2-Петру 2
2
Тапан муаллимар
(Ягьуд 1:3-19)
1Амма, халкьдин арада тапан пайгъамбарар хьайивал, гьа саягъда куь арадани тапан муаллимар пайда жеда. Абуру пуч хьунихъ тухудай аси къайдаяр кардик кутада. Абуру чпин паталай эвез гайи, Вири Ихтияррин Иеси гьатта инкаризни жеда ва идалди чпин ажал мукьвал ийида. 2Гзафбур абурун рекье аваз фида, явавиле уьмуьр тухуда, ва абуруз килигна гьакъикъатдин рехъ тегьнедик акатда. 3И муаллимри, темягькарвилин гьевесар аваз, гьар жуьредин тапаррикай менфят къачуз, квелди чпиз девлетар кӀватӀда. Абурун кьилелай фадлай жаза куьрс хьанва, абурун кьиникь ксанвач.
4ГьикӀ лагьайтӀа, Аллагьди гунагь авур гьатта малаикризни инсаф авунач, абур, мичӀивилин зунжурра туна, чеб дуванди вилив хуьзвай жегьеннемдиз гадарна. 5Ада къадим дуьньядиз инсаф авунач, амма, чалкечир дуьньядал яд акьалтиз турла, анжах гьахъ-михьивилин вязердар Нуьгь ва адахъ галаз мад ирид кас хвена. 6Ада, гележегдин чалкечирриз тагьким яз руьхъ авуналди, Садумни Гамур шегьерриз кар атӀана. 7Амма вич элкъуьрна кьунвай явавал акуна чара атӀай гьахъ-михьи Лут хиласна. 8Къайда авачир крар акур чӀавуз ва абурукай ван хьайи чӀавуз и гьахъ-михьи касди гьар юкъуз азият чӀугвазвай.
9Аллагьди вири и крар авунатӀа, гилани Аллагьдиз муъминбур синагъдикай гьикӀ хилас ийидатӀа ва къанун гвачирбур дувандин юкъуз жаза патал гьикӀ хуьдатӀа чизва. 10Им иллаки вичин къаматдин усал гьевесрин жилавда аваз физвайбуруз ва гьукум инкарзавайбуруз талукь я.
Ихьтин инсанар терс я, абуру чпиз кӀандайвал ийизва ва, баркалла алайбурукай чӀуру гафар лугьудайла, абур кичӀела зурзазвач. 11Амма гьа са вахтунда абурулай гзаф къуват авай ва чпиз чӀехи тир гьукум ганвай малаикрини Реббидин вилик баркалла алайбурук тахсирар кутадайла, абурун намусдик хкуьрзавач. 12И инсанар акьул авачирбур, тӀебии гьиссери гьерекатда твазвай ва чеб кьуна кьил атӀун патал ханвай гьайванар хьтинбур я. Чеб гъавурда такьазвайдакай абур чӀуру гафар рахазва. Абур, гьайванар хьиз, рекьинни ийида. 13Масадбуруз авур вири писвилерай абурув кьисас агакьда. Абурун чпин лезет, регъуь тахьана, гьатта экв алай юкъузни сархуш кефер галай тӀуьн-хъунра вахт акъудун яз гьисабзава. Чпин тапан лезетрикай кеф хкудиз, абуру куь уртах нагьарар беябурзава ва чиркинарзава. 14Абурун вилер гьашервилив ацӀанва; абур гунагьар авуна тух тежербур я. Абуру мягькем тахьанвай руьгьер алцурарзава. Абурун фикирар анжах регьятдиз гьатдай къазанжидикай я. Абур лянетдик кутунва. 15Абур, дуьз рекьелай элячӀна, Басаран хва Билъаман рекьяй физва. Билъамаз нагьахъ кардай къазанжи кӀандай, 16ва адан тахсиркарвилер винел акъуднай; сиве мез авачир диши ламра, инсандин чӀалалди рахуналди, пайгъамбар вичин диливиликай хвенай.
17И инсанар яд авачир булахар я, жинжи гару#2:17 Жинжи гар – алчуд жез-жез фидай гар. тухузвай циф я. Абур виле эцязавай тӀуб таквадай мичӀивили вилив хуьзва. 18Абуру, инсандин зайифвилерихъ ва гьевесрихъ галаз къугъунар ийиз, кӀеви ван галай, амма кьуру гафар лугьузва. Гьа икӀ абуру рекьел татана уьмуьр тухузвайбурукай анжах азад жез гатӀуннавайбур чпел желб ийизва. 19Чеб чӀуру крарин лукӀар ятӀани, абуру инсанриз азадвал хиве кьазва. ГьикӀ лагьайтӀа инсан, вич куьз муьтӀуьгъ хьанватӀа, гьадан лукӀ я. 20Абур чи Ребби ва Хиласкар Иса Месигь кьатӀун себеб яз и дуьньядин чӀурувиликай азад хьанатӀа, амма ахпа мад а писвал чпел алчуд хьана абур магълуб хьанатӀа, абур авай эхиримжи гьал виликандалай генани писди я. 21Гьахъ-михьивал чир жердалай ва абуруз ганвай пак тагькимдихъ далу элкъуьрунилай гьахъ-михьивилин рехъ гьич чир тахьанайтӀа абур патал хъсан тир. 22Ихьтин ксарин кьилел атайдакай мисалри дуьз лугьузва: «КицӀ вичи экъуьчайдан патав хкведа» ва «Чуьхвей вак кьарада къатадиз фида».
Выбрано:
2-Петру 2: ЛезПК
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Институт перевода Библии, 2010-2024