Tashches Tesalonicaĉantyidyes 5
5
Jäꞌmij raꞌ jäꞌmiiꞌtyejaꞌ atsijban raꞌ Ayoꞌ tsun
1Vojity, jam yụ tupuj jéyac miꞌin junꞌsiꞌ chuc raꞌ ayij tupudyeꞌ Jenꞌsiꞌ muꞌ, ayidyeꞌ raꞌ muꞌ Ayos tsun, 2jam tupuj chị́jaꞌ ayidyeꞌ muꞌ Ayos tsun. Ayidyeꞌ raꞌ muꞌ yojdyemꞌ yirity shushuꞌaty muntyiꞌ u, tsedyedyeꞌ atsij, meꞌ raꞌ mọꞌ ayidyeꞌ Ayos tsun, jam raꞌ junꞌ chị́vaꞌjojaꞌ tsun, ĉụiꞌdye raꞌ muꞌ atsijban.#5:2 Mateos 24:43-44 3Junꞌsiꞌ chuc raꞌ yi jụijyaꞌ muntyiꞌ in: "Q̂uinꞌ tsun där maꞌjojaꞌ bäꞌjaꞌ, jam raꞌ jedyeyebajshaꞌ tsun", aty raꞌ yi jụijyaꞌ muntyiꞌ in, meꞌĉandye raꞌ tsäquiꞌsis tŝọ́tacsiꞌ. Jeñej yiris jạjtsis p̂en vátyequej tŝọ́taquiꞌ areꞌredyeꞌ basdyidyes mọꞌ, mọꞌ jam junꞌ jac̣honchutiꞌ, meꞌdye raꞌ muntyiꞌ chimeꞌ in, jam raꞌ méquiꞌ c̣hoñi in tsäquiꞌsisyaꞌ in. 4Miꞌin na vojity aty jam meꞌ miꞌin, jam raꞌ vátyequej tŝútyinac mọꞌ tupudyeꞌ Jenꞌsiꞌ ĉaĉaij na aty jam tojmadyeꞌĉan bäꞌyity miꞌin, mọꞌ raꞌ jam vátyequej mọmoꞌ miꞌincheꞌ tŝọiꞌ, muꞌ raꞌ jam jeñej shushuꞌaty muntyiꞌ tsedyedyeꞌ atsijtyiꞌ. 5Miꞌin aty mạijĉan bäꞌyity räj miꞌin, mạijquedyeꞌ meꞌchutiñeꞌ miꞌin. Tsun jam tojmadyeꞌĉan bäꞌjaꞌ tsun, aty jam mọꞌ cäc̣häꞌchujaꞌ tsun tojmas. 6Jemoñeꞌ jam ĉushtum bäꞌjaꞌ tsun, jam raꞌ jeñej yoctyiꞌ muntyiꞌ tsun. Jemoñeꞌ tsạꞌ buꞌjaꞌ tsun judyeyaꞌ ĉujcatiĉaꞌ chimeꞌ. 7Jeshaꞌ, tsedyedyeꞌ ĉọshi muntyiꞌ in, judyeyaꞌ chimeꞌ tsedyedyeꞌ tyeij in shuꞌqui in. 8Tsun na jam meꞌ, tsun mạijĉan bäꞌjaty tsun, jemoñeꞌ ĉujcatiĉaꞌ tsun. Jemoñeꞌ yejĉojaꞌ anicyejaꞌ Jenꞌcheꞌ judyeyaꞌ mạꞌjeyacsejaꞌ, judyeyaꞌ yejĉojaꞌ bisaĉaꞌ paj qui Jenꞌ jiꞌc̣honsinꞌ tsun. Anicyedyeꞌ tsun judyeyaꞌ mạꞌjitidyes tsun, mọꞌ jeñej buꞌyiꞌ ñutsjitidyes eꞌfeyaꞌ tsun, mọꞌ na bisacdyeꞌ Jenꞌdyes tsun, mọꞌ jeñej buꞌyiꞌ ñutsyedyes joꞌnoꞌches tsun. 9Jenꞌ jam meꞌ yuꞌsinꞌ paj qui muꞌ Jenꞌ vaꞌtacdyeꞌ soꞌmisinꞌ. Muꞌ yuꞌsinꞌ paj qui muꞌ jiꞌc̣honsinꞌ Jesucristo, Ayoꞌ tsun, 10muꞌ ijactyiꞌ tsundyes paj qui muꞌtum bäꞌjaꞌ atsijbanyaꞌ muꞌ. Meꞌ tsanꞌ jambiꞌ sänjaty jụijyaꞌ tsun, meꞌ tsanꞌ sänjaty tsun atsijbanyaꞌ muꞌ, yiriꞌyaꞌ raꞌ muꞌtum bäꞌjaꞌ. 11Vaj meij jiꞌmaꞌyitiĉamꞌ Jenꞌdyes, judyeyaꞌ chimeꞌ vaj meij ñútyitiĉamꞌ. Junꞌ chuc q̂uinꞌ miꞌin vaj meij jämꞌjitidyeij miꞌin, yejĉojamꞌ mọmoꞌ meꞌ bäꞌjamꞌ.
Jäquiꞌves jiꞌchäyitidyeꞌ Pablos
12Vojity, tsun fercheꞌ jéyac jemoñeꞌ ạ̈räjjeyacsi miꞌin muꞌin carijtaquity Jenꞌdyes in miꞌinĉantyiꞌ in. Muꞌ yụꞌtacsi Ayoꞌ paj qui muꞌin ĉujcanacve in judyeyaꞌ voroꞌtyinac in. 13Anic raꞌ jämꞌjeyacsi miꞌin judyeyaꞌ mạꞌjeyacsi miꞌin carijtacdyeꞌyaꞌ Jenꞌdyes muꞌin. Chimeꞌdye vaj meij jämꞌjitiĉamꞌ bäꞌjamꞌ mạꞌjitidyestum.
14Vojity, tsun fercheꞌ jéyac miꞌin paj qui fạraꞌjeyacsi miꞌin muꞌin toꞌomuntyiꞌ in jam chịj carijtaquity in. Jiꞌmaꞌyacsejamꞌ chimeꞌ muꞌin quiquijnaquity in, judyeyaꞌ nọ́tacsejamꞌ muꞌin itŝity ferdyeꞌ ĉojtyiꞌĉan in, chimeꞌdye dyichchutiĉamꞌ räjenꞌdyes muntyiꞌ in.
15Tyi chuc meꞌtyinactyiꞌ jụijyaꞌ in, jam raꞌ chimeꞌjetintedye miꞌin yoj jinacdyemꞌ muꞌ u, damꞌdye jämꞌ yụꞌtiñeꞌ ferdyeꞌ miꞌin paj qui vaj meij ñútyitidyeij bäꞌyi miꞌin, judyeyaꞌ chimeꞌ yoctyiꞌ nọ́tacsejamꞌ.
16Yejĉoij raꞌ maꞌjoij bäꞌyi miꞌin, 17pucmun cọdaĉamꞌ Jenꞌcheꞌ miꞌin. 18Jedyeꞌ chuc jịꞌĉojtiñeꞌ jụijyaꞌ miꞌin, meꞌ tsanꞌ ñịbedyes jịꞌĉojtiñeꞌ jụijyaꞌ miꞌin, jemoñeꞌ qui namꞌ yoshoropaij jétinte Jenꞌ mọꞌdyes miꞌin. Meꞌ nash mạꞌjeꞌ muꞌ Jenꞌ paj qui meꞌ bäꞌyi miꞌin anicjetintety Cristo Jesús miꞌin.
19Jam raꞌ dyäcjeĉunꞌbitinte Jenꞌsiꞌ Ạꞌedyeꞌ muꞌ, junꞌ chuc mạꞌjeꞌ mọꞌ, meꞌ raꞌ miꞌin, 20mijam raꞌ äcäijjeyacsebi miꞌin p̂eyacdyeꞌ muꞌin soꞌmactyiꞌ p̂eyacdyeꞌ Jenꞌyaꞌ in. 21Tashcheꞌ chum raꞌ jämꞌ cạvacsebi miꞌin jiꞌchäyitidyeꞌ muꞌin, vatyquej raꞌ rụijsis, vatyquej raꞌ jam. Rụijsis jụijyaꞌ muꞌin jụjjeyacsebi raꞌ miꞌin. 22Yacchuvac räj jedyeꞌ chuc aꞌc̣his, jam raꞌ damꞌ meꞌ bäꞌyi miꞌin.
23Yụ cọdyete Jenꞌ, muꞌ soꞌmisinꞌtyiꞌ maꞌjodyeꞌ ĉojtyiꞌĉandyes tsun, paj qui muꞌ yuꞌtyinac paj qui jam jụꞌñiij shupqui miꞌin muꞌsiꞌyaꞌ vej muꞌ, paj qui meꞌ shupqui miꞌin, räj aꞌ miꞌin judyeyaꞌ ạꞌedyeꞌ miꞌin judyeyaꞌ ĉojtyiꞌ miꞌin, paj qui jam jụꞌñiij shupqui miꞌin Jesucristosyaꞌ vej muꞌ Ayosyaꞌ tsun, aty atsijbanyaꞌ muꞌ. 24Muꞌ Jenꞌ fayinactyiꞌ jiquej miꞌin, muꞌdye raꞌ meꞌ yuꞌtyinac miꞌin paj qui jam jụꞌñiij shupqui miꞌin muꞌsiꞌyaꞌ vej muꞌ ĉaĉaij na muꞌ jịꞌcätsety p̂eyacdyeꞌ muꞌ.
Jadyiquis voryetacdyeꞌ Pablos muꞌ
25Vojity, cọdyetinte raꞌ miꞌin muꞌ Jenꞌ tsundyesiꞌ.
26Miꞌin chimeꞌ vaj meij raꞌ vorjitidyeij miꞌin voryedyeꞌ pụꞌsacdyeꞌ Jenꞌdyes.
27Ayoꞌsiꞌcheꞌ tịj muꞌ yụ jéyac miꞌin, jiꞌseꞌveyacsejamꞌ räj muꞌĉantyiꞌ anicjetety Jenꞌ in ọij q̂uinꞌ sánacdyeꞌ.
28Yụ cọdyete muꞌ Jesucristo Ayoꞌ tsun paj qui muꞌ soꞌminac jämꞌsiꞌ ñịbeꞌjitidyes muꞌ.
Aktuálne označené:
Tashches Tesalonicaĉantyidyes 5: CAS
Zvýraznenie
Kopírovať
Porovnať
Zdieľať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Copyright 2017 Nuevo Testamento en Chimane
Jen'si' P̂eyacdye'