Nahumi 3
3
1Ukulowa akwakaya kawufi, akaya kawuchikoma,
akaya kano kizula ninsawo yakusampa iyakupoka!
2Siyivwani! ukulila kwachikoti,
umusindo wamipeto,
umutikimbo wakwe wakavwalo,
ukutantala kwamagereta!
3Wakakwelela wakwe wakavwalo wakulwisya,
impanga zikuzikimila, namasumo yakumekuka!
Ivitumbi vyavyala vyalundikwa namupela,
ivyala vyawantu amintapendwa
awantu wakapunula kuvyala!
4E Ninive, echilende, wasundwa.
Akaya kakumbuchilwa akanchilisi zyavye,
kasizizye imyiko akawafunkula.
5Imfumu e Leza wamaka yonsi akuti,
Ndikusunda, we Ninive!
Ndikuzula usyale tupu
nga imyiko ikulolele,
ikulole kunsoni zyako konsinye.
6Ndikulola nukukuziwuluka, nkupake uwusali.
Awantu waliwakulola awakunyanyata.
7Wensi wino wiza wakulola alinyochelela kunsizi.
Waliwati, Ninive wasyala avipompa!
Ngaweni ali ninkumbu nawe?
Pasi nanti wenga wino aliwalonda ukukusansamusya.
8We Ninive, wuzye wemuzima ukulusye akaya kakwe Tebesi? Nu Tebesi-nye walinji nuluzi luno lwamuchinjililanga ngati alilinga. Uluzi Nayilo lwalinji alilinga lyakwe. 9Amuno wapanzyanga insi yonsi yino yakonsile Nayilo, amaka yakwe yalandalizile. Wivwine nu Libya. 10Ukuwa naponye awantu wakwe Tebesi wasenzilwe uwuzya. Mumbali yamisolo monsinye awana wawo wumwanga mpaka awafwa. Awantu wakulu wamwenemo wasenzilwe muminyololo, awankanwa nawano wawalemanga.
11Nawenye we Ninive, ulikoleka uwe wechavye! Nawenye uliwalonda ukuti upusuke kuwalwani wako. 12Amalinga yako yonsi yaliwa ngati amikunyu yino ili namakunyu mache. Yingania imiti, nivikomwa vilange vikuponela mumulomo wako mukasi! 13Awavita vyako wali ngati awanachi, ninsi yako isi nivyakuyichinjilila kuwalwani wako. Umulilo wuliyocha imipinjilichizyo yampongolo zyako. 14Kasembe minzi uyiteye kukuliwilizwa, uwomye namalinga yako! Yanga kapondele ivu lyakumila injelwa, kapange ivikombola vyakumila injelwa! 15Ukuwa naponye ulipya ufwe pamwi ulikomwa mwisumo. Ulipyelwa pyelu ndivino makanta akalya ivizawalo.
Wanyama ngati wemakanta! 16Awalonsi winu wavula walusya intanda zyamwiyulu! Ukuwa kanonzi wasowa napano walyata, wapita ndivino makanta akakunzulula amapa yawo apapuka apita. 17Inkombe zyako wali ngati ichipupu chakwe makanta wino akwikalanga pamalinga uwanda wuno kuli mpepo. Ukuwa alila ilanzi lyawala apapuka, asowa napano walyata!
18We mfumu ya Asiria, awalasi wako wafwa, nawantu wako awakulu waponechela; watalitela waziwuke nawanda! Awantu wako wasalanganila mumyamba, pasi wino angaya akawanyosye waye kumwawo swinya, 19Pasi umulembo wumwi uwakupozya ivilonda vyako, ivilonda vyako vitanga vipole. Nawensi wino wivwa ilandwe alikunda, nukukoma amakasa yawo muno achimwemwe. Pasi wumwi wino wapususile kuwukali wako wuno wusi ninsilo.
Selectat acum:
Nahumi 3: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.