A-pûn Awang 37
37
Yosep É Yhupmòq Pé
1Yakup gi, yhâng wa nyi laî lo é Hkanan mau má nyi nyi ri.
2A-ô mâ é gi, Yakup eq yhâng é yhûmbyù wui é hkyô nghut lhê.
Yosep gi, chyungxe zànwut 17 zân bo é hkûn, yhâng wâ é yhûmsîng myhî nhik Bila eq Zilihpa é yhang zo yùqzô pé nghut é, yhang mâng pé eq rahá sau bainám pé zúng é nghut luî, haú bang a ge é hkyô lé, yhángmòq é yhâng wâ chyáng hkyáng lo shit shit kut ri.
3Isira-elaq gi, yhang chyungxe zànwut mâng byùq é hkûn shèq, Yosep lé hku é yánmai, yhâng é yhang zo yùqzô pé góbâng htoq má yhang lé je chyitdàp ri; haû mù, yhang gi, Yosep é matú gyai réng é buhîng hkyup byî ri. 4Yosep é yhang mâng pé gi, yhángnhik wuî góbang bànshoq htoq má, yhang lé, yhángmòq é yhâng wa je chyitdàp é lé myàng kôjáng, yhang lé a naù a wom lo kômù, dang gê a wó nyô lo kó nghut ri.
5Yosep gi, yhupmòq ralhum myàng mù, yhang mâng pé lé taî kyo jáng, yhángmòq gi, yhang lé je riyhang a naù a wom kut bekô nghut ri. 6Yhang gi, yhángmòq lé, “Ngá é yhupmòq lé gyô wú keq; 7Ngá-nhúng gi, yò mâ é gùq lé chôm dîng nyi é hkûn, byò dàn tung, ngá é gùqding gi, toq lô mù, nyâng za yàp tô é u lé, núngmòq é gùqding pé gi, ngá é gùqding lhînghkyùq má zîng lò kômù, haú lé chôm ngóm gòp noqkuq akô nghut ri.” ga taî ri.
8Yhang mâng pé gi, yhang lé, “Nàng gi, ngá-mòq lé ùp zo râ myìt lhê lhú? Nàng gi, ngá-mòq lé gè gè yhang ùp râ lhú?” ga taî akô. Haû mù, yhángmòq gi, yhâng é yhupmòq é yánmai le, yhang taî é dang yánmai le, yhang lé je riyhang a naù a wom kut bekô nghut ri.
9Hau htâng, yhang gi, gótû yhupmòq ralhum dum myàng mù, yhang gu yhang mâng pé lé haû dum taî kyô ri. Yhang taî é gi, “Gyô wú keq; ngò, gótû yhupmòq ralhum dum myang ri; shí dâm gi, buì, lha-mó eq kyî raxe racham, ngo lé ngóm gòp noqkuq é lé myang ri.” gâ ri.
10Yhang gi, yhâng wa lé le, yhang gu yhang mâng pé lé le, taî kyo jáng, yhâng wa gi, yhang lé tan mù, “Nàng myang é yhupmòq gi, hkâsû é wá lhú? Náng nu eq ngò le, nunggu nungmâng pé le, gè gè yhang, náng chyáng lé mù, náng é hí, myigùng htoq má lé ngóm gòp noqkuq râ lhú?” ga taî ri. 11Yhang gu yhang mâng pé gi, yhang lé mânon bum akô; nghut kôlhang, yhâng wa gi, haú hkyô lé, yhâng é i-myìt má kat tô ri.
Ung Zô Pyám Huî É Yosep É Hkyô
12Ahkuî, Yosep é yhang gu yhang mâng pé gi, Shehkem nàm má, yhángmòq yhâng wâ é sau bainám pé lé zúng râ ga é ló akô; 13haû mù, Isira-elaq gi, Yosep lé, “Nàng sê é eq rajung za, nunggu nungmâng pé gi, Shehkem nàm má sau bainám zúng nyi bum akô. Gaì, ngò, nang lé, yhángmòq chyáng nhang kat bá.” ga taî ri.
Yhang gi, “Ge ri.” ga tû taî ri.
14Haû mù, Isira-elaq gi, yhang lé, “Nunggu nungmâng pé le, sau bainám pé le, bànshoq rago nghut nyi bum lhê làq, ê wú mù, ngo lé hkyáng lo shit àq.” ga taî ri. Hau htâng, yhang gi, Hebron langhkaû mai Yosep lé nhang kat bê nghut ri.
Yosep, Shehkem wà má ê jé é hkûn, 15yhang yò má sô maú lhing wún é lé, byù rayùq lhom myàng mù, “Nàng, haî ho wún lhê?” ga yhang lé myî ri.
16Yhang gi, “Ngò, ngá mâng pé lé ho wún lhê; yhángmòq, sau bainám pé lé hká má zúng nyi bum akô? Nàng wó taî kyo râ lhú?” ga tû taî ri.
17Byù haú yùq gi, “Yhángmòq shî mai htòt bekô; ‘Ngá-nhúng, Dohtan má ê sháng.’ ga yhángmòq taî é lé, ngò wó gyô ri.” ga tu taî ri.
Haû mù, Yosep gi, yhang gu yhang mâng pê é htâng má châng e ló le, Dohtan nàm má yhángmòq lé ê myâng bê nghut ri. 18Nghut kôlhang, yhángmòq gi, we we mai yhang lé lhom myàng kôjáng, yhángmòq chyáng a jé lé shi-má, yhang lé lhom sat pyám râ matú hpyê lhûm akô nghut ri.
19Yhángmòq gi, rayùq eq rayùq, “Yhupmòq myàng wá shî má lé lo ri! 20Lé keq, yhang lé sat pyám mù, wuì tíng dong radong má dú kat pyám luî, htîm dik é tân jung gaunyhaû èq yhang lé myhui pyám bê nghut ri nghû taí sháng. Haú hkûn, ngá-nhúng gi, yhâng é yhupmòq hkâsu dùt lò râ lé myàng râ nghut lhê.” ga taî lhûm akô nghut ri.
21-22Rubin gi, haú lé wó gyo jáng, “Yhâng é chyungxe lé a yu pyám byi sháng; hai sui le hkâ lhoqhtoq kó. Yhang lé a záng htûng é za, yòso shî mâ é wuì tíng dong shî má dú hkyô pyám sháng.” ga taí luî, yhángmòq é lòq mai yhang lé hkyi htoq yu ri. Rubin haû su ga taî é gi, yhángmòq chyáng mai yhang lé hkyi yù luî, yhâng wâ chyáng shuî ló byi naû mù nghut ri.
23Haû mù, Yosep gi, yhang gu yhang mâng chyáng jé lé é hkûn, yhángmòq gi, yhang wùt tô é réng dik é buhîng lé hkyut pyám byi kômù, 24yhang lé bún toq yû luî, wuì tíng dong má dû hkyô kat bekô nghut ri. Wuì tíng dong haû gi, wuì a bò mù, huí huí dùt tô ri.
25Yhángmòq zang zo râ ga zung nyì uchyang tu wú kat kô é hkûn, Gile-at mai gyó lé lo é Ishima-elaq byù wuìloq kut bang rahpúng lé myang kat akô. Haú bang gi, yhángmòq é gola-uk má namngón jung agyi, chi gâm agyi pé eq mura pé htô chûng mù, Egutuq ming shut gyó e ló akô nghut ri.
26Haú hkûn, Yudaq gi, yhang gu yhang mâng pé lé, “Ngá-nhûng é yhang gu lé sat pyám mù, yhâng é sui lé zaú tô le gi, ngá-nhûng é matú hai a-kyû bò râ lhú? 27Gaì, yhang lé, ngá-nhûng é lòq èq haî a kut é za, Ishima-elaq byu pé lé ung byî kat sháng; haî mù gâ le, yhang gi, ngá-nhûng é yhang gu le, ngá-nhûng é suisho le nghut lhê.” ga taî ri. Yhang gu yhang mâng pé gi, haú hkyô lé myìt hui bekô nghut ri.
28Haû mù, haû Midi-an byù wuìloq kut bang lé lo nyi kô é hkûn, Yosep é yhang gu yhang mâng pé gi, yhang lé wuì tíng dong mai lâng toq yû mù, ngùn htingchap zo 20 èq, Ishima-elaq byu pê é lòq má ung byî kat luî, haú bang gi, yhang lé, Egutuq ming shut shuî é ló bê nghut ri.
29Rubin gi, wuì tíng dong haú má dum taû jé le, haû má Yosep a lúng to lô é le myàng mù, nhik ashî hkyô shit é dông mèbu lângcheq pyâm ri. 30Hau htâng, yhang gi, yhang gu yhang mâng pê chyáng taû lé mù, “Hé má zoshâng a lúng to lo! Ngò hkâsu kut lo râ lhú?” ga taî ri.
31Haú hkûn, yhángmòq gi, Yosep é buhîng lé yù mù, bainám radu sat luî, buhîng haú lé sui má jum yù bekô nghut ri. 32Yhángmòq gi, réng é buhîng haú lé, yhángmòq é yhâng wâ chyáng yu taû ló byi mù, “Shî lé ngá-mòq myang gùq ri. Nungzô é buhîng nghut a nghut é lé wú wú aq.” ga taî akô.
33Yakup gi, haú lé wú sé luî, “Shî gi, ngá zô é buhîng nghut rô! Htîm jung yòsô zè pê èq yhang lé myhui pyám bu-nhung! Yosep gi, gè gè yhang, ajàp azo lâng myha pyâm é hui zo bu-nhung ô!” ga taî ri.
34Haû mù, Yakup gi, yhâng é mèbu lângcheq pyám luî, jimê tû wùt mù, yhang zô é matú buìnyì myo myo iyon yôn nyi ri. 35Yhang zo yùqzo byìzô pé bànshoq bang gi, yhang lé nhiktíng byi râ ga lé lo bum akô; nghut kôlhang, yhang gi, a lhom hàp yù nghut ri. Yhang taî é gi, “A nghut; ngò gi, ngá zô chyáng jé râ matú, iyon yôn é èq lùpdùng má gyó ló râ nghut lhê.” gâ ri. Haû mù, yhâng wa gi, yhâng é matú ngaùbyi ngaùnhap huî nyi ri.
36Haú u lé, Midi-an byù haú bang gi, Yosep lé, Egutuq ming má, Hpara-uq é zaugun hpó nghut sû, chyungxe zúng zau Hpotihpa ga sû lé ung byî pyâm akô nghut ri.
Obecnie wybrane:
A-pûn Awang 37: znot
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2025, Wycliffe Bible Translators, Inc.
