Xhun ALBʼAL INUQUL U YOL TIʼ U Uʼ
ALBʼAL INUQUL U YOL TIʼ U Uʼ
XHUN
Uvaʼs toq qootzaqitaʼ jaʼl tzʼibʼan u uʼ Xhun
Aʼetz u uʼe uvaʼ Xhun ibʼij, tan Xhun ibʼij uvaʼ tzʼibʼan u uʼ, Xhun u apoostol uvaʼ ichʼex quBʼaal Jesuus. Pet jit Xhun uvaʼ aqʼon kuʼ inqʼa xaol xeʼ aʼ. Tan ech uvaʼe nik tal Ireneeo uvaʼ Xhun tzʼibʼan vikajv uʼ tiʼ quBʼaal Jesuus. Tan aʼ tootzaqivat Ireneeo kʼatz Polikaarpo. Tul aʼ itxhusvat tibʼ Polikaarpo kʼatz Xhun tiʼ quBʼaal Jesuus, tan yeʼnaqich kamoq Xhun tu yaʼbʼ oʼlaval toʼkʼal (95) m.t.J. Tul antichxh iqʼon iviʼ Polikaarpo kʼatz Xhun xoʼl inqʼa niman tetz Jesuus tu tenam Esmiirna tetxhal topoon tu yaʼbʼ vajqil toʼkʼal (86) tuchʼ vaqlaval toʼkʼal (96).
Tul echatxh nik tal Teoofiloe, u aj Antiokiia tuulbʼal Siiria, tu yaʼbʼ oʼvaʼl toʼkʼal tuchʼ inmutxʼte (180) m.t.J., uvaʼ Xhun tzʼibʼan vikajv uʼ tiʼ quBʼaal Jesuus.
Antetzxh vikajv uʼ tiʼ quBʼaal Jesuus nik alon uvaʼ Xhun tzʼibʼan u uʼ. Tan tilxh Xhun kam uvaʼ motx ibʼan quBʼaal Jesuus. Tan antich Xhun atich ok s-tatxhul kabʼlaval inqʼa itxhaq Jesuus, inqʼa apoostol. Tan ech uvaʼe nik tal tu Xhun 1.14 tuchʼ 19.35 tuchʼ 21.20, 23, 24, atz tuchʼ 1 Xhun 1.1. Tul nikat ikʼutxh paqte uvaʼ Xhun tzʼibʼan vikajv uʼ. Tan tij imam Israeelich Xhun. Tul tootzaqich Xhun kam inqʼa nikich tutxh xoʼl inqʼa imol tiʼ vinatxhax Tiuxh; atz kam uvaʼ nikich ibʼan inqʼa imol tiʼ inimal inqʼa bʼekʼbʼal; atz kam inqʼa qeelich taʼn inqʼa imol. Tul tootzaqich Xhun kam nikich ibʼan inqʼa iqʼesal uqʼeʼybʼal tuul u tostiuxh tu tenam Jerusaleen. Tan aʼ nik bʼensan s-qe uvaʼ tootzaqich tibʼ Xhun tuchʼ val viqʼesal oksan yol vatz Tiuxh; aʼe Anaas. Tan kʼulux ok Xhun t-viqʼanalil u totzotz Anaas uvaʼs tiqʼol vet Jesuus vatz viqʼesal. Tan ech uvaʼe nik tal tu Xhun 18.15.
Uvaʼs toq qootzaqitaʼ kam s-tuul tzʼibʼal u uʼ Xhun
Aʼetz itzʼibʼal u uʼ Xhun tixoʼl inqʼa yaʼbʼ oʼvaʼl toʼkʼal (85) m.t.J. tuchʼ tu oʼlaval toʼkʼal (95) m.t.J. Tan ech nik tal inqʼa txhʼotin tetz viyolbʼal quBʼaal Tiuxh uvaʼ maʼtich tootzaqil vet oxvaʼl inqʼa uʼ tiʼ Jesuus inqʼaa: Tio, Kuxh tuchʼ Luk. Yaʼne tzʼibʼal vet u uʼ Xhun vikajv uʼ tiʼ Jesuus. Xaʼtetze yeʼ itzʼibʼa vet Xhun jolt inqʼa yol uvaʼ maʼtich itzʼibʼal veteʼ. Tan atxh ibʼen vet inqʼa txhusbʼal uvaʼ motx itzʼibʼa Xhun.
Antetzxh Ireneeo nik alon uvaʼ een itzʼibʼavat Xhun u tuʼ tuulbʼal Aasia tu tenam Eefeso. Niketz ibʼen s-qe uvaʼ te inqʼa jit tij imam Israeel itzʼibʼavat Xhun u tuʼ. Tan nikich taqʼ Xhun tootzaqi inqʼa jit tij imam Israeel kam nikich inimat inqʼa tij imam Israeel, inqʼa inimla qʼij, atz inqʼa inimaʼm.
Atetz vaʼt uvaʼ nik bʼensan s-qe uvaʼ een itzʼibʼavat Xhun u tuʼ tuulbʼal Aasia. Tan taʼn kuxh tex vet Xhun t-Aasia timotxebʼal vet u bʼaxa oʼ kʼalal (100) yaʼbʼ uvaʼs qʼestich vet Xhun.
Uvaʼs toq qootzaqitaʼ kamich taqʼon Xhun
Ech nik tal viyolbʼal quBʼaal Tiuxh tu Xhun 1.19-20 tuchʼ Luk 5.10 uvaʼ txeyol txayich Xhun tuchʼ qʼes ibʼaal, atz tuchʼ Jakoovo, u tatzik. Aʼetz nikich ex itxeyvataq txay tuul u mam aʼ Galileea, antxh tuulbʼal Galileea. Tul Sevedeeoich ibʼij qʼes ibʼaal Xhun. Atz Salomeeich ibʼij qʼes itxutx Xhun. Tan ech uvaʼe nik tal tu Tio 27.55-56 tuchʼ Kuxh 15.40 tuchʼ Xhun 19.25. Tul nikichebʼ itxʼolon Xhun tuchʼ qʼes ibʼaal tiʼ u aqʼon uvaʼ nikich ibʼaneʼ, tan ataqich ok taqʼonvil. Sebʼtichetz taqʼonv Xhun tiʼ itxeyex txay, atz sebʼtaqich ikʼoat inqʼa ikʼatxh uvaʼs pal eloq Xhun tuchʼ Jakoovo taʼn Jesuus. Tul bʼenaq vet tiʼ Jesuus. Yekichetz taqʼ vet ka Xhun u taqʼon tiʼ vitxeyex txay, tul txhʼuyeʼv vet Xhun tiʼ quBʼaal Jesuus.
Tul oxvaʼl kuxh inqʼa itxhaq Jesuus, inqʼa iapoostol nikich tiqʼo s-tiʼ, pet jit kaqaayil nikich tiqʼo Jesuus. Tan taʼn kuxh oxvaʼl inqʼa ilon titzʼeʼv vimeʼal Jaairo. Ech uvaʼe nik tal tu Luk 8.51. Atz taʼn kuxh oxvaʼl ilon vijalp ikaʼy Jesuus viʼ u vitz uvaʼs iyolon Jesuus tuchʼ Moisees, tuchʼ Eliias. Tan ech uvaʼe nik tal tu Luk 9.28. Aʼichetz Xhun palnaʼq tatin viʼ jolt inqʼa imol vatz Jesuus, tan aʼ taqʼvat ka Jesuus vitxutx te Xhun uvaʼs toqnaʼqich kamoq vet Jesuus vatz kurus. Ech uvaʼe nik tal Xhun 19.26-27.
Uvaʼs toq qootzaqitaʼ kame u taqʼil vitxhusun Xhun tuul u tuʼ
Aʼetz nikich isaʼ Xhun uvaʼ laʼich bʼen inuqul te inqʼa jit tij imam Israeel uvaʼ Tiuxh Jesuus. Tan tal Xhun tu tuʼ uvaʼ Tiuxh Jesuus. Ech uvaʼe nik tal tu Xhun 1.1.
Tul nima paqlen nik tal Xhun tu tuʼ uvaʼ Tiuxh Jesuus. Aʼetz nik ex tzoqpik talt Xhun uvaʼ nik ex tal tiʼ viyol Maxh uvaʼ tal tiʼ Jesuus uvaʼ Tiuxh Jesuus. Tan ech uvaʼe nik tal tu Xhun 20.28.
Tul talat Xhun paqte uvaʼ antxh Jesuus alon uvaʼ een tzajnaʼqich Jesuus kʼatz quBʼaal Tiuxh tu amlikaʼ. Tul vaʼlich kuxh Jesuus tuchʼ quBʼaal Tiuxh. Ech uvaʼe nik tal tu Xhun 1.18 tuchʼ 10.28-36 tuchʼ 20.23.
Tul tal Xhun paqte uvaʼ nimatel kuxh inqʼa kaebʼal aanima motx kʼutxhun uvaʼ Tiuxh Jesuus. Tan ech uvaʼe nik tal tu Xhun 11.43-44.
Uvaʼs toq qootzaqitaʼ kam ulbʼemal ijatxp ixoʼl inqʼa yol tu uʼ Xhun
U uʼ Xhun uvaʼ itzʼibʼa ka Xhun, tan oʼvaʼlen nimla txhaq tanul elnaʼq inqʼa yol uvaʼ nik tal s-tuul tiʼ talax inuqul uvaʼ iKʼaol quBʼaal Tiuxh Jesuus.
1. Xhun 1.1-51
U bʼaxa nimla tanul yol, tan aʼ tal Xhun tiʼ kam u tiqleʼm quBʼaal Jesuus, viKʼaol quBʼaal Tiuxh uvaʼ tzajnaʼql kʼatz quBʼaal Tiuxh.
2. Xhun 2.1—12.50
Vikaʼv nimla tanul yol, tan aʼ tal Xhun tiʼ kam uvaʼ ibʼan Jesuus xoʼl inqʼa xaol tiʼ ikʼutxhtaʼ uvaʼ iKʼaol Tiuxh Jesuus. Tul antetzxh Tiuxh u quBʼaal Jesuus.
3. Xhun 13.1—17.26
Vitoxv nimla tanul yol, tan aʼ tal Xhun tiʼ kam uvaʼ ibʼan Jesuus xoʼl inqʼa nikich itxhus tibʼ s-kʼatza. Pet jit xoʼl kaqaayil xaol ibʼanvat Jesuus, tan tira ixvamalich Jesuus taʼn inqʼa iqʼesal uqʼeʼybʼal.
4. Xhun 18.1—20.31
Vikajv nimla tanul yol, tan aʼ tal Xhun tiʼ vitxeyp vet Jesuus taʼn inqʼa sol, atz taʼn inqʼa iqʼesal uqʼeʼybʼal. Atz nik tal tiʼ u toksal vet Jesuus vatz inqʼa iqʼesal, inqʼa aqʼolaq kuʼ yol tinuqul xoʼl inqʼa tij imam Israeel. Tul aqʼax vet kuʼ yol tinuqul tiʼ iyatzʼax el Jesuus, tiʼ uvaʼ yeʼ nikich inima Jesuus inqʼa bʼekʼbʼal uvaʼ nimamich kuxh taʼn inqʼa iqʼesal uqʼeʼybʼal. Tul nik tal paqte tiʼ viyatzʼax el Jesuus vatz kurus. Tul nik tal paqte uvaʼ iqʼol vet kuʼl Jesuus vatz kurus, tul ex muquxoq vet ka tuul val u jul vatz val u pejoʼn. Tul nik tal paqte tiʼ u titzʼeʼv vet Jesuus inpaqte. Atz nik tal paqte, tiʼ uvaʼ ikʼutxh vet tibʼ Jesuus te mamala xaol, inqʼa iapoostol, atz te inqʼa ixoq, atz te joltaq xaol, inqʼa motx niman Jesuus.
5. Xhun 21.1-25
Vitoʼv nimla tanul yol, tan aʼ tal Xhun, tiʼ uvaʼs ikʼutxht tibʼ Jesuus te juqvaʼl inqʼa iapoostol tziʼ u mam aʼ Galileea. Aʼe uvaʼs motx itxeytaq mamala txay uvaʼ Jesuus bʼekʼon itxeytaʼ. Atz nikat tal tiʼ kam uvaʼ tal Jesuus tiʼ ijotxhʼil itziʼ Luʼ, tiʼ uvaʼ at kol taanima Luʼ tiʼ Jesuus, maq yeʼle. Tul taqʼ vet ka Jesuus tiqleʼm Luʼ tiʼ tilix, atz tiʼ itxhusux inqʼa niman tetz. Atz nikat tal tiʼ kam uvaʼ tal Jesuus te Xhun. Tul nikat tal tibʼ Xhun uvaʼ, aʼ vinuqule uvaʼ itzʼibʼa ka Xhun, kʼuxh yeʼ itzʼibʼa ka Xhun jankʼalxh inqʼa pal ibʼan Jesuus vatz txʼavaʼ.
Tuulbʼaletz u tuʼ Xhun tul tira tal Xhun inuqul inqʼa yol, tiʼ uvaʼ nimal inqʼa kam tiqʼo tzaan Jesuus tiʼ tootzaqil s-bʼaʼn taʼn inqʼa xaol. Aʼetz juunil inqʼa kam tiʼ ibʼant tibʼ Jesuus eela s-tuchʼ; aʼe inqʼaa:
I. Aʼ Jesuuse uvaʼ ibʼan tibʼ eela tuchʼ u xaomla aʼ.
Ech uvaʼe nik tal tu Xhun 4.14—7.38.
II. Aʼ Jesuuse uvaʼ ibʼan tibʼ eela tuchʼ u paan.
Ech uvaʼe nik tal tu Xhun 6.35.
III. Aʼ Jesuuse uvaʼ ibʼan tibʼ eela tuchʼ u jubʼal, atz u palebʼal ok.
Ech uvaʼe nik tal tu Xhun 8.10.
IV. Aʼ Jesuuse uvaʼ ibʼan tibʼ eela tuchʼ u txiqubʼal.
Ech uvaʼe nik tal tu Xhun 8.12.
V. Aʼ Jesuuse uvaʼ taʼnxhte, yeʼl ixeʼtebʼal, atz yeʼl iyaʼebʼal.
Ech uvaʼe nik tal tu Xhun 8.58.
VI. Aʼ Jesuuse uvaʼ ibʼan tibʼ eela tuchʼ u xeen karneʼl.
Ech uvaʼe nik tal tu Xhun 10.11-14.
VII. Aʼ Jesuuse uvaʼ ibʼan tibʼ eela tuchʼ u itzʼeʼvchil inpaqte.
Ech uvaʼe nik tal tu Xhun 11.25.
VIII. Aʼ tal Jesuus uvaʼ taʼn kuxh Jesuuse vinuqul.
Ech uvaʼe nik tal tu Xhun 14.6.
IX. Aʼ Jesuuse uvaʼ ibʼan tibʼ eela tuchʼ u bʼey.
Ech uvaʼe nik tal tu Xhun 14.6.
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2016, Wycliffe Bible Translators, Inc. All rights reserved.