Filiposĉantyidyes 2
2
Jenꞌtyiꞌ Ạvaꞌ muꞌ muntyiꞌ yuꞌti
1Cristo fer buꞌyi yuꞌtyinac miꞌin, muꞌ maꞌjoij yuꞌtyinac miꞌin mạꞌjitidyesyaꞌ muꞌ, aty tibäꞌyebitinte Jenꞌsiꞌ Ạꞌedyeꞌ muꞌ, judyeyaꞌ jämꞌyedyeꞌtum bäꞌyi chimeꞌ miꞌin, judyeyaꞌ ñịbeꞌ ĉọcsi chimeꞌ miꞌin. 2Mọꞌdyes yụ jéyac paj qui vaj meij mạꞌjitidyeij bäꞌyi miꞌin mijam raꞌ yoc yoc dyijyi miꞌin, damꞌdye jämꞌ vaj cäts cạtiñeꞌ dyijyedyeꞌ miꞌin. Meꞌ bäꞌyi jụijyaꞌ miꞌin, meꞌ raꞌ chat maꞌjoij yuꞌtiĉaꞌ yụ miꞌin. 3Jam raꞌ fibiꞌnacdyeꞌtum bäꞌyi miꞌin mijam raꞌ ĉụiꞌsiꞌ dyijyedyeꞌ meꞌchuqui miꞌin, jämꞌyedyeꞌtum raꞌ bäꞌyi miꞌin yoctyiꞌtum muntyiꞌ in. Jam raꞌ vaꞌbunyi miꞌin, damꞌdye jämꞌ mujuꞌchaꞌ dyijtucsi miꞌin yoctyiꞌ chätidyeꞌ miꞌin, uyaꞌyaꞌ qui raꞌ ĉụiꞌ ĉúti miꞌin. 4Jam raꞌ ĉụiꞌsimꞌ jedyeꞌ dyijtuqui miꞌin, jemoñeꞌ chimeꞌ dyijtucsi chätidyeꞌ miꞌin. 5Cäc̣häꞌchubimac Jesucristos dyijyedyeꞌ muꞌ.
6Muꞌ nash tạꞌcaty Jenꞌ buꞌyity,
muꞌ qui namꞌ jam dyijyi yejĉoij raꞌ ayoꞌbuꞌyi yojdyemꞌ Jenꞌ u muꞌ.#2:6 Juan 1:1-3
7Ĉụiꞌsiꞌyaꞌ dyijyedyeꞌ muꞌ räj farajjeꞌ ayoꞌbuꞌyedyeꞌ muꞌ,
úcheꞌ qui atsij,
jeñej qui muntyiꞌ meꞌ naꞌi,
úñity qui yuꞌti.
Muntyiꞌ buꞌyi qui jiꞌcaviti,
8ĉụiꞌ uyaꞌyaꞌ yuꞌti,
chiquete Jenꞌ muꞌ ĉụiꞌ jiꞌsäsdyi jiꞌujati,#2:8 Mateos 26:39
dadamꞌ ñịbedyes jịꞌĉojtyeꞌ sänꞌdyeꞌ tsị́cadyes,
croshcheꞌ ijate in.
9Muꞌ qui Jenꞌ mujuꞌchaꞌ jayuꞌti,
räj yoctyiꞌ ayoꞌ in cajnacsi,#2:9 Hebreodyes 2:9, 12:2
anic mọjoꞌchaꞌ jayuꞌbuti tịj muꞌ,
10paj qui räjenꞌ in dyụtsyi Jesúsyaꞌ in aty seꞌvepteyaꞌ tịj in,
räjenꞌdye mạyedyeꞌcheꞌ bäꞌyity in judyeyaꞌ jacchety in,
judyeyaꞌ jacĉan bäꞌyity chimeꞌ in,
räjenꞌdye raꞌ dyụtsyi Jesúsyaꞌ in timaꞌquete in.
11Räjenꞌdye raꞌ muꞌin jiꞌjäcte in, yi raꞌ in:
"Jesucristo nash anictyity Ayoꞌ",
yi raꞌ in, timaꞌcacdyeꞌyaꞌ Jenꞌ muꞌ Ạvatusinꞌ tsun.
Jemoñeꞌ mạij buꞌjaꞌ bäꞌjaꞌ tsun
12Chätidyeꞌ mạꞌjeyacdyety yụ, penꞌdyetuyacdyemꞌ yụ jiquej miꞌin räjĉan chäquibutiĉaꞌ yụs p̂eyacdyeꞌ miꞌin. Q̂uinꞌ chat itŝij yụ, mọꞌdyes dadamꞌ mujuꞌchaꞌ jemoñeꞌ chäquibutiĉaꞌ yụs p̂eyacdyeꞌ miꞌin. Yụꞌtaĉamꞌ ferdyeꞌ paj qui jịꞌcätseptinte Jenꞌsiꞌ dyijyedyeꞌ muꞌ miꞌindyes, mọꞌ mạꞌjes muꞌ aty jiꞌc̣honnac jiquej miꞌin, fer irijyi muꞌcheꞌ miꞌin. 13Muꞌdye Jenꞌ soꞌminac ĉojtyiꞌĉandyes dyijyedyeꞌ miꞌin paj qui mạꞌjeꞌ Jenꞌdyes miꞌin, chimuꞌdye soꞌminac ferdyedyes paj qui tupuj chiquebitinte p̂eyacdyeꞌ muꞌ.
14Räjĉan raꞌ meꞌ miꞌin aty qui raꞌ jam jedyeꞌ jítidyeij miꞌin, aty qui raꞌ jam mistyivaꞌti chimeꞌ miꞌin. 15Jam raꞌ meꞌ bäꞌyi miꞌin, rụij qui bäꞌjamꞌ paj qui jam jụꞌñij ĉojtyiꞌĉan miꞌin. Jemoñeꞌ Jenꞌtyiꞌ ạvaꞌ buꞌyi miꞌin ac̣hiꞌyityĉan muntyiꞌ in juchajtumtyiꞌĉan in. Mạij buꞌjamꞌ bäꞌjamꞌ yojdyemꞌ ọ́rotaꞌ u, meꞌjeyacsejamꞌ mạijchucsejamꞌ muꞌin úchety jacchety muntyiꞌ in, 16jịꞌchiqueyacsejamꞌ tsạꞌchucsis p̂eyacdyeꞌ. Meꞌ bäꞌyi jụijyaꞌ miꞌin yụ raꞌ maꞌjotyeyac miꞌin aty atsijbanyaꞌ muꞌ Cristo, meꞌ raꞌ jorojĉan jam fibidyes shupquiꞌ mọꞌ carijtacdyeꞌ Jenꞌdyes yụ, voroꞌtyeyacyaꞌ yụ jiquej. 17Meꞌ raꞌ tsanꞌ ijac yụ voroꞌtacdyes, maꞌjodyeꞌ qui na ramꞌ shupquiꞌ yụ́dyes. Sänꞌdyeꞌ raꞌ yụ jeñej buꞌyiꞌ raꞌ tuyacdyeꞌ Jenꞌdyes, mọꞌ tuyetintes Jenꞌ miꞌin anicyedyeꞌyaꞌ miꞌin, meꞌ buꞌyiꞌ raꞌ mọꞌ sänꞌdyeꞌ yụ. Tupuj ijac yụ, meꞌ tsanꞌ meꞌ, maꞌjodyeꞌtum qui namꞌ bäꞌyi yụ, miꞌinmun raꞌ chimeꞌ maꞌjoij bäꞌyi miꞌin, 18meꞌdye raꞌ miꞌin chimeꞌ maꞌjojamꞌ yụ́tum.
Timoteo judyeyaꞌ Epafrodito
19Ayoꞌ tsun Jesús yíyaꞌ, yụ dyijyi cavin raꞌ jutete yụ muꞌ Timoteo paj qui miꞌinyaꞌ jadyiqui muꞌ, paj qui muꞌ tubanꞌ p̂eyacdyeꞌ jíbun yụ junꞌ chuc bäꞌyi miꞌin, chat qui raꞌ yụ maꞌjodyeꞌtum seꞌveꞌ yụ mọꞌ p̂eyacdyeꞌ aty chịjyaꞌ yụ. 20Uts Timoteo mumꞌ yirity dyijtunac ĉojtyiꞌĉan miꞌin, yojdyemꞌ yụ u, itŝij muꞌyaꞌ yoctyiꞌ meꞌ dyijtunactyiꞌ miꞌin. 21Yoctyiꞌ qui namꞌ in ĉụiꞌsimꞌ jedyeꞌ dyijtuqui in, jam méquiꞌ Jesucristos dyijyedyeꞌ dyijtupte in. 22Miꞌin aty chị́yetinte muꞌ Timoteo, anic rụijtyity nọ́taquity muꞌ. Jeñej yirity ạvaꞌ nọ́taqui jenꞌ muꞌ, meꞌ buꞌyi muꞌ carijtaqui yụ́tum voroꞌtacsiyaꞌ tsun jämꞌsiꞌ p̂eyacdyeꞌ Jenꞌsiꞌ muꞌ. 23Mọꞌdyes dyijyi yụ, yụ raꞌ jutete muꞌve miꞌinyaꞌ aty chịjyaꞌ yụ junꞌjin chuc raꞌ yụ in, vatyquej raꞌ muꞌ tashchety ayoꞌ jiꞌc̣hoñin yụ, vatyquej raꞌ jam. 24Yụ ĉúti Jenꞌcheꞌ tsun, c̣hoñi raꞌ yụ, chat qui raꞌ muꞌve yụ ĉọcyac miꞌin.
25Chimeꞌdye dyijyi yụ jemoñeꞌ yụ jutebajte miꞌinyaꞌ muꞌ vojity tsun Epafrodito, muꞌ nash úyaꞌ jutetinte miꞌin paj qui muꞌ ñútyin yụ. Muꞌ nash yụ́tum carijtaqui, jeñej buꞌyi väc̣häꞌtyity Jenꞌtyiꞌ muꞌ, meꞌ chuti Jenꞌdyes muꞌ. 26Muꞌ fer jemonnac miꞌin, anic tárinac miꞌin ĉaĉaij na seꞌvaqui miꞌin junꞌ chuc japacjoij jiquej muꞌ. Yi muꞌ: "Vatyquej raꞌ fer tárin yụ in," yi muꞌ. 27Anicdye meꞌ muꞌ fer japacjoij jiquej, arajdye säñi. Muꞌ qui namꞌ Jenꞌ ñịbeꞌ jaĉuti, jajiꞌchäĉun. Jam mumꞌ ñịbeꞌ jaĉuti, yụ́mun chimeꞌ ñịbeꞌ ĉun, a vuty säñi jiquej jụijyaꞌ muꞌ, a vuty damꞌdye cächyiꞌ táris yụ. 28Mọꞌdyes yụ fercheꞌ mạꞌjeꞌ cavin jutebajte yụ muꞌve miꞌinyaꞌ paj qui maꞌjotyebajtinte miꞌin cạvebajtinteyaꞌ muꞌ miꞌin, yụ́smun raꞌ chimeꞌ faraj yoquedyeꞌ. 29Meꞌdye raꞌ miꞌin chimeꞌ maꞌjodyeꞌtum raꞌ tiĉunꞌbajtinte uts Epafrodito ĉaĉaij na vaj vojity miꞌintum Ayoꞌsiꞌyaꞌ vej muꞌ. Jämꞌjemac miꞌin, jämꞌjeyacsejamꞌ räj muꞌin meꞌ meꞌtyity in. 30Muꞌ nash fer carijtaqui Cristodyes, jämꞌ araj säñi carijtacdyeꞌyamꞌ, mijam ĉụiꞌ ñutsjiti, meꞌdye yụmꞌ dyijtun jedyeꞌ chuc jemoñes yụ, muꞌ fer ñútyin yụ. Mọꞌ miꞌin jam tupuj ñútyitiĉaꞌ yụ miꞌin, ĉaĉaij na itŝij miꞌin.
Aktuálne označené:
Filiposĉantyidyes 2: CAS
Zvýraznenie
Kopírovať
Porovnať
Zdieľať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright 2017 Nuevo Testamento en Chimane
Jen'si' P̂eyacdye'