LIPOH 33
33
Jakob-nü Esau Shirücho
1Jakob-nü dhingmüthehde, Esau abi nyitsarü thsih müyü nüpü rochi ngucho, achotsü azarü tsü abinü Lea, Rachel ko ashamtpürü arüh khyang changnah jücho. 2Abinü abi ashamlarü ko atsurüti akhusohcho, hütsüpü Lea ko atsurüti ko Rachel e Josef nyüh akasohcho. 3Hütsüpü apu akhupü wücho ko khode amung shirücho, abinü alih la dhünyehpili mükhukehcho. 4Ta Esau-nü abi mütohnung shang wücho ko khyahripü abi chah müthsüpcho. Ko anyüding tracho. 5Khode Esau-nü dhingmükangcho ko khingkurü azarüti ngucho, abinü tsingdhingcho, “Nü yola hiri sürüo?”
Jakob-nü lalingcho, “Tsuzarüti hiri Tsingrangbarü achomangnü nü dikehrü khyang jücho lile.” 6Hütsüde ashamlarüti ko arüh tsurütinü ro mükhukehcho; 7hütsüpü Lea ko atsurüti rocho ko achangkathsa Josef e Rachel nyüh ro mükhukehcho.
8Esau-nü tsingdhingcho, “Khang, Ihnü mütohba aparü mülungti tsü tu adüzüo?”
Jakob-nü lalingcho, “Nüh kihchonung nengdang.”
9Ta Esau-nü yocho, “Ini, Ih kükyo lile. Hütsü nüpu nengdang yohpüng.”
10Jakob-nü yocho, “Yanglilüm doh, Ih nü jingte yanglih ngukhang, I jiyü khyüchojüng. I nengdang nü romih nguba tsü Tsingrangba romih ngucho roh-ie, ko nühnü Ih hitoi tsa khyüchoko. 11Hütsüeko Ihnü nü khyang hiroba jiyü hi yanglilümnü khyüchojüng; Tsingrangba-nü Ih khütang müi dhsütah lüpcho jüko.” Hütsüta Jakob-nü khütang kihchichonü Esau-nü hütsü khyüchocho.
12Esau-nü yocho, “Zahnü shemüsunung. Ih nü bekhu wüyanung.”
13Jakob-nü yocho, “Azarüti tase müzehcho nühnü müdhele ko aza nüba san ko misü nengdangsü lümxüre. Nyümong khüdu minü arüh alaa kümkhang, atii shünü sünung. 14Hütsüeko yanglilüm nüh akhu tsieng ko Ihnü khainü kanglungrü ko azarü nüpü Edom la nüh mü-iiphüde akohchonü dhsüdhsa ronung.” 15Esau-nü yocho, “Khang Ihnü I nyitsarü khürü nü yola pehjünung.” Ta Jakob-nü yocho, “Tu thsanung! Ih nü chahnü achomang du ngunyüre.” 16Achotsü hütsü nyümong Esau-nü Edom lang thalicho. 17Ta Jakob-nü Sukot lang wücho ko apu nengdang kuh khüdu ko kanglungrü nengdang mütpahvi kyükehcho. Hütsünü hiba müdüm te Sukot#33.17: Sukot: Hi adüzü Ibri yula “Atsikehchah” pü dsire pü dsicho.
18Abi Mesopotamia langnü thalide, Jakob tsü Kanan la Shekem yangdi tsa rochicho ko yangdi shündhün luh la amüdongchah thsacho. 19#Jos 24.32; Jhn 4.5Abinü hütsüba luh tsü Shekem au Hamor tsurüti te taripi thsih khüdunü lihcho. 20Hütsüla abinü bholu khüdu külüpcho ko Israel Tsingrang nengla El dsicho.
Currently Selected:
LIPOH 33: SANGBSI
Označeno
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.