Luk 23
23
Uvaʼs tiqʼol vet quBʼaal Jesuus vatz Pilaato, u aj Rooma uvaʼ atich ok s-nimla iqʼesal
Tio 27.1-2, 11-14; Kuxh 15.1-5; Xhun 18.28-38
1Yaʼne motx txakeʼv vet inqʼa iqʼesal u tenam s-kaqaayil, inqʼa kʼulich tibʼ tiʼ taqʼax kuʼ yol tinuqul tiʼ Jesuus. Tul iqʼol vet Jesuus vatz Pilaato u aj Rooma uvaʼ atich ok s-nimla iqʼesal. 2Tul xeʼtaq vet xotxhon te Pilaato. Tul ech inqʼa ipaʼv Jesuus motx taloʼk te Pilaato s-eche: —Qat qiqʼo tzaan naq u vinaq uvaʼa, tan nik kuxh iyansa naq iviʼ u tenam. Tul nik tal naq uvaʼ yeʼ laʼ itxhoj inqʼa xaol tatin te u mam iqʼesal uvaʼ tu Rooma. Atz nikat tal tibʼ naq uvaʼ, aʼ naqe u Kriisto, uvaʼ laʼ ul bʼanon mam iqʼesalil s-quxoʼl, —xeʼtaq tiʼ Jesuus.
3Yaʼne ech tal Pilaato te Jesuus s-eche: —¿Maq aʼ, axhe, u mam iqʼesal inqʼa tij imam Israeel nik aaleʼ? —xeʼt Pilaato.
Tul ech tal Jesuus s-eche: —Ee, echxhte uvaʼ nik aaleʼ, —xeʼt Jesuus.
4Yaʼne ech tal Pilaato te inqʼa iqʼesal oksan yol vatz Tiuxh, atz te inqʼa xaol s-eche: —Yeʼl invaʼq ipaʼv naq u vinaq uvaʼe nik inleqeʼ, —xeʼt Pilaato.
5Poro aalxh nikich ibʼant inqʼa iqʼesal yaʼl te Pilaato. Tul ech nikich motx tal s-eche: —Nik kuxh taqʼ naq ivavu tibʼ inqʼa tenam. Tan jankʼal tuulbʼal Judeea nik itxhusvat naq inqʼa kantxhaqla txhusbʼal te inqʼa xaol. Tul een xeʼtik tzaan naq txhus tetz u kantxhaqla txhusbʼal tuulbʼal Galileea. Tul il naq sebʼt itxhusun tzitza tu tenam Jerusaleen inpaqte, —chichichaq te Pilaato.
Uvaʼs tiqʼol vet quBʼaal Jesuus vatz Eroodes
6Tabʼietz vet Pilaato uvaʼ een xeʼtik tzaan Jesuus tiʼ itxhusun tuulbʼal Galileea, tul ijotxhʼi vet Pilaato inuqul u yol oq uvaʼ aj Galileeaich Jesuus. 7Taʼnetz kuxh tabʼi Pilaato uvaʼ een tzajnaʼqich Jesuus tuulbʼal Galileea, tul yekich itxhaq vet bʼen Pilaato Jesuus vatz Eroodes, u mam iqʼesal tuulbʼal Galileea. Tan aʼ, Eroodes Antiipas, atich tokebʼal tiʼ taqʼax kuʼ yol tinuqul tiʼ Jesuus. Poro aʼ atich Eroodes tu tenam Jerusaleen tuulbʼal uvaʼs itxeyp Jesuus.{*}#23.7 U Eroodes uvaʼ nik tal u versiikulo uvaʼa, tan aʼiche u mam iqʼesal tuulbʼal Galileea taʼn inqʼa aj Rooma. Aʼe u Eroodes Antiipas, vikʼaolich qʼetz Eroodes uvaʼ atich ok s-mam iqʼesal uvaʼs talal Xhun tuchʼ uvaʼs talal quBʼaal Jesuus tu tenam Veleen, eche uvaʼ nik tal tu uʼ Tio 2.1-23. Tul antxh u qʼetz Eroodese alon iyatzʼax el inqʼa neʼ. Tul aʼetz Eroodes Antiipas, u kʼaola, uvaʼ nik tal tu versiikulo uvaʼa, uvaʼ alon teesal iviʼ Xhun, u aqʼol kuʼ xaol xeʼ aʼ, ech uvaʼe nik tal tu uʼ Tio 14.1-12 tuchʼ Luk 9.7-9.
8Tiletz vet Eroodes Jesuus, tul yekichxh chiibʼ Eroodes tiʼ tootzaqil Jesuus. Tan naʼynaqich isaʼt Eroodes tootzaqil Jesuus, tiʼ uvaʼ nikich tabʼi Eroodes itziulal inqʼa mamala kaebʼal aanima uvaʼ nikich ibʼan Jesuus te inqʼa tenam. Tul aʼich isaʼ Eroodes tilt ibʼant Jesuus invaʼq kaebʼal aanima s-vatz.#Vibʼanoʼm inqʼa Apoostol 4.26-28; Saalmo 2.1-2 9Tul kamaq kuxh vet yolil nikich tabʼi Eroodes te Jesuus. Tul yeʼl Jesuus nikich itzaqʼbʼeʼ.
10Tul yaʼlaqichxh inqʼa iqʼesal oksan yol vatz Tiuxh tuchʼ inqʼa nikich txhusun ibʼekʼbʼal inqʼa tij imam Israeel tiʼ ixotxhox Jesuus vatz Eroodes.#Kuxh 3.6; Luk 13.31
11Yaʼne xeʼt vet Eroodes tuchʼ inqʼa isol tiʼ ichʼixvisal Jesuus, atz tiʼ itzeʼlel Jesuus. Tan motx toksa val u bʼaʼnla oksaʼm tetz mam iqʼesal tiʼ Jesuus. Tul ibʼekʼ vet Eroodes tiqʼol bʼen Jesuus inpaqte vatz Pilaato. 12Yekichetz ibʼan vet Eroodes eela iyol tuchʼ Pilaato tu qʼij uvaʼe, kʼuxh ataqich ok ixoʼl s-bʼaxa.
Uvaʼs talt u tenam iyatzʼax el quBʼaal Jesuus
Tio 27.15-26; Kuxh 15.6-15; Xhun 18.38—19.16
13Yaʼne ibʼekʼ vet Pilaato tul inqʼa iqʼesal oksan yol vatz Tiuxh, tuchʼ inqʼa iqʼesal inqʼa tenam, atz tuchʼ inqʼa tenam. 14Tul ech tal Pilaato s-eche: —Qat kuxh etiqʼo tzaan naq u Jesuus sinvatz uvaʼ nik aqʼon ivavu tibʼ inqʼa tenam nik etaleʼ. Tul ech evatz qat injotxhʼi itziʼ naq. Tul yeʼl ipaʼv naq nik itxhejaʼ, eche uvaʼ nik exotxh naq s-tiʼ. 15Qatetz vaqʼ opoon naq xeʼ Eroodes, tul jitoq qat txhej ipaʼv naq vatz Eroodes, echetz yeʼ laʼ utxhi laʼ yatzʼax el naq. 16Pet taʼn kuxh toq ibʼaneʼ uvaʼ toq inbʼekʼ itzʼuʼmal naq, yaʼne laʼ intxhaqpu el naq, —xeʼt Pilaato. 17[Tan jeqelich vet ka uvaʼ tetxhal kuxh laʼich itxhaqpu el Pilaato vaʼl pereexho tuulbʼal u nimla qʼij jun yaʼbʼ.]
18Yaʼne aalatxh isichʼin inqʼa xaol. Tul ech motx tal s-eche: —¡Bʼenoq yatzʼaxoq el Jesuus! Pet ¡aʼ varAvaas atxhaqpu el! —chichich vet inqʼa xaol. 19Atichetzxh jaʼ varAvaas t-tzeʼ tiʼ ixeʼtisal invaʼl txhʼaʼo xoʼl u tenam Jerusaleen, atz tiʼ iyatzʼax xaol. 20Yaʼne yolon Pilaato inpaqte xoʼl u tenam. Tan aʼich isaʼ Pilaato itxhaqpeʼl Jesuus.
21Yaʼne sichʼin inqʼa xaol inpaqte. Tul ech motx tal s-eche: —¡Jaʼoq vatz kurus! ¡Jaʼoq vatz kurus! —chichich inqʼa xaol.
22Yaʼne ech tal Pilaato titoxpaq s-eche: —¿Kametz ipaʼv naq bʼa sevatz? Tan yeʼl invaʼq ipaʼv naq nik inleqeʼ uvaʼ laʼ quyatzʼeʼl naq s-tiʼ. Pet aʼl kuxh toq inbʼekʼ itzʼuʼmal naq, yaʼne laʼ intxhaqpu el naq, —xeʼt Pilaato.
23Tul aalxh isichʼin inqʼa xaol tiʼaq ibʼant yaʼl tiʼ talax ijaʼ Jesuus vatz kurus. Tul itzaqʼbʼe vet Pilaato viyol inqʼa xaol, atz viyol inqʼa iqʼesal oksan yol vatz Tiuxh. 24Tul aʼ, ibʼan vet Pilaato, kam uvaʼ motx tal inqʼa xaol. 25Echetz aʼ, itxhaqpu vet el Pilaato uvaʼ aqʼax jaʼ t-tzeʼ tiʼ ixeʼtisal txhʼaʼo, atz tiʼ iyatzʼax xaol. Tan aʼ uvaʼe, tal inqʼa xaol itxhaqpeʼl. Echetz toksat vet Pilaato Jesuuse tiqʼabʼ inqʼa sol tiʼ ibʼanax kam uvaʼ nikich isaʼ inqʼa xaol.
Uvaʼs ikam vet quBʼaal Jesuus vatz kurus
Tio 27.32-56; Kuxh 15.21-41; Xhun 19.17-30
26Iqʼoletz vet Jesuus taʼn inqʼa sol, tul aalich tul val u vinaq t-vitz, aj Sireene, uvaʼ Simoonich ibʼij. Tul txeypoʼk taʼn inqʼa sol tiʼ tiqal u kurus. Tul txhʼuyeʼv vet bʼen tiʼ Jesuus. 27Tul mam xaol txhʼuyich tiʼ Jesuus, inqʼa antichxh aj tenam Jerusaleen. Atz mamala ixoq txhʼuyichate. Tul mam oqʼel nikichaq motx ibʼan inqʼa ixoq t-txumuʼm tiʼ Jesuus.
28Yaʼne sutxhqʼ Jesuus. Tul ech tal Jesuus te inqʼa ixoq s-eche: —Ex inqʼa ixoq aj Jerusaleen, yeʼ kuxh oqʼ ex s-viʼ. Pet aʼ ex, etoqʼle etibʼ tiʼ u kʼaxkʼo laʼ ul setiibʼa. Atz aʼat etoqʼle inqʼa etal. 29Tan laʼ opoon invaʼl qʼij tetz kʼaxbʼichil uvaʼ ech laʼ etal s-eche: «Aʼl tira at vibʼaʼnil quBʼaal Tiuxh tiibʼa inqʼa ixoq, inqʼa aʼxh yeʼ nik talaneʼ, atz aʼxh yeʼ nik iyan ikʼuul, atz inqʼa yeʼl vaʼq ineʼ nik ichʼijsa,» chaq ex. 30Yaʼne ech laʼ tal inqʼa xaol te inqʼa vitz s-eche: «Tzaoq ex s-qiibʼa,» chaqe. Atz echat laʼ tal te inqʼa talaq vitz s-eche: «Muqvaq oʼ,» chaqe.#Oseeas 10.8; Apokaliipsis 6.16
31Pet toq val sete: Il in, nik inkʼaxbʼisaleʼ; in, uvaʼ yeʼl vaʼq inpaʼv. ¡Aʼetz kol yeʼ laʼ ikʼaxbʼisa quBʼaal Tiuxh inqʼa aj paʼvom! —xeʼt Jesuus.{*}#23.31 Aʼ nik tal u kastiiya: —Si en el árbol verde hacen estas cosas, en el seco, ¿qué no se hará? —chiche. Aʼetz inqʼa modiismo nik talax tu yolbʼal arameeo tiʼ taqʼax kʼaxkʼo tiibʼa vaʼq xaol. Aʼ nik tal quBʼaal Jesuus uvaʼ eela quBʼaal Jesuus tuchʼ u txhaʼxla tzeʼ uvaʼ jit ikʼulel laʼ tzʼeʼsali, tul ile nik itzʼeʼsaleʼ. Aʼetz kol yeʼ laʼ tzʼeʼsal u tzaqa tzeʼ, atz ikʼulel vet laʼ tzʼeʼsali. Aʼetz nik ibʼan quBʼaal Jesuus eela u tzaqa tzeʼ tuchʼ inqʼa yeʼ nik qeon quBʼaal Jesuus uvaʼ, aʼ quBʼaal Jesuuse u Kriisto. Tan ikʼulel vet laʼ kʼaxbʼisali, tan nik ikʼaxbʼisal quBʼaal Jesuus taʼn.
32Tul ant kaʼvaʼl inqʼa yaabʼla vinaq iqʼol tiʼ ikameʼl kʼatz Jesuus. 33Motxetz aqʼbʼ vet tu atibʼal uvaʼ ‹Bʼaqil Viʼ› chich eʼli, tul tzitzi aqʼaxik vet jaʼ Jesuus vatz kurus. Atz junun taqʼax vet jaʼ kaʼvaʼl inqʼa yaabʼla vinaq vatz kurus. Vaʼl, jaʼ tisebʼal Jesuus. Atz vaʼt, jaʼ timax Jesuus.
34Yaʼne ech tal Jesuus s-eche: —InBʼaal, kuy ipaʼv inqʼa xaol, inqʼa tira yeʼ tootzaqle jaʼle uvaʼ nik ikʼaxbʼisa, —xeʼt Jesuus.
Tul xeʼtaq vet inqʼa sol saatxhoq s-vatzaq tiʼ tilixeʼ jaʼl laʼich iqʼon inqʼa toksaʼm Jesuus.#Saalmo 22.18
35Sebʼtichetz isaqin u tenam, tul nikich kuxh itzeʼlel Jesuus taʼn inqʼa iqʼesal u tenam. Tul ech nikich motx tal s-eche: —Oqetz naqxhte u Kriisto, viTxajoʼm Tiuxh, tul ichitetz tibʼ naq tiqʼabʼ u kamchil, eche nikich ichitt naq inqʼa xaol tiqʼabʼ inqʼa yaabʼil, —chichichaq tiʼ itzeʼlel Jesuus.
36Tul echatxh nikich motx itzeʼlel Jesuuse taʼn inqʼa sol. Tul motx ijetxhoʼk tibʼ kʼatz Jesuus tiʼ taqʼax taʼl vinaagre te Jesuus. 37Tul ech nikich motx tal s-eche: —Oqetz axh mam iqʼesal inqʼa tij imam Israeel, tul chitetz eebʼ tiqʼabʼ u kamchil, —chichich inqʼa sol te Jesuus. 38Atichetz val u tzʼibʼ tiibʼa Jesuus uvaʼ tzʼibʼamich tu yolbʼal grieego, [atz tu yolbʼal latiin, atz tu yolbʼal evreeo,] uvaʼ ech nikich tal s-eche: —aʼ u mam iqʼesal inqʼa tij imam israeele uvaʼa, —chichich u tzʼibʼ.
39Yaʼne eesal vet iqʼij Jesuus taʼn vaʼl u bʼanol tetz yeʼbʼaʼn uvaʼ atich jaʼ vatz kurus. Tul ech tal s-eche: —Oqetz axh naq u Kriisto, tul chitetz eebʼ tiqʼabʼ u kʼaxkʼo. Atz chitatetz oʼ, —xeʼte.
40Yaʼne ech tal invaʼt u bʼanol tetz yeʼbʼaʼn tiʼ iyajax vimol s-eche: —¿Tiraetz kolxh yeʼ nik axoʼv te u kʼaxbʼichil uvaʼ toq taqʼ quBʼaal Tiuxh? Tan il oʼ, eela nik qukʼaxbʼ tuchʼ naq uvaʼ nik ayajeʼ. 41Bʼaʼnetz oʼ, tan ikʼulelxh laʼ pal oʼ tu kʼaxkʼo. Tan aʼ nik qutxhoj inqʼa yeʼbʼaʼn, inqʼa qat motx qubʼana. Pet naq uvaʼe, tan yeʼl ipaʼv naq, —xeʼt te vimol.
42Yaʼne ech tal vet te Jesuus s-eche: —Laʼxh uulsa in sakʼuul uvaʼs laʼ ul abʼant iqʼesalil, —xeʼte.
43Tul ech tal Jesuus s-te s-eche: —Toq val see uvaʼ: Txheel toq atinoq axh sinkʼatza tu Bʼaʼnla Atibʼal, —xeʼt Jesuus.{*}#23.43 U yol uvaʼ nik tal quBʼaal Jesuus te u vinaq, tan aʼ tal quBʼaal Jesuus uvaʼ, aʼ laʼ bʼenk taanxelal u vinaq tu ‹Bʼaʼnla Atibʼal.› Tan at vaʼl atibʼal nik tal quBʼaal Jesuus; aʼe u ‹Paraíso› tetz taanxelal inqʼa xaol, inqʼa laʼ motx qeon quBʼaal Tiuxh. Tan ech uvaʼe qejich taʼn inqʼa tij imam Israeel. Pet at vaʼt u atibʼal uvaʼ ‹Hades› chich eʼl t-kastiiya. Tul ‹Kʼaxkʼola Atibʼal,› chich t-quyolbʼal. Aʼetz uvaʼe, laʼ atink inqʼa xaol, inqʼa yeʼ laʼ qeon quBʼaal Tiuxh. Pet aʼetz nikich titzʼa inqʼa tij imam Israeel uvaʼ kaqaayilxh laʼich motx ibʼen tu Bʼaʼnla Atibʼal, tiʼ uvaʼ tan, ichʼexich quBʼaal Tiuxh s-vatz. Tan aʼich vatz inqʼa tij imam Israeel uvaʼ natxholaqich Tiuxh. Tan nikich motx tex natxh Tiuxh tu nimla tuulbʼal u tostiuxh. Pet jitetz eche. Tan yekichxh tal quBʼaal Tiuxh uvaʼ jitich kaqaayil tijaq imam Israeel atich tokebʼal kʼatz quBʼaal Tiuxh. Taletz quBʼaal Jesuus u yol Aades, tiʼ ibʼant eela tuchʼ val u tzʼeʼsabʼ chʼis tu tenam Jerusaleen uvaʼ ‹guegena› ibʼij tu yolbʼal grieego. Echetz talt quBʼaal Jesuuse uvaʼ yek vet t-xamal jaʼl inqʼa yeʼ laʼ qeon quBʼaal Tiuxh.
44Aʼetzxh itxhaqʼaan vet qʼij, tul ok val u mam tokto tiibʼa u txʼavaʼ s-kaqaayil, tetxhal topoon s-oxvaʼl oora s-kuʼebʼal qʼij. 45Tul tira ok tokto tivatz u qʼij. Atz rinp vet u mamaʼ tʼebʼkin bʼuʼq tinikʼa, uvaʼ atich jaʼ s-qʼanbʼal tuul u tostiuxh.
46Yaʼne yakʼilxh isichʼin Jesuus. Tul ech tal Jesuus s-eche: —¡InBʼaal, nik voksa u vaanxelal taqʼabʼ! —xeʼt Jesuus. Taletz kuxh vet Jesuus u yol uvaʼe, tul yeʼ jaʼ vet ul ixev Jesuus; atz kam vet Jesuus.
47Tiletz vet viqʼesal sol jankʼal inqʼa motx utxhi, tul ech tal vet tiʼ toksal iqʼij quBʼaal Tiuxh s-eche: —¡Nuq bʼakxhtuʼ uvaʼ jikla bʼakxh vinaq naq uvaʼe! —xeʼt veteʼ.
48-49Tul niim kuxh nikich motx saqink vet tzaan inqʼa xaol, inqʼa ootzaqinich tetz Jesuus, atz tuchʼ inqʼa ixoq uvaʼ txhʼuyich tiʼ Jesuus uvaʼs tel tzaan Jesuus tu Galileea. Tul motx tila kam inqʼa nikich motx tutxheʼ. Tul nikichaq kuxh ibʼum vet tziʼ taanima t-txhoʼm taʼn txumuʼm uvaʼs motx iqʼaʼv tu tenam Jerusaleen.
Uvaʼs imuqtxʼ vet quBʼaal Jesuus
Tio 27.57-61; Kuxh 15.42-47; Xhun 19.38-42
50Atichetz val u vinaq uvaʼ Xhuʼlich ibʼij, aj Arimateeaiche uvaʼ atich tuulbʼal Judeea. Atichetz ok Xhuʼl xoʼl inqʼa aqʼolaq kuʼ yol tinuqul tu tenam Jerusaleen. Tan jikla vinaq, atz bʼaʼnla vinaqich Xhuʼl. 51Antichetz Xhuʼl nikich itxʼebʼon tiʼ tul vibʼant quBʼaal Tiuxh iqʼesalil. Echetz jit ant Xhuʼl tiʼ taqʼax kuʼ yol tinuqul tiʼ ikameʼl Jesuus. Atz yeʼl Xhuʼl antich koq tiʼ kam uvaʼ motx ulbʼel Jesuus taʼn inqʼa imol Xhuʼl, inqʼa aqʼol kuʼ yol tinuqul.
52Bʼenetz vet Xhuʼl tiʼ tabʼil vitxhiʼoʼl Jesuus te Pilaato. 53Tul ex tiqʼo vet kuʼl Xhuʼl vitxhiʼoʼl Jesuus vatz u kurus. Tul itxʼut vet Xhuʼl tuchʼ val u bʼaʼnla liino bʼuʼq. Yaʼne een ex imuqvat vet Xhuʼl vitxhiʼoʼl Jesuus tuul val u muqbʼal kamnaʼq uvaʼ, aʼ bʼitich ok vatz val u pejoʼn. Tul yeʼxnaqich oksaloq invaʼq kamnaʼq tuul uvaʼ muqtxʼik Jesuus.
54Aʼetzxh imuqtxʼ Jesuus tu qʼij Ipal Aanxel. Tul aʼxh ikuʼ vet qʼij s-bʼaʼn. Aʼetz u qʼije uvaʼ nik motx ibʼan vet ka tutxh inqʼa tij imam Israeel jankʼal inqʼa taqʼon, tiʼ uvaʼ yeʼl vet vaʼtoʼq aqʼon laʼich motx ibʼan tuulbʼal u xeem qʼij saavado. 55Jatvaʼletzxh inqʼa ixoq, inqʼa een txhʼuyeʼvik tzaan tiʼ Jesuus tuulbʼal Galileea, tan ayaʼl inqʼae, motx ilon tal uvaʼ muqtxʼik ka vitxhiʼoʼl Jesuus. Atz motx til kam uvaʼ ulbʼel ikaj vitxhiʼoʼl Jesuus. 56Qʼaʼvetz vet inqʼa ixoq t-otzotz, tul ilanaq vet tuulbʼal u xeem qʼij saavado. Tan ech uvaʼe bʼekʼich ka taʼn Moisees. Echetz vet eqal ipal u xeem qʼij saavado, tul ibʼanaq vet tutxh inqʼa txʼumbʼisabʼal. Atz ibʼan vet tutxh val u tzʼuʼbʼixsabʼ txhiʼoʼl tiʼ toksal tiʼ vitxhiʼoʼl Jesuus.
Выбрано:
Luk 23: ixlC
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2016, Wycliffe Bible Translators, Inc. All rights reserved.