Matayo 22
22
Olufumo lwa bugenyi bwa bugole
(Luk 14:15-24)
1OYesu nʼairamu okubaza nʼabantu nakukolesya enfumo, nʼakoba ati, 2“Obukama obwa mwiguru bwisanisibwa nʼomukama, eyateekaniriize omwana waamwe obugenyi bwa bugole. 3Nʼatuma abaweereza baamwe bakobe abaayeteibwe oku bugenyi baize. Baitu abaayeteibwe ni bagaana. 4Nʼaira nʼatuma abaweereza abandi nakukoba ati, ‘Mukobe abaayeteibwe nti: Obugenyi bwange buweire okuteekaniza. Endaawo nʼensaata zange ziitiibwe. Era buli kintu kiweire okuteekaniza. Mwize oku bugenyi bwa bugole.’ 5Baitu abaayeteibwe ni batafaayo, ni beeyabira mu byabwe. Omwei nʼayaba omu ndumiro yaamwe, owondi mu busuubuli bwamwe. 6Abandite ni bakwata abaweereza baamwe ni babaakalya kubbi, era ni babaita. 7Omukama nʼakwatibwa ekiniga nʼasindika eiye ryamwe, nʼazica abaiti abo era nʼacumuka ekibuga kyabwe.
8“Awo nʼakoba abaweereza baamwe ati, ‘Obugenyi bwa bugole buweire okuteekaniza, baitu benayetere tibakubusaanira. 9Ati mwabe omu masanganzira bemwabona boona boona mubeete baize oku bugenyi.’ 10Abaweereza ni baaba omu nguudo, ni beeta bebaasangire boona boona, ababbi nʼabasai. Ekisiika kya bugenyi ni kiizula abantu.
11“Awo omukama niyaingiire okubona abagenyi, nʼabonamu omuntu atazwaire kizwalibwa kya bugenyi bwa bugole. 12Omukama nʼamubuulya ati, ‘Mukaagwa, oingiire otyai muni notazwaire kizwalibwa kya bugenyi bwa bugole?’ Ye nʼasirikambe.
13“Awo omukama nʼakoba abaweereza ati, ‘Mumubbwe emikono nʼamagulu mumunage enzai omu kiiruma, awali okukunga nʼokulumwa omuno.’ ”
14Awo oYesu nʼamaliirya nakukoba ati, “Baingi abeetebwa, baitu abakomwamu badooli.”
Ebikufa oku kuweerya omusolo
(Mak 12:13-17; Luk 20:20-26)
15Awo aBafarisaayo ni baaba, ni bateesa nka ni baatega oYesu omu bigambo byamwe. 16Ni bamutumira abeegesebwa baabwe, amwei nʼabasagiki ba Kerode, ni bakoba bati, “Mwegesya tumaite nga we oli wʼamananu, era abantu obeegesya mu mananu ebyo oKanca byayendya bakole. Era tokoleera kusiimwa bantu kubba boona boona obaakalya omu ngeri nigyo emwei. 17Ale ati, tukobere, okulowooza otyai? Kiikirizibwa omu mateeka ga Musa okuweerya oKaisaali#22:17 OKaisaali Kini kitwoni ekyaweebwanga abakama ba bukama bwa Rooma; okugeza OKaisaali Agusito. omusolo, oba bbe?”
18Baitu oYesu ni yeeteja ebigendeerwa byabwe ebibbi, nʼakoba ati, “Bagobya nywe, lwaki mukungezesya? 19Mundange edinaari gyebakolesya okusasula musolo.”
Ni bamuleetera erupiiya.
20Nʼababuulya ati, “Ekiisani nʼamabara ebiriku bya naani?”
21Ni bamwiramu bati, “Bya Kaisaali.”
Awo oYesu nʼabakoba ati, “Ale ati ebya Kaisaali mubiweerye oKaisaali, nʼebya Kanca mubiweerye oKanca.”
22Nibaawuliire ebyo, ni beewuunya muno, ni bamuligaku, ni baaba.
Ebikufa oku kuyimbooka
(Mak 12:18-27; Luk 20:27-40)
23Ekiro ekyo, aBasadukaayo, abakoba nambu ndoowo kuyimbooka, ni baiza egiri oYesu ni bamukoba bati, 24“Mwegesya, oMusa yakobere omuntu nafa, nʼataleka mwana, omuganda wa rufa ateekwa okubandula onamwandu, leke abyare omugande abaana.#Tek 25:5 25Ati, ewaiswe waaliyo abaluganda musanju. Omukulu nʼabandula, baitu nʼafa atabyaire mwana. Omukali waamwe nʼamulekera omugande. 26Ekintu nikyo kimwei ekyaikire oku wakabiri nʼowakasatu, okwica oku wamusanju. 27Kyairai, omukali yeena nʼafa. 28Ale ekiro ekya kuyimbooka, omukali oyo alibba wa naani okwabo omusanju? Kubba boona boona baamubandwire.”
29OYesu nʼabairamu ati, “Mubula olwa butamanya ebyawandiikiibwe era nʼamaani ga Kanca, 30kubba abantu nibaliyimbooka, balibba nkʼabamalaika omwiguru, nibatacaabandula, era nibatacaabanduka. 31Ebikufate oku kuyimbooka kwa bafu, timusomangaku oKanca kyeyabakobere? Yakobere ati, 32‘Ninje Kanca wʼIbbulaimu, oKanca wa Isaaka, era oKanca wa Yakobo.’#Kuz 3:6 Ti Kanca wʼabafu, baitu owʼaboomi.”
33Abantu nibaawuliire, ni beewuunya okwegesya kwamwe.
Eiteeka erikulu
(Mak 12:28-34; Luk 10:25-28)
34Awo aBafarisaayo nibaawuliire nti oYesu asirikirye aBasadukaayo, ni bakumbaana. 35Omwei oku bo, omwegesya wʼamateeka ga Bayudaaya, nʼamubuulya nakumugezesya ati, 36“Mwegesya, iteeka ki erisinga goona goona obukulu?”
37OYesu nʼamwiramu ati, “ ‘Yendyanga oMukama, oKanca waamu, nʼomutima gwamu gwona, nʼomwoyo gwamu gwona, nʼamagezi gaamu goona.’#Tek 6:5 38Eryo niryo eiteeka eryebembera goona, era erisinga obukulu. 39Eiteeka eriiririira eryo omu bukulu, era eririisana, niryo rini, ‘Yendyanga omutaayiwo nka ni weeyendya.’#Lev 19:18 40Oku mateeka gani gakali gombi, amateeka goona goona nʼebyawandiikiibwe abalangi nikwo byesigamire.”
OKurisito nʼoDawudi
(Mak 12:35-37; Luk 20:41-44)
41ABafarisaayo nibaakumbaine, oYesu nʼababuulya ati, 42“Mukulowooza mutyai oku Kurisito? Mwizukulu wa naani?”
Ni bamwiramu bati, “Mwizukulu wa Dawudi.”
43OYesu nʼababuulya ati, “Ale lwaki oDawudi omwenyenere, naizwire oMwoyo Akwera, amweta oMukama waamwe? Akoba ati,
44‘OKanca yakobere oMukama wange ati:
Ikaara nonnyerereire oku rubaju lwange olwa gulyo,
okwica nindita abazugu baamu
ansi wʼamagulu gaamu.’#Zab 110:1; Mak 12:36; Luk 20:42
45“Ale oba nga oDawudi omwenyenere amweta Mukama waamwe, obwote asobola atyai okubba omwizukulu waamwe?”
46Ni watabbaawo akusobola okumwiramu. Era okuliga ekiro ekyo ndoowo muntu yagumire kumubuulya bibuulyo bindi.
Atualmente selecionado:
Matayo 22: RUULI-NYALA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão