A-pûn Awang 38
38
Yudaq Eq Tamari É Hkyô
1Haú u lé, Yudaq gi, yhang gu yhang mâng pê chyáng mai htoq luî, Hira gâ é Adulam byù rayùq chyáng ê gyó nyi ri. 2Haú má, yhang gi, Shu-a gâ é Hkanan byù rayùq é yhang zo byìzo eq htûng hui luî, yhang lé yù mù, yhâng chyáng wang yhup bê nghut ri. 3Byìzo haû gi, zogûng wùn luî, yùqzo rayùq hkû mù, yùqzo haú lé Era ga myìng myhîng ri. 4Yhang gi, zogûng dum wùn mù, yùqzo rayùq dum hkû luî, yùqzo haú lé Onan ga myìng myhîng ri. 5Yhang gi, gótû yùqzo rayùq dum hkû mù, yùqzo haú lé Shela ga myìng myhíng byî ri. Yùqzo haú lé hku é hkûn, Yudaq gi, Hkezip má nyi tô ri.
6Yudaq gi, yhang zo zo-mún Era lé myiwe yù byî ri. Myiwe hau é myìng gi, Tamari gâ ri. 7Nghut kôlhang, Yudaq é zo-mún Era gi, haû Yhûmsîng Garaî é hí má agè ashop é sû nghut luî, haû Yhûmsîng Garai gi, yhang lé sat pyâm ri.
8Haû mù, Yudaq gi, Onan lé, “Nungmâng é awùt ashín xoq byi râ matú, îrhat rayùq é wò lhoqdìk é dông, nungmâng é yhûmsîng myhî chyáng wang yhup àq.” ga taî ri. 9Nghut kôlhang, Onan gi, wó lo é awùt ashín haû yhâng é a dùt râ nghut é lé sê ri; haû mù, yhang gi, yhang mâng é awùt ashín a kâm xoq byi luî, yhang mâng é yhûmsîng myhî chyáng wang yhup hkangmó, yhâng é nyàmwing lé, myigùng má lhoqhtoq pyám pyám kut ri. 10Yhang kut é múzó haû gi, haû Yhûmsîng Garaî é hí má agè ashop é nghut mù, yhang lé le, haû Yhûmsîng Garaî èq sat pyám bê nghut ri.
11Haú hkûn, Yudaq gi, yhâng dùmó Tamari lé, “Ngá zo Shela kô lo é hkûn jé shoq, náng wâ é yhûm má chuimó dông ló nyî aq.” ga taî ri. Hkâsu mù gâ le, yhang gi, “Yhang mâng nhiktâng su, yhang le shi byùq âbe.” ga wó myìt é yánmai nghut ri. Haû mù, Tamari gi, yhâng wâ é yhûm má ló nyi to bê nghut ri.
12Tsómra myáng é htâng, Shu-a é yhang zo byìzo, Yudaq é yhâng yhûmsîng myhí shi byùq bê nghut ri. Yudaq gi, iyon byán byùq é hkûn, yhâng é luzúm hpó Adulam byù Hira eq rahá, yhâng é saumaú wùq nyì bâng é jowò Timna má dòq e akô nghut ri.
13“Náng îgu gi, yhâng é saumaú ê wùq râ ga Timna shut e ló ri.” ga Tamari lé taî kyo kôjáng, 14yhang gi, yhâng é chuimó mèbu lé hkyut pyám mù, yhâng é myòqdong má hpajèt èq nghop luî, gùng má buhîng baíyùp chûng mù, Timna wà e ló é hkyô mâ é Ena-im wà hkúmdong má ê zung tô ri. Hkâsu mù gâ le, Shela kô dìng bê nghut kôle, yhâng é yhûmsîng myhí kut râ matú, yhang lé a yù byi shî é yánmai nghut ri.
15Yudaq gi, Tamari lé myang é hkûn, yhâng myòqdong lé nghop tô é yánmai, shiwa myhí nghut ri ga myìt yu ri. 16Yhang gi, yhâng dùmó nghut é lé a wú sé mù, hkyô yàm má nyi tô é yhâng dùmó chyáng ê luî, “Ahkuî, náng chyáng wang yhup bá.” ga ê taî ri.
Yhang gi, “Ngò, nàng eq yhup jáng, nàng, ngo lé haî byi râ lhú?” ga lhom myî ri.
17Yhang gi, “Ngá é sau bainám hpúng mâ é bainám zo radu dé byi râ.” ga taî ri.
Haû jáng, Tamari gi, “Nàng, haû lé a dé byi shi-má, dakâm zè rajung jung byi râ lhú?” ga myî ri.
18Yhang gi, “Nang lé, ngò, hkâsû é dakâm zè byi râ lhú?” ga taî ri.
Tamari gi, “Náng é dizìk eq dizìk tui le, náng é dumbáng le byi aq.” ga tû taî ri. Haû mù, yhang gi, haú pé Tamari lé byi luî, yhang eq yhup bê nghut mù, Tamari gi, yhâng chyáng mâ é zogûng wùn bê nghut ri. 19Tamari gi, yhang eq gâng é htâng má, yhâng é myòqnghop lé yu pyám luî, yhâng é chuimó mèbu dum wùt to bê nghut ri.
20Haú u lé, Yudaq gi, myiwe myhí haú yùq chyáng mai, yhâng é dakâm zè wó dum taû hkyi yù râ matú, yhâng é luzúm Adulam byù lé, bainám zo radu byî kat ri; nghut kôlhang, yhang gi, myiwe myhí haú lé a myang hô nghut ri. 21Haû mù, yhang gi, haû mâ é bang lé, “Ena-im hkyô yàm má nyi é shiwa myhí gi, hká má nyi ri lhú?” ga myî ri.
Haú hkûn, yhángmòq gi, “Shî má shiwa myhí a nyi wú.” ga taî akô nghut ri.
22Haû mù, yhang gi, Yudaq chyáng taû ló luî, “Ngò, yhang lé a ê myang hô. Hau htoq agó, haû mâ é bang gi, ‘Shî má shiwa myhí a nyi wú.’ ga lhom taî akô.” ga ló taî kyô ri.
23Haû mù, Yudaq gi, “Yhang lé, ngò, bainám zo shî dé kat byi bê; nghut kôlhang, nàng, yhang lé a myang ho é shèq ru nghut alô. Ngá-nhúng gi, hoq a hpu lo râ nghut lhê; yhang yu tô é zè gi, yhâng chyáng tô to sháng gàq.” ga taî ri.
24Hau htâng lha-mó sum hkyap kô má, Yudaq lé, “Náng dùmó Tamari gi, shiwa myhí kut é mara bò mù, ahkuî, zogûng wun to bê nghut ri.” ga taî kyô akô.
Haú hkûn, Yudaq gi, “Yhang lé she htoq yû mù, nyhê sat pyám nhâng keq!” ga taî ri.
25Tamari lé shuî htoq lo nyì kô é hkûn, yhang gi, “Ngò zogûng wun é gi, zè shí pé sîng su chyáng mâ é nghut lhê.” ga, yhâng é îgû chyáng hkyang ló shit nhang ri. Hau htoq agó, yhang gi, “Wú aq; shî dizìk, dizìk tui eq dumbáng pé gi, ó yùq é nghut lhê làq.” ga taí nhang kat ri.
26Yudaq gi, haú pé lé wú sé mù, “Yhang gi, ngá htoq je díngmán sû nghut ri; ngò gi, yhang lé, ngá zo Shela eq a byi tsô é yánmai, nghut bê nghut ri.” ga taî ri. Hau htâng, yhang gi, Tamari eq a dum yhup lo nghut ri.
27Tamari gi, zo hkû ahkyíng jé é hkûn, yhâng é zo lúng hkyûng má, yùqzo zozûm lúng tô é lé sê ri. 28Yhang zô hku lo é u, yhángnhik mâ é rayùq hí lòq chyûn htoq lo ri; haû mù, zohkû byi sû gi, hkyîng nè yù mù, yhâng é lòqyìn má tui luî, “Shi yùq hí htoq lo é nghut lhê.” ga taî ri. 29Nghut kôlhang, yhang, yhâng é lòq lé dum she hâng yu é hkûn, yhang mang htoq lô bê nghut ri; haû mù, zohkû byi sû gi, “Nàng, haû su kut lú htoq lo lhê lhú?” ga taí mù, yhang lé, Perezi#38:29 Perezi gâ é gi, lú htoq lô gâ é lichyúm nghut lhê. ga myìng myhíng byî ri. 30Hau htâng, yhâng é lòqyìn má hkyîng nè tuî tô é yhang gu dum htoq lo é nghut mù, yhang lé, Zera#38:30 Zera gâ é gi, nè, a nghut jáng, dùq bàng gâ é lichyúm nghut lhê. ga myìng myhíng byî akô nghut ri.
Obecnie wybrane:
A-pûn Awang 38: znot
Podkreślenie
Udostępnij
Porównaj
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2025, Wycliffe Bible Translators, Inc.
