Filiposĉantyidyes 4
4
Jemoñeꞌ fer buꞌjaꞌ bäꞌjaꞌ Jenꞌsiꞌyaꞌ vej muꞌ
1Vojity, mạꞌjeyacdyety yụ, yụ fer mạꞌjeꞌ cạveyac miꞌin anic fer maꞌjoij yuꞌtiĉaꞌ yụ miꞌin, yụ anic maꞌjotyeyac junꞌ chuc bäꞌyi Jenꞌdyes miꞌin, mọꞌdyes fer buꞌjamꞌ Ayodyes miꞌin.
2Mi Evodia judyeyaꞌ mi Síntique, yụ fercheꞌ jéyac, jemoñeꞌ vaj cäts dyijyiꞌ pärenꞌdye miꞌin, ĉaĉaij na vaj vojiꞌ miꞌin Ayos miꞌin. 3Chimeꞌdye mi penꞌdyeꞌ yụ, mi nash jịꞌcätseꞌtyiꞌ p̂eyacdyeꞌ yụ jéye, paj qui nọ́tacsi mi mọꞌin päräꞌsis p̂en in paj qui jämꞌjibunꞌ quivij in. Mọꞌin carijtaquis yụ́tum in voroꞌtacsiyaꞌ yụ jiquej mọꞌ jämꞌsiꞌ p̂eyacdyeꞌ Jenꞌsiꞌ muꞌ. Clementetum chimeꞌ carijtaquiꞌ mọꞌin in, yoctyiꞌtum penꞌdyeꞌ yụ in, vaj meꞌ carijtaqui Jenꞌdyes tsun. Räj quircacheꞌ sánac tịj muꞌinsiꞌ in mọꞌ jiꞌjäcacsiꞌ muꞌin Jenꞌyaꞌ raꞌ bäꞌyity in.
4Maꞌjodyeꞌtum bäꞌjamꞌ miꞌin ĉaĉaij na Ayoty miꞌin. Quivij yụ raꞌ jéyac: ¡Maꞌjojamꞌ bäꞌjamꞌ miꞌin! 5Räjĉan jämꞌyedyeꞌtum bäꞌjamꞌ räjtum muntyiꞌtum miꞌin. Jeshaꞌ, aty c̣hẹiꞌyaꞌ ayidyeꞌ Ayos tsun.
6Jam raꞌ jedyeꞌ cajotyetiñeꞌ, damꞌdye jämꞌ cọdyetinte muꞌ Jenꞌ jedyeꞌ chuc jemontiñeꞌyaꞌ cọdyemac mọmoꞌ miꞌin, räjĉan yoshoropaij jémac chimeꞌ. 7Chat qui raꞌ muꞌ Jenꞌ soꞌminac maꞌjodyeꞌ ĉojtyiꞌĉandyes miꞌin, mọꞌ raꞌ ĉujcabunac ĉojtyiꞌ miꞌin judyeyaꞌ dyijyedyeꞌ miꞌin, paj qui jam yocve dyijyi miꞌin, ĉaĉaij na Jesucristoty miꞌin. Mọꞌ maꞌjodyeꞌ soꞌmisinꞌsiꞌ Jenꞌ anic mọjoꞌchas mọꞌ, mijam ọ́yaꞌ junꞌdyemꞌ tupuj chaꞌshepja mọꞌ maꞌjodyeꞌ muꞌ mijam chị́yepja.
Dyijtuvac yedyej jämꞌsiꞌ jedyeꞌ
8Ọij raꞌ jadyic jéyac p̂eyacdyeij vojity. Jam raꞌ aꞌc̣his jedyeꞌ dyijtutiñeꞌ ĉojtyiꞌĉan miꞌin, jämꞌsimꞌ dyijtuvac jedyeꞌ, jụꞌñiñis chuc rụijsis dyijyedyeꞌ in, judyeyaꞌ jụꞌñiñis chuc maꞌjotacsiꞌ in, judyeyaꞌ jụꞌñiñis chuc jam cäjsis in, judyeyaꞌ jam jụꞌñis in, judyeyaꞌ mạꞌjeyacdyes in, judyeyaꞌ jämꞌyedyes in, judyeyaꞌ jụꞌñiñis chuc timaꞌcacdyes in, joꞌmemes mọmoꞌ dyijtuvac miꞌin.
9Yejĉojamꞌ chäquibutiĉamꞌ p̂eyacdyeꞌ yụs miꞌin mọꞌ bajaꞌ jịꞌchiyeyacsiꞌ jiquej. Junꞌ chuc jịꞌchiyeyacyaꞌ yụ jiquej, junꞌ chuc bäꞌyi yụ miꞌinsiꞌyaꞌ vej jiquej, meꞌdye raꞌ bäꞌyi miꞌin chimeꞌ. Meꞌ jụijyaꞌ miꞌin muꞌ Jenꞌ soꞌmisinꞌtyiꞌ maꞌjodyeꞌ ĉojtyiꞌĉandyes tsun, muꞌ raꞌ penꞌdyetunac miꞌin.
10Där maꞌjoij yụ Ayoꞌsiꞌyaꞌ vej muꞌ, ĉaĉaij na chijämꞌ quivij dyijtutiĉaꞌ yụ miꞌin, jutiyibudyiĉaꞌ quivij nọ́tacdyeꞌ miꞌin. Yụ qui namꞌ chịj jam yaquintutiĉaꞌ yụ miꞌin, mọꞌ mọmoꞌ chịj yụ jam junꞌ buꞌyaque jiquej miꞌin. 11Meꞌ tsanꞌ meꞌ jéyac yụ, yụ qui namꞌ jam jiꞌyoquin jayejjotacdyeꞌ yụ, ĉaĉaij na aty chịj yụ maꞌjodyeꞌtum bäꞌyi yụ, jedyeꞌ chuc mọꞌyaꞌ jụijyaꞌ yụ, meꞌ tsanꞌ jayejjotaqui jedyeꞌ yụ, vaj meꞌ qui namꞌ maꞌjoij yụ. 12Jämꞌdyeyaꞌ jayejjotaqui jedyeꞌ yụ, jämꞌdyeyaꞌ na daiꞌ meꞌchuiꞌ yụ. Mọꞌdyes chịj yụ maꞌjodyeꞌtum bäꞌyi yụ, meꞌ tsanꞌ mọjoꞌchaꞌ jedyeꞌ meꞌchuiꞌ jụijyaꞌ yụ, meꞌ tsanꞌ jayejjotaqui jụijyaꞌ yụ, maꞌjodyeꞌtum qui namꞌ bäꞌyi yụ. 13Räj jedyeꞌ chuc carijsis jịꞌĉojtyeꞌsiꞌ yụ, joꞌmesyaꞌ muꞌ Cristo soꞌmin yụ dyichyedyes ferdyedyes yụ, tupuj qui dyichyi yụ, meꞌ tsanꞌ fersiꞌyaꞌ ñịbedyes. 14Meꞌ tsanꞌ meꞌ yụ, anic qui namꞌ där jämꞌ miꞌin jutiyitiĉaꞌ nọ́tacdyeꞌ miꞌin úĉan yóĉandyemꞌ ñịbeꞌ bäꞌyiĉan u yụ.
15Chịj miꞌin junꞌ chuc yụ tiyacchuse jiquej voroꞌtacsi yụ jämꞌsiꞌ p̂eyacdyeꞌ Jenꞌsiꞌ muꞌ, aty Macedoniaĉan jiquej sacjeꞌ yụ, miꞌin na Filiposĉantyiꞌ meꞌdye miꞌin mọmoꞌ jutiyitiĉaꞌ miꞌin tsạꞌ buꞌyedyety yụ, jam meꞌ yoctyiꞌ anicjetety Jenꞌ in jutiyin yụ in. 16Chimeꞌdye aty muꞌĉan yụ Tesalónicaĉan jịjcaij yụ jiquej, miꞌin cuvij jutiyitiĉaꞌ miꞌin, jam yiriꞌ quimꞌ meꞌ jutiyitiĉaꞌ miꞌin. 17Jam mumꞌ querec̣ha dyijtute yụ, miꞌinmun chimeꞌ dyijtuyac, paj qui Jenꞌsiꞌcheꞌ quirca sánac ñịbeꞌyedyes soꞌmitiĉas yụ miꞌin, mọꞌyaꞌ qui raꞌ bijodyes soꞌminac miꞌin muꞌ Jenꞌ. 18Q̂uinꞌ chat uts Epafrodito tuyin yụ uts querec̣ha jutiyitiĉaty miꞌin, räj muꞌ soꞌmin yụ, tupuj yụ́dyety mujuꞌchaꞌ meꞌchute q̂uinꞌ yụ. Ọij nọ́tacdyeꞌ soꞌmitiĉas yụ miꞌin mọꞌ jeñej buꞌyiꞌ jiꞌcoꞌshayacdyeꞌ Jenꞌdyes jẹrejres, meꞌ shupquiꞌ mọꞌ, anic mọꞌ maꞌjotyibunac Jenꞌ. 19Yụ́tyiꞌ Jenꞌ räj raꞌ soꞌminac jedyeꞌ chuc jemontiñeꞌ miꞌin, paj qui jam jayejjotaqui jedyeꞌ miꞌin, ĉaĉaij na muꞌ Jenꞌ räj meꞌchuiꞌ jedyeꞌ, Jesucristoyaꞌ muꞌ raꞌ soꞌminac miꞌin. 20Timaꞌqueja muꞌ Jenꞌ, Ạvatusinꞌtyiꞌ tsun, jam raꞌ jụꞌñisĉan mạyedyeꞌ mọtsiꞌ timaꞌcacdyeꞌ muꞌ.
Ọij jadyiquis voryetacdyeꞌ Pablos
21Vorjeyacsejamꞌ räj muꞌin anicjetety Jenꞌ in, muꞌin Jesucristoty in. Uts úĉantyiꞌ vojity in muꞌin vorjinac chimeꞌ in. 22Räj muꞌin úĉantyiꞌ Jenꞌtyiꞌ ñuruꞌtyity in vorjinac chimeꞌ in, muꞌin carijtaquity in ayosĉantyiꞌ acaꞌ in, muꞌ mujuꞌchaty ayoꞌ Romaĉantyiꞌ, muꞌin dadamꞌ mujuꞌchaꞌ vorjinac in.
23Yụ cọdyete muꞌ Jesucristo, Ayoꞌ tsun paj qui muꞌ ñịbeꞌjitidyes soꞌminac räj miꞌin. Paj meꞌ.
Aktuálne označené:
Filiposĉantyidyes 4: CAS
Zvýraznenie
Kopírovať
Porovnať
Zdieľať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright 2017 Nuevo Testamento en Chimane
Jen'si' P̂eyacdye'