Luk 24
24
Uvaʼs titzʼeʼv vet quBʼaal Jesuus inpaqte
Tio 28.1-10; Kuxh 16.1-8; Xhun 20.1-10
1Aʼxhetz ibʼant vet u bʼaxa qʼij tetz u xhemaana, tul qʼalaʼm, bʼen inqʼa ixoq tuchʼ jolt imol tal uvaʼ muqtxʼik Jesuus. Tul tiqʼo inqʼa txʼumbʼisabʼal uvaʼ maʼtich ibʼant tutxheʼ. 2Aqʼbʼetz vet inqʼa ixoq tziʼ u jul, tul tilaq veteʼ uvaʼ maʼtich vet teesal el u sivan titziʼ u jul. 3Yaʼne pal vet ok inqʼa ixoq tuul u jul. Tul yeʼ motx ileq vet vitxhiʼoʼl u quBʼaal Jesuus. 4Tul yekich kuxh sotz vet ikʼuul inqʼa ixoq uvaʼs tiltaʼ uvaʼ yeʼlich vet vitxhiʼoʼl Jesuus. Yaʼne ajtxh til inqʼa ixoq txaklich vet kaʼvaʼl inqʼa aanxel s-kʼatza, echichaqe vinaq. Tul litzʼkabʼinyichxh ikaʼy toksaʼm inqʼa aanxel. 5Tul motx ijoqbʼa vet kuʼ tibʼ inqʼa ixoq t-txʼavaʼ. Tan mam xoʼval motx tzajaq vet s-tiʼ.
Yaʼne ech tal inqʼa aanxel te inqʼa ixoq s-eche: —Yeʼ kuxh txhokon vet ex xoʼl inqʼa kamnaʼq. Tan ¡qat itzʼeʼvy uvaʼ nik etxhokeʼ! 6Tan ¡yeʼl vet tzitza! ¡Qat itzʼeʼvy inpaqte! Pet ulsavaq sekʼuul uvaʼs talt ka sexoʼl uvaʼs yeʼnaqich tzaoq ex tuulbʼal Galileea s-tuchʼ. 7Tan ech tal s-eche: «Poro tetxhal toq oksaloq in tiqʼabʼ inqʼa xaol, inqʼa aj paʼvom, kʼuxh inxh u Kʼaola uvaʼ qat bʼen in s-alam aanima. Tul toq aqʼaxoq jaʼ in vatz kurus; atz toq yatzʼaxoq el in. Pet titoxv qʼij, tul laʼ itzʼeʼv in inpaqte,» xeʼte, —xeʼt inqʼa aanxel te inqʼa ixoq.#Tio 16.21; Kuxh 8.31; Luk 18.31-33
8Uletz vet viyol Jesuus s-kʼuul inqʼa ixoq,#Luk 9.2-22; 18.31-33 9tul qʼaʼvaq vet tzaan tal uvaʼ muqtxʼik vitxhiʼoʼl Jesuus. Tul ex tal vet inqʼa yol te jun lavat inqʼa nikich itxhus tibʼ kʼatz Jesuus, atz te jolt inqʼa niman tetz Jesuus.
10Aʼetz Mal, u aj tenam Magdaala, ex alon inqʼa yol te inqʼa apoostol, tul imolich tibʼ Mal tuchʼ Xhiv, atz tuchʼich Mal, vitxutx Jakoovo, atz tuchʼich jolt inqʼa ixoq, inqʼa txhʼuyichaq s-tiʼ. 11Tul yeʼ motx iqeja, tan tira yeʼlich tokebʼal viyol inqʼa ixoq vatz inqʼa apoostol.
12Pet Luʼ, tan taʼn kuxh tabʼi Luʼ inqʼa yol, tul qʼex ibʼen Luʼ tiʼ tilix tal uvaʼ muqtxʼik vitxhiʼoʼl Jesuus. Aqʼbʼetz vet Luʼ tal uvaʼ muqtxʼik Jesuus, tul til okaʼp Luʼ uvaʼ yeʼxhabʼil atich vet s-tuul. Pet taʼnich kuxh vet inqʼa bʼuʼq inqʼa bʼanbʼel tiʼ ibʼatxhax vitxhiʼoʼl Jesuus til Luʼ. Tul qʼaʼv vet tzaan Luʼ t-otzotz. Poro tira kaj taanima Luʼ, tiʼ uvaʼ tila.
Uvaʼs ikʼutxht tibʼ quBʼaal Jesuus te kaʼvaʼl inqʼa nikich itxhus tibʼ s-kʼatza tiʼ u bʼey uvaʼ yek tu tenam Emauus
Kuxh 16.12-13
13Antetzxh tuulbʼal u bʼaxa qʼij tetz u xhemaana, tul aalich ibʼen vet kaʼvaʼl inqʼa niman tetz Jesuus t-val u tal tenam Emauus, uvaʼ kaʼvaʼlich oora ixoʼl tuchʼ u tenam Jerusaleen. 14Tul sebʼtichaq iyolt tiʼ bʼey kam inqʼa motx utxh tiʼ Jesuus. 15Tuulbʼaletz uvaʼs nikich motx iyoloneʼ, tul ajtxh motx til pal txʼakaxoq tiʼ bʼey taʼn Jesuus. Tul ok vet bʼen Jesuus s-tiʼ. 16Poro yeʼaq motx bʼen s-te oq uvaʼ Jesuus uvaʼ txhʼuyich s-tiʼ.
17Yaʼne ech tal Jesuus s-eche: —¿Kam yolile uvaʼ nik motx eyol tiʼ bʼey, txa? —xeʼt Jesuus. Tul txakeʼv vet inqʼa vinaq, tul txumuʼmaqich kuxh ala.
18Atichetz vaʼl u niman tetz Jesuus uvaʼ Kleoofasich ibʼij. Tul ech tal te Jesuus s-eche: —Taʼnetzebʼ kuxh vet axh xoʼl jankʼal inqʼa xaol, inqʼa qat ul ilon u nimla qʼij tu Jerusaleen, yeʼ ootzaqin tetz kam inqʼa yol uvaʼ qat motx utxh tuulbʼal u tenam t-inqʼa qʼij inqʼaa tiʼ inimal u nimla qʼij Ipal Aanxel, —xeʼt Kleoofas.
19Tul ech tal Jesuus s-eche: —¿Kametz qat utxhi? —xeʼt Jesuus.
Tul ech motx tal s-eche: —Aʼ nik quyol inqʼa yol tiʼ Jesuus, u aj Nasareet. Tan qʼexsanich tetz viyol quBʼaal Tiuxh Jesuus. Atz atichxh tiqleʼm Jesuus taʼn quBʼaal Tiuxh. Atz mam kaebʼal aanima nikich ibʼan Jesuus. Tul mam xaol ilon, atz mam xaol abʼin.
20Aʼetz vet, inqʼa iqʼesal oksan yol vatz Tiuxh tuchʼ jolt inqʼa iqʼesal u tenam, oksan ok Jesuus tiqʼabʼ inqʼa iqʼesal aj Rooma tiʼ taqʼax kuʼ yol tinuqul tiʼ iyatzʼax el Jesuus vatz kurus. 21Pet aʼ nikich qitzʼa uvaʼ, aʼ Jesuus laʼich chiton oʼ tiqʼabʼ inqʼa nik itxhiʼan tiʼ u qutenam, oʼ inqʼa tij imam Israeel. Poro ech koqe. Tan itoxv vet qʼije s-txheelaʼ ikam Jesuus. 22Aloq nik isotz inbʼiil qukʼuul taʼn jolol inqʼa ixoq, inqʼa qumol, inqʼa qat ex ilon u jul s-qʼalaʼm tal uvaʼ ex muqtxʼik Jesuus.
23Tul: «Yeʼl vet vitxhiʼoʼl Jesuus tal uvaʼ muqtxʼika,» chich tul inqʼa ixoq s-qe. Atz qat tal inqʼa ixoq uvaʼ qat ikʼutxh tibʼ kaʼl inqʼa aanxel, chi, s-te. Tul ech qat tal inqʼa aanxel chi, s-eche: «¡Il Jesuus itzʼlel veteʼ!» chich inqʼa aanxel chi, te inqʼa ixoq.
24Yaʼne qat ex kaʼt inqʼa qumol tiʼ tilix tal uvaʼ muqtxʼik Jesuus. Tul qat motx tila chi, uvaʼ nuq bʼakxh u yol uvaʼ qat ul tal inqʼa ixoq. Tan yeʼl vet vitxhiʼoʼl Jesuus chi, tal uvaʼ muqtxʼika. Poro yeʼl Jesuus chi qat motx tila, —chichichaq inqʼa vinaq te Jesuus.
25Yaʼne ech tal Jesuus s-eche: —¡Tira sotznaʼql ekʼuul! Atz tira tijxh ekʼuul tiʼ iqeex jankʼal inqʼa tzʼibʼamal ka taʼn inqʼa qʼexsanich tetz viyol quBʼaal Tiuxh tiʼ u Kriisto. 26¿Maqetz yeʼ nik tul vet sekʼuul uvaʼ tetxhal laʼ pal u Kriisto t-inqʼa mam kʼaxkʼo, yaʼne laʼ itzʼeʼv inpaqte?, tul laʼ bʼen t-amlikaʼ kʼatz quBʼaal Tiuxh tuchʼ u nimla tatineʼ, —xeʼt Jesuus te inqʼa vinaq.
27Yaʼne xeʼt Jesuus tiʼ talax inuqul inqʼa yol uvaʼ tzʼibʼamich ka s-tiʼ taʼn Moisees, tetxhal taqʼbʼ Jesuus tiʼ talax inqʼa yol uvaʼ alelich ka taʼn jankʼal inqʼa qʼexsanich tetz viyol quBʼaal Tiuxh. Tul tziʼtzotxhichxh ibʼen Jesuus tiʼ talax txhaq tzolol inqʼa yol uvaʼ tzʼibʼamal ka tuul viyolbʼal quBʼaal Tiuxh.
28Aqʼbʼetz vet inqʼa vinaq tu tal tenam Emauus uvaʼ kʼaqichaq taʼn, tul ibʼan kuxh Jesuus vatz, uvaʼ eche niim kʼaqich taʼn Jesuus.
29Yaʼne iyaʼlu kaʼvaʼl inqʼa niman tetz Jesuus ikaj Jesuus s-kʼatza. Tul echaq motx tal te Jesuus s-eche: —Kaen s-qukʼatza, tan kuʼy vet qʼij. Tul ile toq qʼeqxoq veteʼ, —xeʼtaqe.
Yaʼne bʼen vet ok Jesuus tiʼ inqʼa niman tetz. Tul kaj vet Jesuus s-kʼatza.
30Oketz vet Jesuus viʼ meexha tuchʼ kaʼvaʼl inqʼa niman tetz, tul itxey Jesuus val u paan. Tul ijaq Jesuus vibʼaʼnil quBʼaal Tiuxh s-tiʼ. Yaʼne ipil Jesuus s-tuul. Tul taqʼ vet Jesuus te kaʼvaʼl inqʼa niman tetz. 31Yaʼnetze ibʼensa vet quBʼaal Tiuxh s-te tiʼ tootzaqil Jesuus. Tul ajtxh til isotz vet Jesuus s-vatz.
32Yaʼne ech motx tal vet s-eche: —¡Xaʼt bʼake oqxh ichiil tokaʼp inqʼa iyol t-qaanima uvaʼs nik iyolon s-qe tiʼ bʼey, atz uvaʼs nik talt inuqul inqʼa yol s-qe, inqʼa tzʼibʼamal ka tuul viyolbʼal quBʼaal Tiuxh taʼn jankʼal inqʼa qʼexsanich tetz viyol quBʼaal Tiuxh! —chichichaq vet s-vatzaq.
33Poro yekichaq motx qʼaʼv vet tu tenam Jerusaleen. Tul yekichaq vet tal uvaʼ kʼulich tibʼ junlavat inqʼa apoostol, atz jolt inqʼa niman tetz Jesuus.
34Tul ech motx tal inqʼa kʼulich tibʼ te kaʼvaʼl inqʼa tzaj t-Emauus s-eche: —¡Nuq bʼakxhtuʼ uvaʼ qat itzʼeʼvy u quBʼaal Jesuus inpaqte! Tan qat ikʼutxh tibʼ te Simoon, —xeʼtaqe.
35Yaʼne xeʼt vet kaʼvaʼl inqʼa niman tetz Jesuus tiʼ talax ok kam uvaʼ motxaq ibʼan tiʼ bʼey, atz keʼch motx ibʼen s-te uvaʼ Jesuusich bʼak uvaʼ pixhon u paan.
Uvaʼs ikʼutxht vet tibʼ Jesuus xoʼl inqʼa nikich itxhus tibʼ s-kʼatza
Tio 28.16-20; Kuxh 16.14-18; Xhun 20.19-23
36Sebʼt telichetz iyolon kaʼvaʼl inqʼa qʼaʼv tzaan t-Emauus, tul ajtxh motx til itxhej Jesuus s-xoʼl. Yaʼne ech tal Jesuus s-eche: —Vibʼaʼnil quBʼaal Tiuxh laʼ atin tetaanima, —xeʼt Jesuus. 37Tul yekichxh motx samunaq veteʼ. Atz tira motx xoʼv veteʼ. Tan aʼ motx titzʼa uvaʼ txhitxh nikich motx tileʼ.
38Yaʼne ech tal Jesuus s-xoʼl s-eche: —¡Kam s-tiʼil nik kuxh isotz ekʼuul, nik vileʼ! Tul ¡kam kuxh nik etitzʼa tetaanima! Chiibʼebʼalxh ex oq yeʼ laʼ ebʼan kaʼl ekʼuul s-viʼ. 39Tan saqivaq inqʼa inqʼabʼ tuchʼ inqʼa voq, etileʼ. Tul kanvaq. Tan ine. Tan bʼane at koq itxhibʼil, atz ibʼaqil invaʼq txhitxh, eche u vatineʼ, —xeʼt Jesuus xoʼl inqʼa nikich itxhus tibʼ s-kʼatza.
40Sebʼtichetz talt Jesuus inqʼa yol inqʼae, tul ikʼutxh Jesuus inqʼa takʼoʼm tiqʼabʼ tuchʼ inqʼa t-toq. 41Tul yekichxh motx chiibʼ veteʼ. Atz kaayaqichxh vet taanima, tiʼ uvaʼ itzʼlich vet Jesuus. Poro yeʼ tel kuxh nikich motx iqejeʼ, kʼuxh nikichxh motx ichiibʼ vet tiʼ Jesuus.
Yaʼne ech tal Jesuus s-eche: —¿Maq laʼ txhej invaʼq intxʼix sexeʼ? —xeʼt Jesuus.
42Tul motx taqʼ inbʼiil u votzʼim txay te Jesuus tuchʼ inleʼpt taʼl kabʼ. 43Ikʼuletz vet Jesuus, tul tetxhbʼu vet Jesuus ech ivatz inqʼa nikich itxhus tibʼ s-kʼatza.
44Yaʼne ech tal Jesuus s-eche: —Eyaʼpetz vet inqʼa yol, inqʼa nikich val sete uvaʼ yeʼnaqich yatzʼaxoq eʼl in sexoʼl. Tan tetxhal kuxh laʼich elaʼpun jankʼal inqʼa yol, inqʼa tzʼibʼamal ka s-viʼ taʼn Moisees, atz taʼn inqʼa qʼexsanich tetz viyol quBʼaal Tiuxh, atz inqʼa tzʼibʼamal ka t-inqʼa Saalmo, —xeʼt Jesuus te inqʼa nikich itxhus tibʼ s-kʼatza.
45Yaʼne taqʼ vet Jesuus tootzaqibʼal inqʼa nikich itxhus tibʼ s-kʼatza tiʼ ibʼen inqʼa yol s-te, inqʼa tzʼibʼamal ka tuul viyolbʼal quBʼaal Tiuxh tiʼ Jesuus. 46Tul ech tal Jesuus s-eche: —Ech tzʼibʼamal ka taʼn inqʼa qʼexsanich tetz viyol quBʼaal Tiuxh s-eche: «Tetxhal laʼ pal u Kriisto tu kʼaxkʼo, tul laʼ itzʼatxh inpaqte titoxv qʼij,» chiche.#Oseeas 6.2 47Atz antxh inqʼa qʼexsan tetz viyol quBʼaal Tiuxh alon uvaʼ, tetxhal laʼ paxsal inqʼa yol tuulbʼal inqʼa tenam s-kaqaayil tuchʼ ibʼij u quBʼaal Tiuxh. Echetz laʼ motx titzʼat tibʼe inqʼa xaol t-inqʼa ipaʼv. Atz laʼ motx ijaq ikuya vatz quBʼaal Tiuxh. Aʼetz laʼ xeʼtik paxsaloq inqʼa yol tiʼ quBʼaal Tiuxh tu tenam Jerusaleen. 48Tul aʼ vet ex laʼ paxsan inuqul inqʼa yol s-viʼ tiʼ jankʼal inqʼa qat etila. 49Pet atoq kuxh ex tu tenam Jerusaleen. Tan toq nal vaqʼ tzaan viTiuxhil Tiuxh setiibʼa, uvaʼ alel taʼn vinBʼaal, yaʼnetze laʼ utxh vet eteleʼl tiʼ ipaxsal inqʼa yol. Tan aʼ vet viTiuxhil Tiuxh laʼ aqʼon etiqleʼm, —xeʼt Jesuus te inqʼa nikich itxhus tibʼ s-kʼatza.
Uvaʼs ibʼen vet quBʼaal Jesuus t-amlikaʼ
Kuxh 16.19-20
50Yaʼne tiqʼo vet Jesuus inqʼa nikich itxhus tibʼ s-kʼatza s-tiʼ. Tul yekichaq vet tu tal tenam Vetaania. Tul taqʼ vet jaʼ Jesuus iqʼabʼ s-tiibʼa, atz taqʼ vet ka Jesuus bʼaʼnla txhaq yol s-tiibʼa. 51Sebʼtichetz taqʼt ka Jesuus inqʼa bʼaʼnla txhaq yol tiibʼa inqʼa nikich itxhus tibʼ s-kʼatza, tul il Jesuus, aalemalich vet ijatxt tibʼ s-tuchʼ, atz aalemalich vet ipal jaʼ Jesuus t-amlikaʼ. Tul qʼoon sotz vet jaʼ Jesuus t-amlikaʼ xoʼl suʼtzʼ. 52Yaʼetz kuxh vet inqʼa nikich itxhus tibʼ kʼatz Jesuus tiʼ inatxhkʼuulal Jesuus, tul chiibʼiyichaqxh veteʼ uvaʼs motx iqʼaʼv tu tenam Jerusaleen. 53Tul bʼenamenichxh motx ikʼult tibʼ tu nimla atibʼal tuulbʼal u tostiuxh tiʼ inatxhkʼuulal, atz tiʼ toksal iqʼij quBʼaal Tiuxh.
[Tul echxh laʼ ibʼane.]
Выбрано:
Luk 24: ixlC
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2016, Wycliffe Bible Translators, Inc. All rights reserved.