Wúlúfè 1
1
Ìlímílɛ̀ wà e kɛ̀ì mìà o ló Móà
1-2Kɛ mɛ̀ĩ́-sà-ɓo mìà o tiã́ líé sí pìà Éézɛ̀lɛ̀ sɛ̀lɛ̀ káa, lɔ̀ɔ e dà sɛ́lɛ́ e kília yi. Lɛ̀ e kɛ kília, gɔ̃ doó lɛ́ e kɛ gó pìà Bɛ́féléhɛ̃́ɛ̃̀ pɛ̀lɛ̀ yí Zúdà sɛ̀lɛ̀ yí, lɛ́ e kɛ Ífélétà-mi káa e wɛ̀lɛ̀ e ló Móà sɛ̀lɛ̀ yí wà e na, ɛ̃́ɛ̃́ à gbe nì pèèlɛɛ o ka. Gɔ̃́ e kília tɔ́ lɛ́ Ìlímílɛ̀ wáà à na sì Nìómì, ɛ̃́ɛ̃́ a gbe nì pèèlɛɛ wáà o sì Málɔ̀ũ wà Kílíɔ̃̀. Lɛ̀ o kɛ yía, 3Ìlímílɛ̀ e ga, lɛ́ Nìómì wà e gbe nì pèèlɛɛ o tóa. 4À gbe nìa o Móà loà pèèlɛ lɛ́ o kɛ Ɔ́pà wà Wúlúfè o káa sí lee ká. Yé kɛ̀ɛ̀ vũ̀doó e diea, 5Málɔ̀ũ wà Kílíɔ̃̀ o ga, lɛ́ Nìómì e tó gbaa e doó ká, ɓii kɛ à dɛ̃ wà à gbe nì wàa ga.
Nìómì wà Wúlúfè o ló o mɛ̀ĩ́ Bɛ́féléhɛ̃́ɛ̃̀
6Yé lúó zàale e diea, Nìómì a ma Móà sɛ̀lɛ̀ yí kélɛ̀, Yàwɛ áà lúà kpɔ́ à mia nì mɔ̀ wà ta pɛ̀ áà li gbaa. A mɔ́ɔ̀ e dìè pɛ̀ kɛ e gó Móà sɛ̀lɛ̀ yi wà e gbe na nì pèèlɛ ka. 7Lɛ̀ o gbɛ̃̀ gbaa zuù wáà lò Zúdàà, 8Nìómì a gèe o lɛ̀ɛ, “Kà lo ka pà ka lèe nì píé. Yàwɛ é kɛ ka píé lɛ̀ zí kaà ka zò kɛ à ká m píé é dàa m mìà nì lɛ́ o gaa bàa ká. 9Ɛ̃́ɛ̃́ kà gó Yàwɛ é zi kɛ ɓe zeĩ́ ká gɔ̃ sí ka dìè kà é kɛ ɓe.”
Yelɛ́ Nìómì e o bè mi o gbɛ̃̀ wáà gbóó ɓoa. 10Lɛ́ wa gèe à lɛ̀ɛ, “Gbàaò! Kɔ̀à ɓi nì kɔ́à ló lóò i mìà nì píé.”
11Kɛɛ Nìómì a gèe o lɛ̀ɛ, “M̀ nɔ́ɔ̀ɓé, ka ló ka mɛ̀ĩ̀. Mɛ́ káá mɔ̀ɔ tó ɓóò m píé? Káà yí dɔ ḿm̀ bɛ̀i à mɔ̀ ḿ nɛ́ gɔ̃zɛ̀ ye zeĩ́ kɛ ká o sí? 12Kà ló ka mɛ̀ĩ̀ ka pà, maà kɛ kòlò kɛ ḿ gɔ̃ sí gbaa. É kɛ bɛ̃̀ɛ̃ à kɛ zì lɛ ɓe ḿ gɔ̃ sí bĩ́ã bà ḿ nɛ́ gɔ̃zɛ̀ yea, 13káà lo dɔɔ̀ wà lúó gɛ̀nɛ̀ ó fàa? Káà ló tèáà gɔ̃ gbɛɛ síìi mɔ̀ o wɛ̃́ĩ̀? Gbàaò! M̀ nɔ́ɔ̀ɓé, káà yí dɔ lɛ̀ɛ́ bɛ̀i kɛɛ. Lɛ nyɔ́ɔ̀ɔ m mɔ̀ e dieá ka là ɓii Yàwɛ aà é ko gbɛ̃̀ m mɔ̀.”
14Zéniía, o gbɛ̃̀ wáà gbóó ɓo. Ɔ́pà e e dɛ̃ lèe bè mi, lɛ́ a làapíé dà, áà yɛ́ e zí áà lò e pàa. Kɛɛ Wúlúfè e tó Nìómì píé. 15Lɛ̀ e kɛ kília, Nìómì a gèe Wúlúfè lɛ̀ɛ, “Lɛ̀ gɛ̃̀, i ɓɛ́ɛ mì aà ló e mìà nì píé, ɛ̃́ɛ̃́ wà Wálà nìa o píé, ɓi bɛ̃̀ɛ̃ ì yɛ́ i zí í tóá píé nɔ́ kíli.”
16Kɛɛ Wúlúfè a gèe Nìómì lɛ̀ɛ, “Yékɛ̀ í m yí lúó tò i píé pìà, ɛ̃́ɛ̃́ ɓáa gèe ḿ gó i pìè. Lɛ̀ i lo lóò à mɔ̀ɔ, lɛ́ m̀ lo lóò à mɔ̀ɔ, ɛ̃́ɛ̃́ lɛ̀ ì lo yàà mɔ̀ɔ, lɛ́ m̀ lo yàà mɔ̀ɔ, i mìà nì óò lo kɛɛ m mìà nì ka, ɛ̃́ɛ̃́ ɓà Wálà lɛ́ɛ̀ lo kɛɛ̀ m̀ Wálà ká. 17Lɛ̀ ì lo gaà mɔ̀ɔ, lɛ̀ɛ lɛ́ m̀ lo gaà mɔ̀ɔ, ɛ̃́ɛ̃́ lɛ̀ɛ lɛ́ ò ló m̀ bĩ̀ĩ̀ à mɔ̀ɔ. Gó Yàwɛ é wɔ̃́ gáàa kɛ m ká, yé pɛ gbɛɛ aà m ɓo i mɔ̀, lɛ́ yé wá ga ká kɛ é kò ɓi ko fĩ̀ã̀ ɓoá káá ká.”
18Lɛ̀ lɛ́ Nìómì a yí dɔ gbaa kélɛ̀ Wúlúfè aà yà e zò mɔ̀ é tóá píéa, e tèá gbaa à yí lúóa mɔ̀.
19Lɛ́ loà pèèlɛɛ o ló gbaa teele o ɓɔ Bɛ́féléhɛ̃́ɛ̃̀ pɛlɛia. Lɛ̀ o ɓɔɔ, Bɛ́féléhɛ̃́ɛ̃̀ pɛlɛi mìà séĩ́ lé e pa, lɛ́ loàa o gbɛ̀ɛ̀, “Káà gèe Nìómì lɛ́ɛ?”
20A gèe o lɛ̀ɛ, “Yé kɛ̀ ká ḿ sí Nìómì,#1:20: Nìómì: Tɔ́ e kéa yí lɛ́ e zò yà gé. kɛɛ kà m sí Máwàlà,#1:20 Máwàlà: Tɔ́ e kéa yí lɛ́ e pɛ̀ nyɔ́ɔ̀ɔ. ɓɔɔ wáá káa Yíkɛ̀-Gáàa-Séĩ́-Dàa-mì aà wɔ̃́ nyɔ́ɔ̀ɔ kɛ m ká. 21M ló m kɛ̀lɛɛ̀ paàa zɛ̀ ká, kɛ Yàwɛ aà nu m ká m kɛ̀lɛɛ̀ fèle zɛ̀ ká. Mɛ́ e kɛ lɛ́ kà m si Nìómì, yé Yàwɛ lɛ́ e Yíkɛ̀-Gáàa-Séĩ́-Dàa-mì káa aà wɔ̃́ nyɔ́ɔ̀ɔ kɛ m káa ká?”
22Zía lɛ́ Nìómì e nu à ká Bɛ́féléhɛ̃́ɛ̃̀ e mɛ̀ĩ̀ e góá ká Móà wà Wúlúfè à gbe na lɛ́ e kɛ Móà leenɛ̀ káa káa. E kɛ̀ làà wàà bálè yí lùò ka.
Aktuálne označené:
Wúlúfè 1: MHB
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás