2-Петру 3
3
Реббидин югъ алукьун
1Им, кӀанибур, квез зи кьвед лагьай чар я. И чарар за квез, рикӀел хкун яз, кьил-кьилеллаз фагьум авунихъ эверун патал, кхьейбур я. 2Алатай вахтара пак пайгъамбарри лагьай гафар ва куь патав ракъурай илчийри агакьарай Реббидинни Хиласкардин тагьким куьне рикӀел хуьх.
3Виридалайни вилик куьне эхир алукьдай вахтара кӀеви чин алай ягьанатбазар пайда жедайди рикӀел хвена кӀанда. Абуру чпин усал гьевесрин жилавда аваз физ, ягьанатдив хъуьрез 4ва лугьуз жеда: «Ам хтунин месэла гьикӀ хьанай? Адан аямдарар кьейидалай инихъ вири гьа халкь хьайидалай инихъ гьикӀ авайтӀа, гьакӀ амазма эхир». 5-6Амма каинат лап дегь заманра Аллагьдин Гафуналди халкь хьайиди, ятар кӀватӀна ва ахпа кьурамат пайда хьайиди, гьакӀни виликан дуьнья ядаландик#3:5-6 Ядалан – зурбадаказ яд акьалтун. кутуна чукӀурайди абуру инкарзава. 7Гилан цав ва чил лагьайтӀа, Аллагьдин гьа гафуналди хуьзва, абур дувандин югъ алукьдалди ва чалкечир инсанар цӀа кудалди тазва.
8Са кар инкармир, кӀанибур: Ребби патал са югъ агъзур йис хьиз я ва агъзур йис са югъ хьиз я. 9Аллагьди Вичи гайи гаф кьилиз акъудун, са бязибуру идаз гежел вегьин лугьузватӀани, кьулухъ чӀугвазвач. Са ни ятӀани эбеди уьмуьр квадар тавуна кӀанз, амма вирида Аллагьдин рекьел атана кӀанз, Ада яргъалди эхзава ва вил алаз акъваззава. 10Реббидин югъ, угъри хьиз, къведа. А чӀавуз цав къукърумар ийиз квахьда, цава авай эфлакьар#3:10 Эфлакьар – планетаяр. цӀа цӀрада, чилни гьакӀ жеда, адал алай вири крар винел акъатда.
11Вири икӀ чкӀиз хьайитӀа, куьн гьихьтинбур хьун лазим я? Куьне паквиле ва муъминвиле, 12цавар цӀу чукӀурдай ва зегьемда цавун эфлакьар цӀрадай Аллагьдин югъ атунал вил алаз ва ам фад къведайвал ийиз, уьмуьр тухвана кӀанда. 13Амма чна, Аллагьди хиве кьурвал, чпе гьахъ-михьивал авай цӀийи цавни, цӀийи чил вилив хуьзва.
Эхиримжи тагькимар
14Гьавиляй, кӀанибур, и кар вилив хуьз, куьн Адаз леке алачирбур яз, рехне квачирбур яз ва меслятда аваз уьмуьр тухузвайбур яз жагъун патал, алакьдай вири ая. 15Чи Реббиди авиляй яргъалди сабур ийизва хьи, Адаз куьн хилас хьана кӀанзава. Гьа и кардикай чи играми стха Павелани, вичиз Аллагьди гайи камалдиз хас тирвал, квез кхьенай. 16Идакай ада вичин вири чарара кхьизва. Абура гъавурда акьаз регьят тушир чкаяр авачиз туш, а чкаяр авам ва тестикь тахьанвай ксари, чпин чан пуч хьунал гъидайвал ийиз, маса Каламарни хьиз, чӀуру патахъди дегишарзава.
17Гьавиляй, кӀанибур, и кардикай виликамаз чиз, куьн къанун гвачирбурун чӀуру рекьери чпел желб тавун патал ва куьне куь даях квадар тавун патал, мукъаят хьухь. 18Чи Ребби ва Хиласкар Иса Месигьдин берекатда ва Ам кьатӀунин карда къвез-къвез чӀехи хьухь. Гьадаз къе ва эбеди яз баркалла хьурай! Амин.
Выбрано:
2-Петру 3: ЛезПК
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© Институт перевода Библии, 2010-2024