʼõ manõ niw̃aʼõgoe, ae halõ chõgoe. 14Ba mõi ia moehalõ ba iʼohe chõ ninania; ba ihaogõ inanania, õ namania, somasi ia. 15Ba ihalõ noecha nononia si aʼa Rebeka, noecha si sõchi chõnia, si so chõnia si bacha, ba ibeʼe noecha nononia si achi, Jakobo. 16Ba oeli nono nambi andrõ, ba ibeʼe ba dangania ba ba mbaginia, si no alõsõlõsõ. 17Ba ibeʼe ba danga nononia Jakobo gõ no mege, fabaja roti nibogõnia. 18Ba mõi ia si bacha chõ namania, imane: He ama! Imane: Jaʼe ndraʼodo! 19Ha niha ndraʼoegõ onogoe? Ba imane Jakobo chõ namania: Ezaoe ndraʼodo, onooe si aʼa; no oeʼoʼõ niw̃aõoe chõgoe. Ba dadao ba ā gahoeloea andre chõgoe, enaʼõ õfahowoeʼõ ndraʼo dania! 20Ba imane Izaʼaki chõ nononia: Ha lõ alio õsõndra, onogoe! Imane: Jaʼia, Lowalangioe Jehowa zamatõrõ chõgoe. 21Ba imane Izaʼaki chõ Jakobo: Hatõʼõgõ we, onogoe, enaʼõ oeʼila oebabaja nõsioe, na si ndroehoe onogoe Ezaoe ndraʼoegõ, ba na tenga! 22Ba ihatõʼõ ia chõ namania Izaʼaki Jakobo, ba me no ibajaisi, ba imane: Li andrõ, ba no li Jakobo, ba taʼio, ba no taʼio Gezaoe. 23Ba lõ iʼila, wa jaʼia, me no moboe daʼionia, si mane taʼio gaʼania Ezaoe; ba ifahowoeʼõ ia. 24Ba imane: Hadia, onogoe Ezaoe ndraʼoegõ? Imane: E, Ezaoe ndraʼodo. 25Ba imane: Ba ohe chõgoe, enaʼõ oeʼā gahoeloea andrõ, chõ nonogoe, ba oefahowoeʼõ dania ndraʼoegõ! Ba iʼohe chõnia, ba iʼā; ba ibeʼe chõnia nagoe ba ibadoe. 26Aefa daʼõ, ba imane chõnia amania Izaʼaki: Ae ba daʼe, ago mbawagoe, onogoe! 27Ba me ihatõʼõ ia, me faʼago bawa ia chõnia, ba iʼago hoea noechania; ba ifahowoeʼõ ia, imane: Si ndroehoe, hoea nonogoe andrõ, ba no hoelõ hoea mbenoea, nifahowoeʼõ Jehowa! 28Jamoebeʼe chõoe Lowalangi namo moroi ba mbanoea si jaw̃a, ba tanõ satabõ sinanõ, ba jamoehõna chõoe mboea nowi, awõ nagoe. (Heb. 11, 20). 29Ndramõi sawoejoemõ soi niha ba jamangaloeloe chõoe ngawalõ mado. Samatõrõ talifoesõoe fefoe dania ndraʼoegõ, ba ja mangaloeloe chõoe ndraono ninaoe. Ha niha zangelifi jaʼoegõ, ba niʼelifi daʼõ; ba samahowoeʼõ jaʼoegõ, ba nifahowoeʼõ? (F. 25, 23. Moz. IV. 24, 9). 30Ba me no iʼoʼozoei Izaʼaki wamahowoeʼõ Jakobo ba me ha siʼaikõ irõi namania Izaʼaki Jakobo, weʼamõi baero, ba so gaʼania Ezaoe, iʼoroi fafana. 31Ba iʼasiwai gõi gõ, iʼohe si bacha chõ namania, ba imane chõ namania: Faoso, ama, ba ā gahoeloea andre chõ nonooe, enaʼõ õfahowoeʼõ ndraʼo dania. 32Ba imane chõnia amania Izaʼaki. Ha niha ndraʼoegõ? Imane: Onooe si aʼa, Ezaoe, ndraʼodo! 33Ba tokea sibai Gizaʼaki ba imane: Ba ha niha atṍ zi no ahoeloe, solohe chõgoe si bacha, tobali no ahori oeʼā, me lõ jaʼoegõ na, ba no oefahawoeʼõ ia. Ba lõʼõ sa teboelõ nifahowoeʼõ ia! 34Ba me irongo Ezaoe niw̃aʼõ namania andrõ, ba megeʼege sibai ia, moeʼiraʼira, ba imane chõ namania: Fohowoeʼõ ndraʼodo gõi, ama! (Heb. 12, 17). 35Ba imane: Noa sa iʼonechesi achioe, ba no itagõ howoehowoe andrõ chõoe. 36Ba imane: Tenga sa faja, wa no labeʼe tõinia Jakobo; noa sa mendroea ilimodo: faʼasiaʼa andrõ chõgoe, ba no ihalõ, ba no itagõ gõi howoehowoe andrõ chõgoe! Ba imane na: Ba hadia, lõ nitenagõoe howoehowoe chõgoe? (F. 25, 33). 37Ba itema li Izaʼaki, imane chõ Gezaoe: Noa sa atṍ oefataro samatõrõ jaʼoegõ ia, ba no oebeʼe barõ mbawania, sawoejoenia, dalifoesõnia fefoe, ba no oehõna chõnia mboea nowi, awõ nagoe; ba hadia atṍ nibeʼegoe chõoe, onogoe? 38Ba imane Ezaoe chõ namania: Ba hadia sa, ha daʼõ howoehowoe chõoe, jaʼoegõ amagoe? Fahowoeʼõ ndraʼo gõi, ama! ba megeʼege Gezaoe. 39Ba itema linia amania Izaʼaki, imane chõnia: Hiza, si lõ atabõ sinanõ danõ, ba zi soʼõ ba lõ tána chõnia namo mbanoea moroi jaw̃a. 40Siʼõli wangaloei mbalazo chõoe, ba sawoejoe nachioe ndraʼoegõ. Ba tobali, na õʼanõsõʼõ, ba õʼewegõ galo mbagi andrõ chõnia, aheta ba mbagioe.
41II. Ba fatioe dõdõ Gezaoe chõ Jakobo, ba howoehowoe andrõ nifaʼema namania chõnia; imane dõdõnia Ezaoe: Na iroegi baw̃a wangeʼesi amagoe dania, ba oeboenoe nachigoe Jakobo! (Obad. a. 10). 42Ba me teʼombachaʼõ chõ Rebeka wehede nononia si aʼa Ezaoe, ba ifakaoniʼõ nononia si achi, Jakobo, imane chõnia: Hiza, edõna ilaoe mbalõnia chõoe gaʼaoe Ezaoe, wamoenoe jaʼoegõ. 43Ba oʼõ niw̃aʼõgoe chõoe, onogoe! Faoso, oloi, saw̃a gaʼagoe Labano, ba Harana, 44chõnia iagõ maʼifoe, irege alõ waʼabao dõdõ gaʼaoe 45— irege dõhõ wõnoe gaʼaoe andrõ chõoe ba irege olifoe ia nilaoemõ chõnia; awena dania oefatenge, oefahalõʼõ ndraʼoegõ ba daʼõ. Hana wa faoma taja ami chõgoe, ha maʼõmachõ! 46Ba imane Rebeka chõ Gizaʼaki: Safõli faʼaoeri saʼae ndraʼo, bõrõ Ndraono Cheti andrõ. Na Jakobo gõi dania zangai Iraono Cheti si manõ, ono niha ba danõ, ba hadia goena aoerido na?
Currently Selected:
SOERA MOZE I. FAZA 27.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.