Isaías 54
54
Papang kulnin dalani ban kaput duwa kidika sarandis
1Alasna duta sarahta, muih yal walabis yaktasman kidika;
alasna duta unbautah,
man muihbin as bik yaktasman kidika,
kat Dawan yulwi:
“Muih yal as ruhmwi dana kidika walanibis mahni duwarang,
yal as al duwa kidika karang dawakat.”#Gal 4:27.
2Man ūma labanni kidika baisa nuhni yamtah,
yamadutas ū paknin asnina dinit yakat āwaman kidika ritah;
wahni balna kidika murtah dawak panan uknaman kidika yamni tisatah,
3kat baisa panuhta alahyawama bahang, tingmapal dawak wadahma niningyakat bik;
man sulama balna kidika pa manas laihwi duduna karang bahang,
dawak kaput bik waradika kauhmak wanilang di dis kidika yakat tawan nunuhni yayamna karang.
4Yamaduwinih, namangkarinin diskarang ki;
mauhuswas karang ki dawak asalni bik dutas awama.
Wahma asalma dai kidika damatkahna karang,
dawak kaput bik ismangkattas awama tingmak kalta rismapik dis dawarang kidika,
5kat mayamna muihni kidika yaklauwi yalni maduwarang bahang.
Witing ayangni laih Dawan parasni nuhni duwi;
malaihwi yakyang kidika laih Israel Papangni maisihni dis kidika,
sau bitik Papangni.
6Yal sirau as al duna
kaunah ruhmwi kaldana kat kulnin bukna kapat man dai,
kaunah Papangma yaklauwi watwi aput mayulwi:#Ez 16; Os 1-3.
7“Ma parahni marumhtik danayang dai,
kaunah minikunni talnin lani nuhni kau wattik maduaitingkat kalpakdarang yangkarak.#Sal 30:5; Is 60:10; Lm 3:31-33.
8Sirihni man kulnam daukalnaman dai, dawak yang bik ma parahni man kaupak maldanayang,
kaunah dalani ban kaput atnin kau mamakun matalnayang.”
Yulwi, Dawan malaihwi yakyang kidika.
9“Noa yakat kalyulnayang dai kaput, was nuhni āna dai kidika,
watwi was nuhni-āwas karang sau akat,#Gn 9:8-17.
kaput laih man yakat mayultayang rahm palni
wattik kulnik daukalnik awas man yakat,
dawak namangyakat lawinik-awas.
10Asang balna kidika panina kaupak dawi pa ūk yakat yaklalawarang karang bik,
dawak asang balna kidika langni manah kalwarang karang bik,
yang man yakat dalani matalayang kidika satuk kalwas karang,
dawak kulnin aslah lani pranimis yamnayang kidika sau yakat bukwas karang.”#Jr 31:35-36; 32:40; Mk 13:31.
Dawan kaput yulwi, man yakat mamakun matalwa kidika.
Jerusalén wisam
11“¡Tawan nuhni as alasna dis kidika,
wing parasni wauhna kidika yaklauwi daukalpamna kidika muih as bik diski walaniana atnin!
Manna kimanapala kidika sani minit yakat ilki,
dawak rahni balna kidika laih kipala minit nuhni sangni kau karang;#Rib 21:18-21.
12Makau kilwi talnin pāni kidika kipala pauni kau yamki,
dawak dūrma balna kidika laih kipala sangni dibasta kapat kau yamki,
dawakat daklana balna kidika laih kipala dahlwa balna kau manah yamki.
13Yang walamabis balna kidika bitik sumalki;#Jn 6:45.
witingna bitik di yamni manas duduwarang.
14La barangni kidika yaklauwi parasni mayamwarang,
yamadunin dawak taihnin kidika kaupak dakta alahwama;
muihsak daunin kidika yaklauwi kulnam abalhwas karang ki.
15Muih as namangyakat yaklauwarang kat, kaunah kidika laih yang yulki awas karangki,
kaunah man lawa minit bayakma, namangkauh yaklauwa muihni yakat.
16“Talah, ayan kau di yamwa muihni kidika
yang lawik muhnayang witing kuduh kuh tuturni kidika kalawakat daihni kalwa kidika,
dawak kaput laih kalbaunin dini sat sat yamwi;
kaput bik yang lawik muih al di daukalyang kidika muhnayang di balna kidika daukalna atnin yulni;
17kaunah kalbaunin di as man yakat madaukalpamnin kidika
laih muih as bik baisa yamwas ki.
Man dutni yamnaman atwi yulma yayakwarang balna kidika man lawa tininapas ap dama.
Kidika kuduh yang lawik diatayang yang diki yamyang balna yakat: minit bayaknin.”
Dawan yaklauwi yulwi.
Atualmente Selecionado:
Isaías 54: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
