Mt 7
7
Mexraqok aatin
(Lk 6,37-38, 41-42)
1“Mexraqok aatin re naq ink'a' taaraqmanq aatin sa' eeb'een. 2Xb'aan naq jo' chanru nekexraqok aatin laa'ex, jo'kan ajwi' naq taaraqmanq aatin sa' eeb'een; ut rik'in li b'isleb' nekexb'isok wi', texb'ise'q ajwi' laa'ex.
3“K'a'ut naq nakawil li mul li wank sa' ru laawas aawiitz'in ut ink'a' nakak'e reetal li tz'amb'a wank sa' laawu laa'at? 4Chan put ru naq taaye re laawas aawiitz'in: «Wisihaq wan li mul sa' laawu», ut wank li tz'amb'a sa' laawu laa'at? 5At aj ka'pak'al u, isi wan li tz'amb'a sa' laawu; chi jo'kan tat-iloq chi us ut tatruuq risinkil li mul sa' ru laawas aawiitz'in.
Meemux li k'aru q'axal sant
6“Meek'e li k'aru q'axal sant reheb' li tz'i', chi moko chekut leelemtz'il q'ol chiruheb' li aaq: mare anchal te'xyeq'i sa' roqeb', te'xsutq'isi chaq rib' ut tole'xt'upi laa'ex.
Chextz'aamanq
(Lk 11,9-13; 6,31)
7“Chextz'aamanq ut k'eek'ooq eere; chexsik'oq ut teetaw; chexb'oqoq chire kab'l ut tehe'q cheru. 8Xb'aan naq chixjunil li natz'aamank nak'uluk; li nasik'ok natawok, ut li nab'oqok chire kab'l natehe'k chiru.
9“Ma wank tab'i' junaq eere laa'ex tixb'aanu a'in: wi li ralal tixpatz' xwa, tixk'e raj junaq pek re; 10ut wi tixpatz' junaq xkar, ma k'anti' tab'i' tixk'e re? 11Jo'kan utan, wi laa'ex li moko chaab'ilex ta nekenaw xk'eeb'al li chaab'il simaatan reheb' leeralal eek'ajol, ma toja' ta chik leechoxahil Yuwa' ink'a' tixk'e li q'axal chaab'il reheb' li neke'tz'aamank chiru!
Li xyi li Chaq'rab'
(Lk 6,31)
12“Jo'ch'inal jo'nimal li teeraj raj naq te'xb'aanu eere leeras eeriitz'in, cheb'aanuhaq ajwi' laa'ex reheb' a'an, xb'aan naq a'an a'in xyaalal li Chaq'rab' ut eb' li Propeet.
Li wiib' chi b'e
(Lk 13,24)
13“Okanqex sa' li okeb'aal kach'in ru xb'aan naq nim ru li okeb'aal ut nim ru li b'e nak'amok sa' li kamk chi junelik, ut naab'aleb' li neke'ok aran. 14Ab'an q'axal laatz' ru li okeb'aal ut kach'in ru li b'e nak'amok sa' li yu'amej, ut ink'a' k'iheb' li neke'tawok re.
Eb' li propeet aj b'alaq'
(Lk 6,43-44)
15“Chekolaq eerib' chiruheb' li propeet aj b'alaq': neke'chalk eerik'in chi tiqtookeb' chaq rik'in rix karneer, ab'an sa'eb' li xch'ool chanchaneb' li josq' aj xojb'. 16Rik'in li te'ruuchin teenaweb' ru. Ma nasik'mank tab'i' li uub' sa' li k'ix malaj eb' li iig sa' li pajl? 17Jo'kan naq chixjunil li chaab'il che' chaab'il li ru naxk'e, ab'an li che' ink'a' us ink'a' ajwi' us li ru naxk'e. 18Junaq chaab'il che' ink'a' naruuchin li ink'a' us, chi moko naru naq li ink'a' usil che' chaab'il ta li ru tixk'e. 19Chixjunil li che' ink'a' us li ru naxk'e, taayok'manq ut taakutmanq sa' xam. 20Jo'kan utan rik'in li te'ruuchin teenaweb' ru.
Eb' li xtz'aqal tzolom li Jesus
(Lk 13,25-27; 6,47-49)
21“Moko chixjunil ta li nayehok we: «Qaawa', Qaawa'», taa'ok sa' li xnimajwal wankilal li choxa, taa'ok b'an li taab'aanunq re li rajom linchoxahil Yuwa'. 22Naab'aleb' te'yehoq we sa' li kutan a'an: «Qaawa', Qaawa', ma ink'a' tab'i' xoo'aatinak jo' propeet sa' aak'ab'a', ut xoo'isink maa'us aj musiq'ej sa' aak'ab'a', ut xqab'aanu naab'al sachb'ach'oolej sa' aak'ab'a'?». 23Toja' naq tinye reheb': «Maajun wa xinnaw eeru. Elenqex chiwu, ex aj b'aanuhom maa'usilal!».#7,23 Sal 6,9.
24“Jo'kan utan, chixjunil li na'ab'ink reheb' li waatin a'in ut naxk'anjela ru, chanchanaq li winq wank xna'leb' li kikab'lak sa' xb'een pek. 25Kichalk li hab', kiwank li b'ut'iha', kixk'e li kaqsut-iq' ut koxe'xpik'a rib' chiru li kab'l a'an, ut ink'a' kit'ane'k xb'aan naq k'ojob'anb'il sa' xb'een pek. 26Ut chixjunil li na'ab'ink reheb' li waatin a'in ut ink'a' naxk'anjela ru, chanchanaq li winq maak'a' xna'leb' li kikab'lak sa' xb'een samahib'. 27Kichalk li hab', kiwank li b'ut'iha', kixk'e li kaqsut-iq' ut koxe'xpik'a rib' chiru li kab'l a'an ut kit'ane'k, ut k'ajo' xrahil kixk'ul”.
Ke'sachk xch'ool chi rab'inkil
(Mk 1,22; Lk 4,32; 7,1)
28Naq li Jesus kiraqe'k chi xyeeb'al eb' li aatin a'in, sachsookeb' xch'ool ke'kanaak li k'iila tenamit rik'in li xk'utum, 29xb'aan naq naxtzoleb' chi wank xwankil, ut ink'a' jo'eb' laj tz'iib'.
Выбрано:
Mt 7: QQC
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Q'eqchi DC Bible © Bible Society in Guatemala, 2005.