SOERA MOZE I. FAZA 12.
FAZA 12.
I. Awoeʼa Gaberamo, awõ Loti, laheta ira ba mbanoeara. II. Lasaw̃a danõ Miseraji. Itimba chõra zi lõ sõchi Lowalangi.
1I. Ba imane Jehowa chõ Gaberamo: Hetaʼõ ba danõmi ba ba dalifoesõoe ba ba nomo namaoe, ba ae ba danõ niʼoromaʼõgoe chõoe dania. (Moz. I. 15, 7. Jos. 24, 3. Mat. 19, 29. Hal. zin. 7, 3. Heb. 11, 8). 2Ba oebaliʼõ soi seboea ndraʼoegõ, ba oefahowoeʼõ ndraʼoegõ ba oeʼeboeaʼõ dõimõ ba to bali howoehowoe ndraʼoegõ. 3Oefahowoeʼõ zamahowoeʼõ jaʼoegõ, ba sangelifi jaʼoegõ, ba oeʼelifi gõi, ba moroi chõoe tefahowoeʼõ dania fefoe soi ba goeli danõ. (F. 22, 18; 26, 4. Hal. zin. 3, 25. Gal. 3, 8). 4Ba awoeʼa Gaberamo, iʼoʼõ niw̃aʼõ Jehowa chõnia, ba fao chõnia Loti. Ba no 75 fache Geberamo, me aheta ia ba Harana. 5Ba iʼohe woʼomonia Saraʼi Aberamo, awõ Loti, ono dalifoesõnia, awõ nibajabajara fefoe, si so chõra, awõ niha andrõ (sangai halõw̃õ) nisõndrara ba Harana, ba laheta ira, ba weʼamõi ba danõ Ganaʼana, ba laroegi danõ Ganaʼana. 6Ba itõrõi danõ andrõ Aberamo, iroegi mbanoea Zichema, iroegi gatoea More; ba me loeo daʼõ, ba Dawa Ganaʼana zi so ba danõ. 7Ba iʼoromaʼõ ia chõ Gaberamo Jehowa, imane chõnia: Ba maʼoewoemõ oebeʼe danõ andre! Ba ifaʼanõ naha wameʼe soemange ba daʼõ chõ Jehowa, si no mangoromaʼõ jaʼia chõnia. (F. 13, 15; 15, 18. Moz. V. 34, 4). 8Ba ifaʼese ia fõna, isaw̃a hili tánõ ba gatoemboecha loeo, iʼotarai Mbetiëli, ba daʼõ itaroeʼõ nosenia, tobali tánõ ba gaechoela Mbetiëli ba tánõ ba gatoemboecha Gaʼi, iʼotarai zi so ia. Ba ifaʼanõ ba daʼõ naha wameʼe soemange chõ Jehowa ba iʼangarõfi li Jehowa. 9Aefa daʼõ, ba idooeʼõdooeʼõ ia Aberamo miraja.
10II. Ba itõrõ lofo danõ andrõ. Ba mõi misi tooe ba danõ Miseraji Gaberamo, ba weʼaso ba daʼõ maʼifoe; noa sa abõlõbõlõ lofo ba danõ. 11Ba me no ahatõ ira ba danõ Miseraji, ba imane Aberamo chõ woʼomonia Saraʼi: Hiza, oeʼila, wa no ira alawe si sõchi bawa ndraʼoegõ. 12Ba na laʼilaʼõ dania Dawa Miseraji, ba lamane dania: Foʼomonia! ba laboenoe ndraʼo, ba laʼorifi ndraʼoegõ. 13Oeʼandrõ chõoe, õw̃aʼõ dania, achigoe ndraʼoegõ, enaʼõ ohahaoe dõdõgoe, bõrõ ndraʼoegõ, fa aoerido, bõrõ ndraʼoegõ. 14Ba me no iroegi danõ Miseraji Aberamo, ba laʼila Dawa Miseraji, wa no si sõchi sibai ndra alawe andrõ. 15Ba me no laʼila ia koemandroe seboea andrõ chõ Waraʼo ba lasoeno ia chõ Waraʼo, ba teʼohe ba gõdo Waraʼo ndra alawe andrõ. 16Ba obõwõ Waraʼo chõ Gaberamo, bõrõ ndra alawe, ba isõndra Aberamo mbiribiri ba saw̃i ba kalide ba sawoejoe ono matoea ba sawoejoe ono alawe ba kalide si alawe ba ondra. 17Ba ifatõrõ wamakao seboea Jehowa chõ Waraʼo ba ba zoroijomonia, bõrõ Zaraʼi, foʼomo Gaberamo. 18Ba ifakaoniʼõ Gaberamo Faraʼo, imane: Hana wa õlaoe chõgoe daʼõ? Hana wa lõ õw̃aʼõ chõgoe, wa foʼomooe? 19Hana wa õw̃aʼõ: achigoe, fa tobali oehalõ ia foʼomogoe? Ba iadaʼe, ba hiza woʼomooe, ohe ia ba foeliʼõ! 20Ba iw̃aʼõ niha Faraʼo, chõnia, enaʼõ mõi ira awõra ba lala, ba fao woʼomonia, awõ fefoe hadia ia chõnia.
Currently Selected:
SOERA MOZE I. FAZA 12.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.