SOERA MOZE I. FAZA 17.
FAZA 17.
I. Ifoeli ifaboeʼoe linia chõ Gaberamo Lowalangi. Ifalalini dõi Gaberamo. II. Tandra wawoeʼoesa li wamoto andrõ. III. Tefalalini gõi dõi Zaraʼi. Tefaboeʼoe Gizaʼaki. IV. Famaloea famoto.
1I. Ba me no 99 fache Gaberamo, ba iʼoromaʼõ ia Jehowa chõ Gaberamo, imane chõnia: Lowalangi si lõ ambõ faʼabõlõ ndraʼo, fõnagoe tõrõ lalaoe ba jaʼatoelõ ndraʼoegõ, (F. 24, 40), 2ba fawoeʼoe li ita, ba oja sibai dania maʼoewoemõ oebeʼe. 3Ba ifalõgoe tooe ia Aberamo, ba hoemede chõnia Lowalangi, imane: 4Jaʼodo zi no fawoeʼoe li chõoe, wa foeroegõ w̃alo soi ndraʼoegõ dania. 5Ba bõi saʼae Aberamo dõimõ, Aberahamo dõioe saʼae. Foeroegõ w̃alo soi sa oebeʼe ndraʼoegõ. (Rom. 4, 17). 6Ba ato sibai dania maʼoewoemõ oebeʼe, tobali mosoi dania ira, razo naʼi dania õsa maʼoewoemõ. (F. 35, 11). 7Ba fawoeʼoe li ndraʼo chõoe ba ba maʼoewoemõ foerioe, ba ngaʼõtõra andrõ, fawoeʼoesa li si lõ teboelõ, iroegi zi lõ aetoe, fa Lowalangioe ndraʼodo ba Lowalangi maʼoewoemõ foerioe. 8Ba chõoe ba ba maʼoewoemõ foerioe oebeʼe danõ andre, ba zi soʼõ si fatewoe iadaʼe, tanõ Ganaʼana maʼasagõrõ, oebeʼe ochõtami si lõ teboelõ, ba Lowalangira ndraʼodo. 9Ba imane Lowalangi chõ Gaberahamo: Ba jaʼoegõ, bõi bõhõli wawoeʼoesa li andrõ chõgoe, jaʼoegõ andre ba maʼoewoemõ foerioe, ba ngaʼõtõra andrõ.
10II. Daʼõ wawoeʼoesa li si lõ tola mibõhõli, fawoeʼoesa li chõgoe chõmi ba ba maʼoewoemõ foerioe: fefoe motõi matoea ba chõmi, ba niboto. 11Oeli chõmi niboto ba ja daʼõ dandra wawoeʼoesa li chõda. (Rom. 4, 11. Hal. zin. 7, 8). 12Na no fitoe bongi waʼeboea, ba niboto fefoe motõi matoea ba chõmi, ha oega ngaʼõtõmi, he si toemboe jomo ba he nihõli ba niha bõʼõ, si tenga jaʼami. (Moz. III. 12, 3). 13Niboto zi toemboe baomooe ba he nihõlioe anaʼa, enaʼõ tobali oroma ba nõsimi wawoeʼoesa li andrõ chõgoe, fawoeʼoesa li siroegi si lõ aetoe. 14Ba niha si lõ moeboto, si lõ moeboto oeli — ba nihori ba niwania zi manõ, no adoedoe wawoeʼoesa li andrõ chõgoe, ibeʼe.
15III. Ba imane na Lowalangi chõ Gaberahamo: Bõi saʼae beʼe tõi woʼomooe Saraʼi andrõ Zaraʼi; Sara saʼae dõinia. 16Ba oefahowoeʼõ ia ba oebeʼe boealagoe chõoe nono matoea, chõnia, oefahowoeʼõ ia ba ja awe soi ia dania; samatõrõ soi niha dania maʼoewoenia õsa. 17Ba ifalõgoe tooe ia Aberahamo ba maʼiki, imane sa dõdõnia: Hadia, moʼono maõ zi zi no 100 fache faʼatoea, ba moʼono Zara, si no 90 fache? 18Ba imane Aberahamo chõ Lowalangi: Enaʼõ na aoeri manõ Zimaʼeli andrõ fõnaoe! 19Ba imane Lowalangi: Bõi! Foʼomooe Sara andrõ zoʼono chõoe ono matoea, ba õbeʼe tõi nono andrõ Gizaʼaki, ba fawoeʼoe li ndraʼodo chõnia, fawoeʼoesa li siroegi si lõ aetoe, chõ maʼoewoena foerinia. (F. 18, 10; 21, 2. Gal. 4, 23. Heb. 11, 11). 20Ba he ba chõ Zimaʼeli andrõ, ba oefondrondrongo gõi wangandrõoe; oefahowoeʼõ ia ba oefongaʼõtõ ia, oja sibai maʼoewoenia, oebeʼe. Felendroea zalaw̃a ngaʼõtõnia dania, ba soi seboea maʼoewoenia oebeʼe. 21Ba fawoeʼoesa li andrõ chõgoe, ba chõ Gizaʼaki andrõ oetandrõsaigõ, si toemboe dania chõoe, chõ Zara, mané foeri. 22Ba me no awai hoehoeo Lowalangi chõnia, ba noemalõ mijaw̃a ia, irõi Gaberahamo.
23IV. Ba ihalõ nononia Simaʼeli Aberahamo, awõ dozi si no toemboe baomonia ba dozi nihõlinia anaʼa, fefoe motõi matoea ba zi so jomo chõ Gaberahamo, ba iboto goelira, me loeo daʼõ, iʼoʼõ niw̃aʼõ Lowalangi chõnia. 24Ba no 99 fache Gaberahamo, me teboto goelinia. 25Ba 13 fache Zimaʼeli, me teboto goelinia. 26Ba me loeo daʼõ, ba teboto Gaberahamo ba ononia Simaʼeli; ba si so jomo chõnia fefoe, 27he si toemboe baomonia, ba he nihõlinia anaʼa ba niha bõʼõ, ba teboto awõnia.
Currently Selected:
SOERA MOZE I. FAZA 17.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.