Isaías 53
53
1¿Wais rahm kulwarang yah, mayang dakanamayang kidika matapaki kau?#Rom 10:16.
¿Papang parasni kidika wais yakat niningkana yah?#Jn 12:38.
2Dawan laih dukih kalnadai, witing warauni kidika
pan as kapat barakwak talna atnin,
rikni balna kidika sau buhni kidika pasyakat kakiwa kapat.
Yaksihni dawak yaringni bik disdai,
talkih bik mayawas dai;
3muih balna kidika yamni tatalwas dai.#Sal 22:6-7; Is 49:7.
Muih al as dalani kidika nuhni palni trukna,
wauhnin kidika lan kalna dai.
Witing yakat kaltalnin bik yamni-awas dai,
dauh kalkulna mayang, bahang kalkuldasdai.
4Kaput kaunah, witing laih mayang wauhda kidika trukna sakdai,
trukna sakdai mayang dalani wauhda kidika.#Mt 8:17.
Mayang kulnamayang laih Papang yaklauwi witing muihni yakat dakwi,
wah kalana dawak sau kau lakna.
5Mayang makulnik dutni yulni Witing yakat pawi ahalna dai,
mayang madutki yulni, dalani wauhna dai;
wah dalani wauhna kidika yulni kulnin aslah lani duaiwi mayana,
witing muihni dakna kidika yulni mamuihki yamni dudi.#1 Pi 2:24.
6Mayang laih bitik sīp kapat disnamayang dai,#1 Pi 2:25.
mataki silp silp waldi,
kaunah Dawan laih witing trukna dai mayang bitik madutki kidika.
7Kasak wiwisna dai, kaunah witing sau yakat bukna dai,
dawak tinpas bik wakahwasdai,
sīp as inin pāni yakat duwi uiwa kapat,#Rib 5:6.
witing ap dai, tinpas wakahwasdai,
sihm sīp as butuni kakahrwa kapat.
8Duwi uina dai la as dis dai karang bik,
dawak muih as bik disdai nanit dakna atnin;
muih as bik kulwi kalbauwas dai witing yulni.
Adika sauni kaupak dakwi yayakna dai,#Ap.w 8:32-33.
ihina dai yang tawanki dutni yamna yulni.
9Muih dudutni balna yaihnitna yakat nununa,
muih dudutni#53.9 Muih dudutni: kaput ulna kidika yamni kapat ki. Hibru kau laih yulwi di duyang balna. balna karak nununa,
di dutni as yamwas dai
dawak tinpas kaupak alas as bik yulwas dai.#1 Pi 2:22.
10Dawan yaklauwi taihnin kulna dalani wauhnin kau.
Dawak kaput laih witing kidika muihni sakripais yamna dutni kidika yulni,
bahang witing sangnika naini karang,
dawak sulani balna kalahwi kaiwa balna kidika bik talna karang;
witing muihni munah laih Dawan warkni balna kidika yamna kalahna karang.
11Kulnin bukna nuhni duna munah laih witing yaringni talna karang,#53.11 Yaringni talna karang: sara kau ulna yakat kaput yulwi. Hibru kau laih yulwi talwarang.
dawak witing talwarang kat isninglak dawarang;
Dawan dini yamyang barangni kidika muih mahni laihwi yakna karang,
kat witingna dutnina kidika trukwarang bahang.
12Kidika bahang Papang yaklauwi, nunuhni pasyakat pa as kalawarang,
dawak parasni nuhni duyang balna minit bayayakna kidika pasyakat karang witing bik,
kat witing muihni kidika daunin yakat āna
dawak muih dudutni pasyakat witing bik kaput kalkulna dai bahang,#Mk 15:28; Lc 22:37.
kaunah di rahm kidika laih muih mahni dutnina kidika trukna,
dawak muih dutni balna tunanina minit yulna dai.
Atualmente Selecionado:
Isaías 53: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
