Versete biblice populare din Epesodeniza 4

Împărtășește

Tetideni cauanerara caneza timecotedeni pina acco acco titicanabaqquimana narro. Timecote tiadeniza uima bica terreranicca inaneza naqui pouaza: —Peperri, ouadi-rrerani −tiquenarri. Tiadeni naqui uima bica terreranicca tinanemanezape timecotedeni tiadeniza: —Peperri, ouadi-rrerani −quenauiuarrine bica tani. Pina Deopa Poua Bedi Zeso Cristoza tiquerrenezape tiadeniza: — Peperri, ticcadeni uimasiri ouati rrimani −narrarissa tiquenarri, onarraro.

Tibodideniza: —Ouape arrimani orrani −tiquenani bica tani. Rroneqquiri tiqueneza tettideni bica teza uati uati tiquenana. Timecotedeni tezerre tetideni cauanerara caneza amazati tedimana-rrerana. Madirra tiadeniza nacassera taza naco pina mouaraza tinauanemanana, onarraro.

Touatti uaidira taniccape uati uati tiquenerrerarri. Touatti bica taniccara uati uati tiquenarri. Nema tiquenezape timecotedeni bodideni acco ticanabaqquiza rrehenirrirideni todacorani naniuarrine. Tettideni bica taniccara mittemanazapa bodideni uatizemanauiuarrine.

Ocasserani temanezape orri tizanapomana terrerarri. Ticcadeni uadie denima dacoranicca naqui tinebomanarri. Uadie arrimanicca naqui tecauemanazanapo-rrerarri. Amossiniza atti atti tiquenarraro, tatamasso tiquenarraro naqui tinebomanarri. Uaidirehe onihi onihi naqui tiadeniza noueraniuarrine tinebomanarri, onarraro.

Tedimanezape uimasiri tinanemanarrerarri. Tedimaneraha narraro uadaza tetideni ssonani bica tani. Parri, Tocorime-Taminerrine uaidirehe tinanemanerana, onarraro.

Nezape narraro Zeso Cristocca marinarra ticauatterezape ticcadeni madie rradani arri tiadeni touini tiquenaporraroccape tinebomanarri. Uaidirehe touini tiquenarrarope tiadeni tocamaizabaqquirraro. Narraro uaidirehepe tiadeni tonauaidirarraro. Tibodideni tecarriqquimeremanarri. Deoza: —Occa uima rradani touini onerreraniuarrine obodi zati tinanarri −tiquenarri. Nezape Deo tibodideni zati inanezape ticcadeni madie naqui zati torranitoui. Deopa pina pocca uimassa nehe timadimananiuarrine tiadeni acco tocanabaqquiuitoui. Deocca uimape parrirenissa tarraro. Pouapa uimasiri cappirarrari. Pocca parrisseheza timadimanezape pina Pouassa tiquenanitoui.

Deo Corime tiadeni acco tocanabaqquiza tirrariqquimananissa tarri. Narrarossa tizanapomananiuarrine dameraqquiri tiquenarri. Ticarronerara canehe timadimanezape nema tizanapomananiuarrine tiparriremananitoui.

Nazama madirraza da inarizarrarope zepedeni irrimanauiuarrine inanarizarraro. Ouahadenipa Zeso Cristo pocca zozosse tabaqqui toquerrenauiuarrine inanabaqquirrari. Ouahadenipa Deo Atti uati iqquime-mananiuarrine inanabaqquirrari. Ouahadenipa Deo Atti ecomeremana-rizeza Zeso Cristo pouaza rrehe quenauiuarrine zosse inabaqquirizarrari. Ouahadenipa Deocca madirra cacauade toquerrenauiuarrine inanabaqquirrari. Ouahadenipa Deo Atti mamaride toquerrenauiuarrine inanabaqquirrari. Nama nazapa pouaza toquerrenarrarideni inaparrirebaqquirrari, Deoza zepedeni irrimanauiuarrine, imecotedeni acco icanabaqqui- manauiuarrine. Nezape Zeso Cristo poua assiressa inarrarodeni icca rrehenirri denima todacorani naniuarrine. Icca rrehenirri todacorani zanapozape niza zotode ia bazima Zeso Cristoza rrehe inarrarodeni irrariqquinissa tanitoui. Deo Bediza inocco torrizeranissa tezape pouaza nauatoqquiri inanitoui. Nezape denima denima Deo touini nauicca icauatterazanapozape pina rradauideni nauatoqquiri narrarissa inanitoui. Deocca nauatoue icarrinitoui. Icca madie parrirenissa tanitoui. Pina Zeso Cristocca madie bica tarrarossa nanitoui.

Icca rrehenirri dacoreza Deocca nauatoue icarrizape ibodi uatoue pina erredeniccassa nerreranitoui. Erredenipa tocauattera-rraraccaza bodideni uatomanauissa tauiuarrine parriremana-rraraui. Pina rrorroderrine ppaua tarrari arrauarri tocca, arrauarri tocca narrarissa quenarrari. Erredenipa marinarra onihiza, onihiza toquerrena taui. Arra madirra maizehe uatide nauatoqquiri narraridenipa erredeni icamaizabaqqui-manauiuarrine pouadeniza narrora tani. Naraha iape Deocca marinarra parrisseheccazana rrehe inarraro. Narraroza imadirraro. Imecotedeniza eti uana tezape pouadeniza uima parrissehera uati uati inarraro. Nema inezape icca madie tobicazanaponitoui. Pina Zeso Cristocca madiessa nanitoui. Zeso Cristopa pocca iquerrenarraro ia Zossede. Pina itati essire zosse zosse narrarossa narraro.