Isaías 55
55
Dawan yaklauwi dianin yulwa kidika
1“Bitik dikih kalawa muihni kidika,
aiwa was ditanauh;#Jn 7:37; Rib 21:6; 22:17.
lalah dismana kidika aiwanauh,
aiwa plawar yakta kastanauh minitdis;
wain dawak tāwas yakta ditanauh minit lautas.
2¿Ais yamwi lalah launinyah kasnin dini-awas kidika?
¿Ais yamta wark alahwanaman minit kidika kau laumayah ismanglak dawas dini kidika?
Yamni yadakanauh, manna di yamni kastanama,
di auhni kastanama.
3Yang akat aiwa yamni dakanauh,
yang akat yadakanauh, sangka awanama.
Yang manna karak pramis as yamki kaput ban atnin,
kaput yamki karangkat Devid yakat dalani talik pramis yamnayang dai kidika yakat yamna awaki.#2 Sam 7:4-16; Ap.w 13:34.
4Yang lawik witing kidika ānayang witnis atnin sau muihni balna yulnina,
witing kidika tunan muihni dawak bik disumalna atnin.
5Man lawa diyulma aina atnin tawan talasman balna yakat;
tawan balna man yakat amangmalalawas balna dai kidika kirinah uiwarang man yakat,
kat yang man Damawan, Israel Papangni holi kidika,
yang lawik rispik mayamnayang.
6“Papang yakat walta sipmana mani yakat walta yaktanauh,
yaihmatna kau sakkidika mani balna yakat kalyultanauh manna yakat kiunin.
7Muih dutni tāni kidika dawang,
dawak dutni yamyang muihni kulnin balna kidika bik dawang;
Dawan yakat nawatta aiwanauh, manna yakat mamaknakun manatalwarang;
mayang Mapapangki yakat nawatta aiwanauh witing laih madutki dawak diswi.#Lm 3:40-42; Zac 1:3; Mal 3:7.
8-9Kat yang kulnik balna kidika laih manna kulnamna balna kapat awaski,
dawak di balna yamtayang kidika manna yamtamana kapat awaski.
Makau kisang kidika sau minit yakat kidika
kaput yang kulnik balna dawak yamtayang balna kidika manna mamatna yakat ki.”
Dawan yaklauwi kaput yulwi.
10“Waslauwa kidika dawak mukus pihni makau kisang kaupak kai'bukwa kidika
watwi nawatwi kiwas ki, kaunah sau kidika suihwi,
dawak di minit balna kidika pitwi kalahwi,
dawak miniksani kidika yakwi dahna atnin,
dawak kasnin dini kidika kalahwakat kasna atnin,#2 Kor 9:10.
11kaput bik laih yul balna tikpas kaupak kalahwa kidika,
minik as bik yakwas laih yang yakat nawatwi kiwas ki,
nawatkauh laih yang dukih yawa yakat yamwi,
dawak yang lawik paktayang kidika kaput laih yamna ki.
12“Manna kidika kaupak alasna karuk alahwanama,
manna saumana yakat kulnamna aslah karak yawanama.
Asang nunuhni balna dawak asang ubulni balna kidika
talwi alasna duwi unbabauwarang alasna manah,
dawak pan balna kidika laih tingnina titiswarang.
13Wakal ukusnin dai kidika pāni yakat awas ukusna karang,
dawak ortiga ukusnin pāni dai yakat burimak ukusna karang;
adika Dawan ayangni nuhni yamna karang;
sain as ban kaput karang, dawak sip daukalwas karang.”
Atualmente Selecionado:
Isaías 55: SUMU
Destaque
Copiar
Comparar
Compartilhar
Quer salvar seus destaques em todos os seus dispositivos? Cadastre-se ou faça o login
Biblia Sumo
Texto © Sociedad Bíblica de Nicaragua 1998
