Habakuku 1
1
1Yaa amazwi ya Mfumu e Leza yano wawumbuzile kumutumwa Habakuku.
Ukulilizika kwakwe Habakuku kukukalalilwa
2Iye, we Mfumu Leza, wuzye nazipila ukukulilila ukuti uyivwe ukufika kwi? Ukuti ututule kukuchichizwa? 3Ngamuno chani chino ukuleka nkulola intazinye zyoo nuwuwipe? Ukulowa nukuchichizwa vyonsinye vyandiwilizya. Ukulwa nimpokoto vili konsikonsi. 4Kuli isundo tonte ilyavyelyavye, nipanzyo lyakusimichila nalimwi. Ipanzyo lyakusimichila lyanyongana, awantu wawipe watitichizya awalungamane.
Itolelelo lya Mfumu e Leza
5Ngapano Imfumu e Leza anena awantu wakwe ati, Lolani kumyiko yino yawaliwilizya, mwandi muzunguke kwevino mukulola. Nandi nchite chimwi chino mutandi musuwile pano mwivwa. 6Nandi ndeke awina Babeloni wawe namaka, awantunye wawo awakutinia, wane wasipuza. Wakupita wakuchilingania insi ukuya chimvya insi zinji. 7Wanyama intete nukuzakazya, awakayichitile wisundo.
8Wakavwalo wawo wali nuluwilo ukulusye inkampu, swinya wakalipa walusya impumpi zino zili ninzala. Wakakwelela wakwe wakavwalo wakakuma umutikimbo pansi. Wakapunguluchila ndivino inzwanga zino zikalwisya chino zikulonda ukulya.
9Ivita vyawo vikuyanga nukuchimvya kwachikalazi, nawensinye akazakaza pane wavilola vikuya kweneko. Intapwa zino zikalemwa amintapendwa ngati aluselesenga. 10Wakwelengula izyamfumu, swinya wakaseka inzyankombe nkulu. Pasi ilinga lino lingawalesya—wakalundika umusili pilinga awasuka awachimvya. 11Awapyela mwenemo wamuza; awasowa napano walyata, awantunye waa wane wakapepa amaka yawo.
Habakuku alilizika swinya
12Iye we Mfumu Leza, walinji we Leza ukufumilila pakutalika-talika. We Leza wane, umutele wamuyayaya. Mfumu Leza wane, Katula wane, wasola awina Babeloni, waleka wali namaka ukuti watusunde. 13Wuzye ungazizimichizya wuli kuwantunye waa awawipe, awavye-wavye? Aminso yako amatele yano yatazipila ukulolechesya paviwipe, swinya utanga uzizimichizye ukulola wakachita waviwipe. Achaleka ngafwandi wamyalala wuli pane ukulola wakulovya awantu wane wawalusizye uwulungamane?
14Ngamuno chani chino ungachita awantu ngati answi, pamwi ngati atuzizi? 15Awina Babeloni wakalema awantu namaswelo ngati answi. Wakawakwema namasumbo, awazewela nichongochikulu panowawalema! 16Awafukamila amasumbo yawo awayafimila inzuwi, amuno amasumbo yawo yakawapa ivizima.
17Wuzye walanga wakawomvya impanga zyawo penye, walange wakulovya imyiko nanti nkumbu?
Selectat acum:
Habakuku 1: WWN82
Evidențiere
Copiază
Compară
Împărtășește
Dorești să ai evidențierile salvate pe toate dispozitivele? Înscrie-te sau conectează-te
Chinamwanga Bible © United Bible Societies, 1981.