Versete biblice populare din O KORINTUS MADODIHIRAKA 13

Împărtășește

O nyawa yädora-dora o nyawa mahomoa, yosabari deʼ manga hininga irahai. Unanga o hininga wägogonua, womahi ngaro-ngarokua, woedengua. Unanga aihininga ikurutil̄eua, wotingkaiua, ünanga waributuua o nyawa mahomoa mangale yanïki aimau mahirete, kademadataitiua wongamo, deʼ wägogonikaua o nyawa manga howono.

Unanga wotäna wohimanga hagala moi-moi, de womau wongaku aha duru maoa-oa o nyawa moi-moiika; sarakiadika marupa magoronaka o nyawa de manga doraka gënanga komaiwahi ihihanga manga nganono deʼ manga sabari yödamä hagala moi-moi.

O nyawa yädora-dora o nyawa mahomoa, yosanangua de o dorou, ünanga duga-duga wosanangi de o oa-oa.

Hoʼ, mangale örahanënanga naga o hali hange ngone kiani tatapu hadiai: o ngongaku, o nganono deʼ homakodora. Duru mal̄okuoka o gahumu hange gënanga, ganga hadora o nyawa mahomoa.

Komaiwahi aha naga maöraha kiaka o nyawa iparaluua imateke hininga. Oraha nënanga naga o nyawa yosawaro ihingahu o abari ma Jou Madutuino, mä damä ünanga aha womatogumu wohi ngahu o abari gënanga. Orahanënanga naga yosawaro yotemo-temo irupa-rupa o demo magoronaka ihohëra-hëranga, mä damä ünanga aha womatogumu wotemo o demo-demo gënanga magoronaka. Orahanënanga naga o nyawa ihiöriki o hali mangöe, mä damä okia önanga ihiöriki gënanga aha yawohangoka.

Ngaroka ngohi takunu totemo-temo de o nyawa mademo i rupa-rupa, de ngaroli de o malaekat mademo, mä ngohi tädoraua o nyawa mahomoa, ahidemo-demo gënanga duga-duga kama ilingi ikuatil̄e ma okia-kiaua mamangarati.

Ngaroka ngohi tosawaro tohi ngahu o abari ma Jou Madutuino, deʼ tomangarati mata-mata o hali ilöluku-luku, deʼ tohiöriki hagala moi-moi de duru tingaku ma Jou Madutuika hiädono takunu tadiai o l̄oku imatururu, mä ngohi tädoraua o nyawa mahomoa, ngohi kokia-kiaua mamangarati!

Ngaroka mata-mata tongohi ahiarata, tahi döakoka o mihikini manyawaika, deʼ ngohi tohilapahi ahidiri layaharongo, mä ngohi tädoraua o nyawa mahomoa, mata-mata gënanga kautuö de koiwa mabaraguna.

Maöraha ngohi kao ngohaka maitetekohi, ngohi totemo-temo hokä ngohaka maiteteke, ngohi ahi mamäo hokä o ngohaka maiteteke, deʼ ngohi tatibanga hokä o ngohaka maiteteke. Oraha nënanga ngohi tobaluhoka, tongohi ahimanarama o ngoha-ngohaka, ngohi taumoka.