SOERA MOZE II. FAZA 2.
FAZA 2.
I. Toemboe Mose ba iʼorifi ia ono Waraʼo. II. Iboenoe Ndrawa Miseraji ba moloi ia, isawa danõ Ndraono Midiano. III. Ifondrondrongo wangarõngarõ Ndraono Gizeraëli Lowalangi.
1I. Ba so niha, mado Lewi, sangowaloe, ono alawe mado Lewi gõi ihalõ. (F. 6, 20. Mos. IV. 26, 59. Ngaʼõt. I. 23, 13). 2Ba manabina galawe andrõ ba madono, ono matoea. Ba me iʼila, wa ono si sõchi, ba ibiniʼõ, tõloe waw̃a. (Hal. zin. 7, 20. Heb. 11, 23). 3Ba me tebai saʼae ibiniʼõ, ba ihalõ nahania wetifeti soechoe, igalõgalõni soeloemooe ba kita, ibeʼe bacha nono andrõ, ba ibeʼe barõ zoechoe ba mbewe Nilo. 4Ba so gaʼa nono andrõ alawe, idarodarogõ ba zahatõ, enaʼõ iʼila, he wisa loealoea. 5Ba so nono Waraʼo alawe, mõi ia ba Nilo, mondri. Ba me latõrõ mbewe Nilo awõnia, ba iʼila wetifeti andrõ barõ zoechoe; ba ifatenge zawoejoenia samõsa, ifahalõʼõ. 6Ba me ibokai, ba iʼila nono, ono matoea, seʼe. Ba ahachõ dõdõnia ia, imane sa dõdõnia: Dõrõ ono niha Heberaio andrõ. 7Ba imane gaʼa nono chõ nono Waraʼo: Hadia, mõido mogaoni chõoe ira alawe Heberaio, si bohooe madono, enaʼõ ifaenoe chõoe nono matoea andrõ? 8Imane ono Waraʼo: Aeʼe! Ba mõi nono alawe andrõ mogaoni ina nono no mege. 9Ba imane ba daʼõ ono Waraʼo: Na õʼohe nono andre ba na õfaenoe ia chõgoe, ba oebeʼe mbõli gõlõoe! Ba iʼohe nono ira alawe andrõ ba ifaenoefaenoe. 10Ba me no eboea nono matoea andrõ, ba iʼohe chõ nono Waraʼo alawe no mege, ba ihalõ ononia, ibeʼe tõinia Mose, imane sa: Nihalõgoe ba nidanõ!
11II. Ba me loeo no ira matoea Mose, ba samoeza maʼṍchõ, ba mõi ia baero ba niwara ba iʼila, wa no halõw̃õ zawoejoe halõw̃õra; ba anehe ia, me ibago niwara, niha Heberaio, Dawa Miseraji. (Heb. 11, 24—26). 12Ba ifachõlõ ia, ba me iʼila lõ niha bõʼõ, ba itema iboenoe Ndrawa Miseraji andrõ ba ikoʼo ba gawoe. (Hal. zin. 7, 24—28). 13Ba mahemoloe õ, ba ifoeli mõi baero, ba daroea si fasoso, iʼila, niha Heberaio. Ba imane ba zi so sala: Hana wa õbago nawõoe? 14Ba imane daʼõ: Ha niha zamataro sochõ jaʼaga ba sangoehoekoe jaʼaga jaʼoegõ? hadia edõna õboenoe ndraʼodo gõi, si mane famoenoemõ Dawa Miseraji andrõ? Ba ataʼoe Mose, imane sa dõdõnia: Si ndroehoe, no terongo daʼõ! 15Ba irongo gõi Faraʼo; ba iʼaloei wamoenoe Mose. Ba itema moloi Mose chõ Waraʼo, isaw̃a danõ Ndraono Midiano. Ba moedadao ia ba zinga mbaʼa ba daʼõ. (Hal. zin. 7, 29. Heb. 11, 27). 16Ba chõ hõgõ gere ba Ndraono Midiano, ba fitoe nono alawe; ba mõi daʼõ, ba wanaʼoe idanõ. Ba wamoʼõsi loeha, ba wamabadoegõ ba mbiribiri namara. 17Ba so goebalo, latimba ira. Ba maoso Mose, itolo ira ifaʼamõi mbiribiri chõra ba wamadoe. 18Ba me mangawoeli ira chõ namara Regoeëli, ba imane chõra: Hana wa lõ ararā ami maʼõchṍ? 19Lamane: Dawa Miseraji zanolo jaʼaga ba goebalo andrõ, ba noa naʼi itaʼoe chõma nidanõ ba ifabadoegõ ba mbiribiri. 20Ba imane ba ba ndraononia: Heza so ia jaʼṍ? Hana wa mirõi ba daʼõ niha andrõ? Mikaoni ia ba wemanga! 21Ba omasi Mose iʼiagõ ba niha andrõ ba ibeʼe chõ Mose nononia Sifora. 22Ba moʼono daʼõ, ono matoea, ba ibeʼe tõi nono andrõ Gereso, imane sa: ”No tobali si fatewoe ndraʼodo ba danõ niha bõʼõ.”
23III. Ba ara maʼifoe foeri õ, ba mate razo Miseraji. Ba mangarõngarõ Ndraono Gizeraëli ba halõw̃õ sabeʼe andrõ, moeʼiraʼira, tobali terongo ba Lowalangi weʼaora ba wangefaʼõ jaʼira ba halõw̃õ sabeʼe andrõ. 24Ba ifondrondrongo wangarõngarõra andrõ Lowalangi, ba itõrõ tõdõ Lowalangi wawoeʼoesa li andrõ chõnia, chõ ndra Aberahamo, Izaʼaki, Jakobo. (Moz. I. 17, 2). 25Ba inehegõ Ndraono Gizeraëli Lowalangi, ba ihachõsi tõdõ ira.
Currently Selected:
SOERA MOZE II. FAZA 2.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.