SOERA MOZE II. FAZA 1.
FAZA 1.
I. Itoegoe ato sibai Ndraono Gizeraëli. II. Lafakao ira. III. Iʼoroiʼõ Faraʼo laboenoe nono matoea chõra.
1I. Daʼe ndraono Gizeraëli, si no mõi ba danõ Miseraji; fao ira Jakobo no, ba no iʼohe zoroijomonia fefoe zamõsana: (Moz. I. 46, 8). 2Roebeno ba Simeoni ba Lewi ba Joeda, 3ba Isasari ba Seboeloni ba Benijami, 4ba Dano ba Nafetali ba Gado ba Aseri. 5Ba ngaʼõtõ Jakobo fefoe, ba fitoe ngafoeloe niha; ba Josefo, ba si no tohõna ba danõ Miseraji. 6Ba mate Josefo ba talifoesõnia, awõ zi sagõtõ niha andrõ maʼafefoe. 7Ba moʼonoʼono Ndraono Gizeraëli, itoegoe fahõna ba tobali ato sibai, tobali anõnõ danõ jaʼira. (Mos. V. 26, 5. Sin. 105, 24. Hal. zin. 7, 17).
8II. Ba so razo si bohooe ba danõ Miseraji, si lõ faloecha saʼae chõ Josefo. 9Ba imane daʼõ ba mbanoeania: Itoegoe ato moroi chõda Ndraono Gizeraëli andrõ ba abõlõ ira moroi chõda. 10Talaboe, taʼaloei waʼoneche, ba chõra andrõ, fa bõi abõlõ ato ira ba fa bõi faʼawõ ira ba nemalida, na tesao wanoewõ, wangeheta jaʼira ba danõ! 11Ba lafataro chõra mandroe, ba wamakao jaʼira ba halõw̃õ zawoejoe, ba sanaroeʼõ banoea chõ Waraʼo ira, banoea naha nihõna, Fitomo ba Ramese. 12Ba lahõtõi lafakao, ba ihõtõi moʼonoʼono ira ba ato, tobali ata oe ira Ndraono Gizeraëli. 13Ba laforege ba Ndraono Gizeraëli Dawa Miseraji ba halõw̃õ sabeʼe, halõw̃õ zawoejoe, 14ba alangoe dõdõra labeʼe, ba halõw̃õ sabeʼe andrõ ba laʼoeri ba gara tembo ba ba ngawalõ halõw̃õ ba danõ; oi halõw̃õ niforege chõra, enaʼõ lahalõ.
15III. Ba ibeʼe goroisa razo Miseraji ba zangamõi taloe ba niha Heberaio — Sifera dõi zi samõsa ba Foea dõi zi samõsa — imane: 16Na mõi ami, na madono ndra alawe Heberaio, ba mifaigi ba daogedaoge; na ono matoea, ba miboenoe; ba ono alawe atṍ, ba hana na aoeri. 17Ba sangataʼoefi Lowalangi zangamõi taloe andrõ, ba lõ laʼoʼõ niʼoroiʼõ razo Miseraji chõra, laʼorifi sa nono matoea. 18Ba ifakaoniʼõ zangamõi taloe andrõ razo Miseraji, imane, chõra: Hana wa mimanõ, wa miʼorifi nono matoea andrõ? 19Ba lamane chõ Waraʼo sangamõi taloe andrõ: Ira alawe Heberaio andrõ, ba tenga si mane ira alawe Ndrawa Miseraji, no sabeʼe irá; lõ fachamõ so zangamõi taloe, ba no toemboe nono. 20Ba ifahowoeʼõ zangamõi taloe andrõ Lowalangi, ba ato sibai niha ba abõlõ sibai ira. 21Ba me laʼataʼoefi Lowalangi sangamõi taloe andrõ, ba iʼojaʼõ chõra ndraono. 22Ba iw̃aʼõ ba mbanoeania fefoe Faraʼo: Fefoe nono matoea, si toemboe ba niha Heberaio, ba mitiboʼõ ba Nilo; ba ono alawe fefoe, ba hana na miʼorifi. (Hal. zin. 7, 19).
Currently Selected:
SOERA MOZE II. FAZA 1.: NIA
Označeno
Share
Copy
Want to have your highlights saved across all your devices? Sign up or sign in
Soera Ni’amoni’ö, Nias Bible 2009® © Indonesian Bible Society – Lembaga Alkitab Indonesia, 2009.