Mt 8
8
IV. XB'AANUHOM LI JESUS (8,1—9,38)
Kik'irtasiik jun li saqlep rix
(Mk 1,40-45; Lk 5,12-16)
1Naq kikub'e chaq li Jesus chiru li tzuul, naab'aleb' li tenamit ke'taaqenk re. 2Toja' naq jun li winq saqlep rix kiwulak rik'in, kixwiq'ib' rib' chiru ut kixye re:
—Qaawa', wi taawaj, truuq tinaak'irtasi.
3Li Jesus kixye' li ruq' ut kixch'e':
—Twaj, tatk'iraaq, chan re.
Ut sa' junpaat ki'elk li saqlep chirix ut kik'iraak. 4Li Jesus kixye re:
—Il, maa'ani aj e chaye a'in; ayu b'an, k'ut aawib' chiru laj tij ut k'e laamayej li chaq'rab'inb'il xb'aan laj Moisés, re naq ch'olch'ooq chiruheb'.
Kik'irtasiik li xmoos jun xjolomileb' laj puub'
(Lk 7,1-10; Jn 4,46-53)
5Naq yo chi ok li Jesus Kafarnaúm, jun xjolomileb' laj puub' kiwulak rik'in, kirelaji ru 6ut kixye:
—At Qaawa', yokyo linmoos sa' kab'l, sik ut q'axal ra wank.
7Li Jesus kixye re:
—Laa'in tinxik, toxink'irtasi chaq.
8Kichaq'ok li xjolomileb' laj puub':
—At Qaawa', moko ink'ulub' ta naq tat-ok rub'el linmuheb'aal; ka'ajwi' taaye laawaatin ut taak'iraaq linmoos. 9Xb'aan naq jo'kan ajwi' laa'in wank ani nataqlank we, ut wankeb' aj puub' rub'el inwankil, ut ninye re junaq: «Ayu», ut a'an naxik; ut ninye re li jun chik: «Kim», ut a'an nachalk; ut ninye re linmoos: «B'aanu a'in», ut a'an naxb'aanu.
10Naq li Jesus kirab'i a'in, kisachk xch'ool ut kixye reheb' li yookeb' chi taaqenk re:
—Relik chi yaal ninye eere naq maajun aj Israel intawom wi' xnimal paab'aal jo' a'in. 11Ninye eere naq naab'aleb' te'chalq sa' releb'l ut sa' rokeb'l saq'e, ut tole'hilanq sa' meex rochb'eeneb' laj Abrahán, laj Isahak ut laj Jakob, sa' li xnimajwal wankilal li choxa; 12ut eb' li ke'b'oqe'k xb'enwa chi ok sa' li xnimajwal wankilal li choxa, te'isiiq ut te'tz'eqe'q sa' li aak'ab' chirix kab'l: aran taawanq li yaab'ak ut li k'uxuxink ruuch e.
13Chirix a'an kixye li Jesus re li xjolomileb' laj puub':
—Ayu ut chi'uxq aawe jo' naq xapaab'.
Ut kik'iraak li xmoos sa' ajwi' li honal a'an.
Kik'irtasiik li xna' li rixaqil laj Pedro
(Mk 1,29-31; Lk 4,38-41)
14Naq kiwulak li Jesus sa' rochoch laj Pedro, kiril li xna' li rixaqil, yokyo ut yo xtiq. 15Kixch'e' li ruq' ut li tiq ki'elk. Toja' naq kiwakliik li ixq ut ki'ok chi k'anjelak chiru.
16Naq ki'ewuuk, ke'k'ame'k chaq rik'in li Jesus naab'aleb' li eechaninb'ileb' xb'aan laj tza; kirisiheb' li maa'us aj musiq'ej rik'in li raatin ut kixk'irtasi chixjunileb' li yaj. 17Chi jo'kan kitz'aqlok ru li xyehom li propeet Isaías: “A'an kik'uluk re li qarahilal ut ki'iiqanink re li qayajel”.#8,17 Is 53,4.
Xtaaqenkil li Jesus
(Lk 9,57-62)
18Naq kiril li Jesus naq sutsu xb'aaneb' li k'iila tenamit, kixye:
—Xikaqo junpak'al li palaw.
19Toja' naq jun aj tz'iib' kiwulak rik'in ut kixye re:
—At Tzolonel, tatintaaqe yalaq ta b'ar tatxik.
20Li Jesus kixye re:
—Eb' li yak wankeb' xjob' sa' pek ut eb' li xul li neke'rupupik chiru choxa wankeb' xsuk, ab'an li K'ajolb'ej maak'a' wank re b'arwi' tixsotob' li xjolom.
21Jun chik reheb' li xtzolom kixye re:
—Qaawa', kanab'in wan chi xik chi xmuqb'al linyuwa'.
22Ut li Jesus kixye re:
—Taaqehin ut kanab'eb' li kamenaq chi xmuqb'aleb' li xkamenaq.
Kich'anaak li iq' chiru li palaw
(Mk 4,35-41; Lk 8,22-25)
23Naq ki'ok sa' li jukub', kitaaqeek xb'aaneb' li xtzolom. 24Ut sa' junpaat kichalk chiru li palaw jun kaqsut-iq' k'ajo' xnimal: namuqun li jukub' xb'aan li xkaw oq li ha'. A'ut li Jesus yo chi wark. 25Ke'jilok li xtzolom chi xk'atq, ke'rajsi ut ke'xye re:
—Qaawa', choohaakol xb'aan naq oso'k qe.
26Ut a'an kixye reheb':
—K'a'ut naq nekexxiwak laa'ex li jwal kach'in leepaab'aal?
Toja' naq kiwakliik, kixq'us li iq' ut li palaw, ut ch'anaamil kikanaak. 27Sachsookeb' xch'ool eb' li winq ut yookeb' chi xyeeb'al:
—K'a' chi winqul a'in naq a'atq li iq' ut li palaw neke'paab'ank chiru?
Eb' li eechaninb'ileb' xb'aan laj tza aran Gadara
(Mk 5,1-20; Lk 8,26-39)
28Naq kiwulak li Jesus junpak'al li palaw, sa' xch'och'eb' laj Gadara, wiib' li winq eechaninb'ileb' xb'aan laj tza ke'elk chaq sa'eb' li muqleb'aal kamenaq ut koxe'xk'ul. Eb' a'an q'axal xiwajeleb'; jo'kan naq maa'ani naru nanume'k sa' li b'e a'an. 29Tikto ke'xjap reheb' chi xyeeb'al:
—K'aru wank qe aawik'in, at Ralal li Yos? Ma xatchalk arin re qarahob'tesinkil chi toj maji' xq'ehil?
30Najt rik'ineb' a'an wank jun tuub' chi aaq, yookeb' chi ichajib'k. 31Ut eb' laj tza ke'xtz'aama chiru:
—Wi toohaawisi arin, taqlaho rik'ineb' li k'iila aaq a'an, chankeb'.
32Ut a'an kixye reheb':
—Ayuqex.
Ut naq eb' a'an ke'elk, koheb' rik'ineb' li aaq ut chi junpaat chixjunil li xk'ihaleb' ke'xkut rib' sa' xteram li uul, jun t'anikeb' sa' li palaw, ut aran ke'kamk.
33Eb' laj ilol aaq ke'elelik ut, naq ke'wulak sa' li tenamit, koxe'xye resil chixjunil li kik'ulmank; ke'xye ajwi' li k'aru ke'xk'ul li wankeb' maa'us aj musiq'ej rik'ineb'. 34Tikto ke'elk chaq chixjunil li poyanam chi xk'ulb'al li Jesus ut, naq ke'ril ru, ke'relaji ru naq chi'elq sa' li xch'och'eb'.
Выбрано:
Mt 8: QQC
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Q'eqchi DC Bible © Bible Society in Guatemala, 2005.