LIPOH 32
32
Jakob-nü Esau Shirünung Rungnümcho
1Jakob langla tsi yade, ninglang riwürü khürünü abi shirücho. 2Khode abinü arüh ngucho, abinü yocho, “Hiba hi Tsingrangba müdongji” hütsünü abinü hütsüba müdüm te Mahanaim pü dsicho.
3Hütsüpü Jakob-nü Edom la amung yang yuhirü tsehleh müthehcho. 4Abinü arüh te yocho, “I büdongba Esau te nührünü hita young: Nü dikehrü Jakob-nü hita yore, Ih Laban te liyachonü münu mürochoe. 5Ih misü, gadu, san, miza ko ayurüti lile. Ade I büdongba yang abi yanglilüm ngunyü yuva müthehre.”
6Khode yuhirü thali Jakob yanglang rocho, arühnü yocho, “Ihrünü nü mung Esau yang wücho ko abi nüh mütohnung langwümla role. Abi yola nyitsarü thsih müyü zehle.” 7Jakob khütang nehnü lümtpanahcho. Abinü abi yola nyitsarü ko san, miza, misü ko ut tsü chang anyüh kang changsahcho. 8Abinü lümcho, “Esau-nü ro akhudiba mülung mahnye, akhüuba mülunglü tsichehnung.”
9Hütsüpü Jakob-nü dangkhidangnangcho, “Imü Abraham Tsingrang ko Isak Tsingrang, Ite nyieng. Abüdongba, nühnü Ite I lih lang ko I jümürü yanglang thali wüng ko I nengdang lüpcho tu müthsanungepü yocho. 10Nühnü nü dikehrüte amüi ko yuje ngusohcho Ihnü müdekheng. Jordan hi kehde I kheh la ja du khüdu licho, ta adelü mülung anyüh yola Ih thali rore. 11Imung Esau khehlanü Ih khümchoungpü Ihnü kihchire. Abinü ro Ih ko khingkurü azarü zeh mahnung drüre. 12#Lip 22.17Nühnü Ih müwajünung ko I chahnü kihdi lihpi kyo mükhilong trahchosohnung nyengchocho tünbüchü.”
13-15Hütsü romang hütsüla yüp-pü, Jakob-nü amung Esau khyang kanglungrü yolanü jiyünung throchehcho: miza atrüh thsih anyüh ko apung mükyü, ut atrüh aza nüpü sangre, misü atrüh yüre ko misüpung dhüre, gadu atrüh mükyü ko apung dhüre. 16Abinü atii atii changnahcho ko atii müipila anyahrü yohpücho. Abinü arüh te yocho, “I bekhu tsieng ko atii atii kahla adukah zehsohng.” 17Abinü akhuba kulirü te yocho, “Khode Imung Esau-nü nüh shiro, ‘Nührü abüdongba süo? Nührü khüde würo? Ko nü bete kanglungrü hi sü yo-o pü tsingdhingde, 18nühnü hita laling, ‘Hiri nü dikehrü Jakob yoe. Abinü abi büdongba Esau khyang jiyü mühehchüre. Jakob apusü ihrü khanglang tsehle.’” 19Abinü anyüuba, asanguba ko atii atii nyahrü atümung te hütsüroh-i du tsü yocho: “Nührünü Esau shirüde hita young. 20Ho, nü dikehrü Jakob-sü ihrü khanglang tsehlepü young.” Jakob-nü lümcho, “Hiri jiyü khu Ihnü abi kihchonung ko Ihnü abi shirüde, kümüdeo abinü I khyang mülang pehjünung.” 21Hütsüta abinü jiyü tsü akhu müthehcho ko hütsü romang arüh müdongchah yüpcho.
Jakob-nü Peniel la Shutacho
22Hütsü romang tsünü Jakob-nü shemüsu anitpü anyüh, ashamtpü anyüh ko atsurü dhürekheh tsü nüpü Jabbok yongkhi kehcho. 23Abinü arüh tsü yongkhi keh müthehko khanglang abi kuthsisü apüm müthehcho, 24#Hos 12.3-4ta abi müleng aka nyehlicho.
Hütsüpü nyitsarü khüdu ro abi te tsingse shutacho. 25Khode nyitsarüba tsünü abinü mükoh pü müdhecho, abinü Jakob mütsurünah la shingjücho ko shutade hütsü lohchehcho. 26Hütsüpü nyitsarüba tsünü yocho, “Ih tsisohng, tunüo tsingsele.”
Jakob-nü yocho, “Nühnü Ih mümüwajüde Ihnü nüh mümüthehnung.”
27Nyitsarüba tsünü yocho, “Nü neng süo?” Abinü yocho, “I neng Jakob.”
28 #
Lip 35.10
Nyitsarüba tsünü yocho, “Adelü nü neng Jakob mah ta Israel pü dsinung, tunüo nühnü Tsingrangba ko nyitsarü te shutako ko nühnü kohko.”
29 #
Yuk 13.17-18
Jakob-nü yocho, “Yanglilüm Ite nü neng young.” Ta abinü yocho, “Tuepü nühnü I neng müdhenyüro?” Hütsüpü abinü Jakob müwajücho.
30Jakob-nü yocho, “Ihnü Tsingrangba romih-e romih nyüh dhsükehta nguko, ta abinü I akang rikijüko” hütsünü abinü hütsüba müdüm te Peniel pü dsicho. 31Nyü chürode Jakob-nü Peniel pehjüpü athsenü mütsachonü thechi tsicho. 32Hütsünü chünye yingcheh Israelrünü athseshu tsü mütsure, tunüo Jakob mütsurünah chah tsü shingjücho.
Currently Selected:
LIPOH 32: SANGBSI
Označeno
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.