Luk 24
24
Yesu ŵajimwice ku ŵawe
(Mat 28:1-10; Mak 16:1-8; Yoh 20:1-10)
1Kumasikusiku kwa lisiku lya mlungu, acakongwe ŵala ŵajile ku malembe, ali ajigele mawuta ni yakununjila yiŵapanganyisye yila. 2Piŵayice ku malembeko, ŵasimene liganga liŵawugalile pa mlango lila lili lyetyosye pa mlango wa lilembepo. 3Piŵajinjile mwilembe mula, jemanjajo nganawusimanamo mtembo wa Ambuje Yesu.* 4Piŵaliji mkusimonga camti myoyo, mwacisisimucisya ŵaweni acalume ŵaŵili ŵawale yakuwala yakunyesima mnope ali ajimi pambali pa jemanjajo. 5Acakongwewo ŵakwete woga ni ŵajinamile pasi. Nambo acalume ŵala ŵawusisye kuti, “Ana mkumsosela cici mundu jwa cijumi ku malo kwa ŵandu ŵawe kuno? 6Nganaŵa amuno, ajimwice ku ŵawe. Mkumbucile yiŵamsalile pa ndaŵi jiŵaliji ku Galileya.#Mat 16:21; 17:22-23; 20:18-19; Mak 8:31; 9:31; 10:33-34; Luk 9:22; 18:31-33 7Kwekula ŵamsalile jemanja kuti, ‘Mwanace jwa Mundu* akwenela kupelecedwa m'myala mwa ŵandu ŵakulemwa kuti amkomele ni kuwila pa msalaba kaneko ni kwimuka soni ku ŵawe pa lisiku lyatatu ciwile.’ ”
8Kaneko acakongwe ŵala ŵakumbucile gele maloŵego, 9ni ŵatyosile ku malembe kula ni kuja kukwasalila yosope yeneyo ŵakulijiganya* ŵala ni ŵandu ŵane wosope. 10Acakongwewo ŵaliji Maliya jwakutyocela ku msinda wa Magadala, Yowana, Maliya mamagwe Yakobo,* pamo ni acimjawo ŵane ŵajile kukwasalila ŵandumetume ŵane wosope ŵala kwambaga ya nganiji. 11Nambo ŵandumetume ŵala ŵagambaga kupela kuti yeleyi yili yangali mate, nipo nganiŵakulupilila acakongwewo. 12Nambo Petulo* ŵatyosile kwawula ku malembe, nipo piŵayice kweleko ni kulingulila mwilembemo, jwalakwejo ŵagambile kusiwona sandape nipo kaneko ŵawujile ku musi aku ali mkusimonga ni yiyatendekweyo.
Yiyatendekwe petala lyakuja ku Emau
(Mak 16:12-13)
13Lisiku lilyolyo ŵakulijiganya ŵaŵili ŵaliji pa ulendo wakuja kumusi wine wakolanjidwa Emau. Kutyoka ku Emau kuja ku Yelusalemu kutalikangana kwakwe kwaliji makilomita 11. 14Jemanjaji ŵaliji mkuŵecetana kwambaga yiyatendekwe yila. 15Piŵaliji mkuŵecetana ni kuwusyana, Yesu msyene ŵaŵandicile jemanjajo nipo ŵaliji mkulongana nawo. 16Nambo meso ga jemanjajo gatesile mpela cidima mwakuti nganam'manyilila jwalakwejo.
17Sambano Yesu ŵawusisye jemanjajo kuti, “Ana yimkuŵeceta mli mkwendayi yikwamba cici?”
Acalume ŵaŵiliwo ŵajimi papopo ni ngope sya kudandawula ni sya canasa. 18Kaneko jumo jwa jemanjajo jwakolanjidwa kuti Kiliyopa jwawusisye kuti, “Ana ŵalakwe ali mlendo jikape mu msinda wa Yelusalemu muno, jwangakumanyilila yindu yiyatendekwe kweleko lijusi.”
19Yesu ŵawusisye kuti, “Ana yamtuli?”
Jemanjajo ŵatite, “Yakwamba Yesu jwa ku Nasaleti. Jwalakwejo jwaliji jwakulocesya* nipo yosope yiŵatendaga yaliji yakumnonyelesya Mlungu ni ŵandu ŵakwe. 20Acakulungwa ŵa ŵakutaga mbopesi ni acimlongola ŵetu ŵampelece kuti ajimbidwe magambo ni kuwulajidwa pakumkomela pa msalaba. 21Uwe twajembecelaga kuti jwelejo ni jutiŵawombole Aisalaeli. Citendekwele yeleyi papite masiku gatatu. 22Konjecesya pa yeleyi, acakongwe ŵane ŵa mwikuga mwetu ŵatusimonjesye. Jemanjajo ŵapite ku malembeko kundaŵindaŵipe, 23nambo nganawusimana mtembo wa Yesu. Piŵawusile ŵatusalile uwe kuti ŵagaweni malayika* gigasalile jemanjajo kuti Yesu ali cijumi. 24Acalume ŵane ŵa mwikuga mwetu ŵapite ku malembeko nipo ŵajile kusimana mpela muŵaŵecetele acakongwe mula, nambo jwalakwejo nganamwona kose.”
25Kaneko Yesu ŵatite, “Ana jemanja mli ŵandu ŵakuloŵela camti myiyi, ŵangasaka kulupilila mwacitema yosope yiŵaŵecete ŵakulocesya. 26Ana jemanja nganim'manyilila kuti Mesiya* ŵaŵajilwe kuyiwona yipwetesi, mkanajinjile mu Ucimwene wakwe?” 27Kaneko Yesu ŵatandite kulondesya yosope yilembedwe yakwamba jwalakwejo m'Malemba gosope kutandilila m'mabuku giŵalembile Mose* mpaka mabuku gane giŵalembile ŵakulocesya wosope.
28Piŵaŵandicile ku musi kuŵajawulagako, Yesu ŵatesile mpela akupelenganya. 29Jemanjajo ŵamcondelele acitiji kuti, “Atame ni uwe pakuti kusaku kuswele sambano, soni lyuŵa likukapila.” Myoyo jwalakwejo jwajinjile m'nyumba ni kutama ni jemanjajo. 30Yesu piŵatemi ni jemanjajo pasi kuti alye, ŵajigele mkate, ni ŵatogolele ni kuwugaŵanya, kaneko ŵapele jemanjajo kuti alye. 31Ndaŵi jijojo meso ga acalume ŵaŵili ŵala gawugwice nipo ŵam'manyilile jwalakwejo, kaneko Yesu ŵasoŵile sikati ja jemanjajo. 32Jemanjajo ŵatandite kuwusyana jwine ni mjakwe acitiji kuti, “Mitima jetu jatesile mpela jikolele moto pa ndaŵi jaŵeceteje ni uwe, ni kutulondecesya ya Malemba mwitala mula.”
33Ndaŵi jijojo acalume ŵaŵili ŵala ŵawujile ku Yelusalemu. Kweleko ŵajile kukwasimana ŵakulijiganya 11 ŵala ni ŵane ali asongene pampepe, 34ali mkuŵeceta kuti, “Yili yakuwona kuti Ambuje ajimwice ku ŵawe nipo awonecele kwa Simoni.”*
35Acalume ŵaŵili ŵala ŵasalile jemanjajo yiyatendekwe mwitala mula, ni mwele jemanjaji muŵam'manyililile Yesu pa ndaŵi jiŵagaŵanyaga mkate.
Yesu ŵawonecele kwa ŵakulijiganya ŵakwe
(Mat 28:16-20; Mak 16:14-18; Yoh 20:19-23; Mase 1:6-8)
36Acalume ŵaŵili ŵala piŵaliji mkwasalila ŵakulijiganya ŵa Yesu kwambaga yiyatendekwe mwitala pakuja ku Emau, mwacisisimucisya Ambuje asyene ŵajimi pasikati pa jemanjajo ni ŵakomasisye acitiji kuti, “Mtendele uŵe kwa jemanja.”
37Nambo jemanjajo ŵatojime soni ŵakamwilwe ni woga ligongo ŵaganisyaga kuti awuweni msimu. 38Nambo Yesu ŵawusisye kuti, “Ana mkulilagasya ni kukayicila m'mitima mwenu ligongo cici? 39Mlole magasa ni sajo syangu, kuti yisyene ndili une. Mungwaye ni mundole, pakuti msimu ukusaŵa wangali mnowu ni maupa mpela mumkumbonelamu.”
40Piŵaŵecete gele maloŵega ŵalosisye jemanjajo magasa ni sajo syakwe. 41Jemanjaji nganakulupilila ligongo lyakuti ŵaliji ŵakusangalala nipo lunda lwamalile jemanjajo. Kaneko Yesu ŵawusisye jemanjajo kuti, “Ana mkwete kandu kakulya apano?” 42Jemanjajo ŵampele Yesu ciduswa ca somba jakoca. 43Yesu piŵapocele sombajo ŵajilile ŵanduwo ali mkulola.
44Yesu ŵatite kuti, “Ayi ni yinamsalile pinaliji ni jemanja pala. Yosope yikwenela gumbalicisidwa yele yiyalembedwe yakwamba une m'Malamusi giŵalembile Mose, ŵakulocesya ni m'buku ja Masalimo.”
45Kaneko Yesu ŵakamucisye jemanjajo kuti agapikanicisye Malemba. 46Ŵasalile jemanjajo kuti, “Malemba gakuti, Mesiya akwenela kuyiwona yipwetesi, kaneka pakumala kwa masiku gatatu tacijimuka ku ŵawe, 47kuti mu lina lyakwe maloŵe gakwamba kupitikuka mtima ni kululucidwa kwa ulemwa* galalicidwe kwa ŵandu ŵa ngosyo syosope kutandilila ku Yelusalemu. 48Jemanja ni ŵimkwenela kuŵa mboni pa yosope yiyatendekwe. 49Une tinjimtumicisya mtuka wele Atati ŵangu uŵasasile kuti tacitumisya. Nambo jemanja mkwenela kutama mu msinda muno mpaka pa ndaŵi jitimcipocela macili gakutyocela kwinani.”#Mase 1:4
Yesu ŵajigalidwe kwawula kwinani
(Mak 16:19-20; Mase 1:9-11)
50Kaneko Yesu ŵalongolele ŵakulijiganya ŵakwe kutyoka mu msinda wa Yelusalemu mpaka kuja kwika ku musi wine wakolanjidwa Betaniya. Kweleko Yesu ŵanyakwile makono gakwe mwinani ni kwapa upile jemanjajo.#Mase 1:9-11 51Piŵaliji mkwapa upile jemanjajo, ŵalekangene nawo, nipo ŵajigalidwe kwawula kwinani. 52Jemanjajo ŵamlambile jwalakwejo nipo panyuma pakwe ŵawujile ku msinda wa Yelusalemu ali ŵakusangalala mnope. 53Ndaŵi syosope jemanjaji ŵatamaga m'Nyumba ja AMBUJE ni kumlambilaga jwalakwejo.
Выбрано:
Luk 24: YAWO
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Chiyawo Bible: Buku Jeswela © Bible Society of Malawi, 2014