ᓘᑲᓯᐅᑉ ᐊᒡᓚᖏᑦ 23
23
ᔩᓱᓯᐅᑉ ᐃᖅᑲᖅᑐᖅᑕᐅᓂᖓ ᐰᓛᑑᓯᐅᑉ ᓵᖓᓂ
ᒫᑎᐅᓯ 27:1-2,11-14; ᒫᑯᓯ 15:1-5; ᔪᐊᓇᓯ 18:28-38
1ᐃᖅᑲᖅᑐᐃᕕᖕᒦᑎᑎᔪᓕᒫᑦ ᓂᑯᕕᓐᓇᒥᒃ, ᔩᓱᓯ ᐰᓛᑑᓯᒧᐊᕈᑎᕚᑦ, 2ᔩᓱᓯᒥᒃ ᐃᖅᑲᖅᑐᒐᒃᓴᖑᖅᑎᑎᓯᒪᔪᑦ ᐅᖃᖅᐳᑦ, “ᐅᓇ ᖃᐅᔨᓚᐅᖅᐸᕗᑦ ᐃᓅᖃᑎᑦᑎᓐᓂᒃ ᑕᒻᒪᖅᓮᔪᖅ, ᐃᓂᖅᑎᓚᐅᖅᐹᑎᒍᑦ ᓰᓴᕆᒧᑦ ᑖᒃᓰᔭᖃᑦᑕᖁᓇᑕ, ᐃᒻᒥᓂᒃ ᒥᓮᐊᓯᐅᓂᕋᕐᓗᓂ ᐊᖓᔪᖅᑳᕐᔪᐊᖑᓂᕋᓗᓂᓗ.”
3ᐰᓛᑑᓯᐅᑉ ᐊᐱᕆᕚ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᖅᐳᑎᑦ.”
4ᐰᓛᑑᓯ ᐅᖃᖅᐳᖅ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ ᐃᓄᒋᐊᒃᑐᓄᓪᓗ, “ᓇᓂᓯᓐᖏᓚᖓ ᑖᑦᓱᒪ ᐸᓯᔭᐅᑦᔪᑎᒃᓴᖓᓂᒃ.”
5ᑖᒃᑯᐊ ᐱᒋᐊᓪᓚᒃᑲᓐᓂᖅᐳᑦ ᐊᒃᓱᕈᓕᕐᓗᑎᒃ, ᐅᖃᖅᐳᑦ, “ᐆᒪ ᐃᓄᐃᑦ ᐊᔪᕆᖅᑐᐃᑦᔪᑎᒥᓄᑦ ᐅᐃᒪᔮᖅᑎᑉᐰᑦ, ᔫᑎᐊᓕᒫᒥ, ᒐᓕᓕᐊᒥᓪᓗ ᐱᒋᐊᕐᓗᓂ ᒪᐅᖓᓘᓐᓃᑦ ᐊᒡᓛᑦ ᑎᑭᑉᐳᖅ.”
ᔩᓱᓯᐅᑉ ᐃᖅᑲᖅᑐᖅᑕᐅᓂᖓ ᐃᕉᑕᓯᐅᑉ ᓵᖓᓂ
6ᐰᓛᑑᓯ ᑕᒪᑐᒥᖓ ᑐᓴᕋᒥ, ᐊᐱᕆᕚ ᔩᓱᓯ ᒐᓕᓕᐊᒥᐅᖑᖕᒪᖔᑦ. 7ᑐᑭᓯᑎᑕᐅᒐᒥ ᔩᓱᓯ ᐃᕉᑕᓯᐅᑉ ᐊᖓᔪᖅᑳᕐᔪᐊᖑᕕᖓᓂᑦ ᐱᓯᒪᖕᒪᑦ, ᐃᕉᑕᓯᒧᐊᕈᑦᔭᐅᑎᑉᐹ, ᑖᓐᓇ ᔨᕉᓴᓕᒻᒦᒻᒪᑦ ᐱᓇᓱᐊᖅᑎᓪᓗᒋᑦ ᑕᒪᑐᒥᖓ. 8ᐃᕉᑕᓯ ᖁᕕᐊᓱᒻᒪᕆᓚᐅᖅᐳᖅ ᔩᓱᓯᒥᒃ ᑕᑯᒐᒥ, ᑐᓴᐅᒪᔭᑐᖃᕆᒐᒥᐅᒃ ᑕᑯᔪᒪᔭᑐᖃᕆᓪᓗᒍ, ᑲᒪᓇᖅᑐᓕᑎᓪᓗᒍ ᑕᑯᑎᑕᐅᓂᐊᕋᓱᒋᓪᓗᓂ. 9ᐃᕉᑕᓯᐅᑉ ᐊᒥᓱᓂᒃ ᐊᐱᖅᓱᖅᐹ; ᔩᓱᓯᓕ ᑭᐅᓚᐅᓐᖏᓚᖅ. 10ᑐᓂᕐᕈᓯᖅᑎᑦᓯᔨᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔨᑦ ᓴᓂᐊᓄᐊᖅᐳᑦ ᐊᒃᓱᕈᕐᓗᑎᒃ ᐱᓇᓱᐊᓕᖅᐹᑦ ᔩᓱᓯ. 11ᐃᕉᑕᓯᐅᑉ ᐅᓇᑕᖅᑐᒃᓴᖁᑎᖏᑕ ᔩᓱᓯ ᒥᑕᐅᑎᒋᕚᑦ ᓇᕐᕈᒋᓪᓗᒍᓗ; ᐊᒻᒪ ᐅᓕᒡᔪᐊᒥᒃ ᐱᐅᔪᐊᓗᖕᒥᒃ ᐊᑎᑎᑉᐹᑦ, ᐅᑎᖅᑎᓪᓗᒍ ᐰᓛᑑᓯᒧᑦ. 12ᐅᓪᓗᒥᓪᓗ ᑕᕝᕙᓐᖓᑦ ᐱᒋᐊᕐᓗᑎᒃ ᐃᕉᑕᓯᒃᑯᒃ ᐰᓛᑑᓯᒃᑯᒃ ᐃᓚᓐᓈᕇᓕᖅᐴᒃ, ᓯᕗᓂᖓᓂ ᐊᑭᕋᕇᓚᐅᕋᓗᐊᕋᒥᒃ.
ᔩᓱᓯᐅᑉ ᑐᖁᑕᒃᓴᓐᖑᖅᑎᑕᐅᓂᖓ
ᒫᑎᐅᓯ 27:15-26; ᒫᑯᓯ 15:6-15; ᔪᐊᓇᓯ 18:39-40; 19:1-16
13ᑕᕝᕙ ᐰᓛᑑᓯᐅᑉ ᑐᓂᕐᕈᓯᖅᑎᑦᓯᔨᑦ ᐊᖓᔪᖅᑳᖏᑦ, ᐊᐅᓚᑦᓯᔨᑦ ᐃᓄᐃᓪᓗ ᑲᑎᖁᕔᑦ, 14ᐅᖃᐅᑎᓪᓗᒋᑦ, “ᐅᓇ ᐅᕙᓐᓄᐊᕈᑎᔭᓯ ᐅᖃᐅᓯᕆᓪᓗᒍ ᑕᒻᒪᖅᓮᓂᕋᕐᓗᒍ ᐃᓄᖕᓂᒃ; ᖃᐅᔨᓴᕋᒃᑯ ᑕᑯᓐᓇᖅᑎᓪᓗᓯ, ᑕᑯᒋᑦ, ᓇᓂᓯᓐᖏᓚᖓ ᑖᑦᓱᒪ ᑐᖁᑕᐅᑦᔪᑎᒃᓴᖓᓂᒃ ᐸᓯᒃᓯᕈᑎᒋᔭᑦᓯᓐᓂᑦ; 15ᐃᕉᑕᓯᓗᑦᑕᐅᖅ ᓇᓂᓯᖏᓐᓇᒥ ᐸᓯᔭᐅᑦᔪᑎᒃᓴᒥᒃ ᑖᑦᓱᒧᖓ ᐅᑎᖅᑎᒃᑭᕚ ᐅᕙᑦᑎᓐᓄᑦ. ᑕᑯᒋᑦ, ᐊᖑᑦ ᐅᓇ ᐱᓂᐊᓚᐅᖅᓯᒪᓐᖏᓚᖅ ᑐᖁᑕᐅᑦᔪᑎᒃᓴᒥᒃ; 16ᑍᒤᒻᒪᑦ ᑏᒐᖅᑐᖅᑕᐅᑎᓐᓂᐊᖅᐸᕋ ᐊᓂᑎᓪᓗᒍᓗ.”
17ᖄᖏᖅᑕᐅᕕᒃ ᓇᓪᓕᐅᑎᔭᕌᖓᑦ ᐰᓛᑑᓯ ᐱᐅᓯᖃᖅᐸᒃᐳᖅ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᓂᑎᑦᓯᔭᕆᐊᖃᖅᐸᒡᓗᓂ.#23:17 ᐊᒡᓚᒃᓯᒪᔪᑐᖃᕐᖕᓂ ᑖᓐᓇ ᕚᓯ ᐱᑕᖃᖏᑦᑐᖅ, ᑕᑯᓗᒍ ᒫᑯᓯ 15:6
18ᐃᓄᒋᐊᒃᑐᕐᔪᐊᓪᓕ ᐊᑕᐅᓯᒃᑯᑦ ᓂᓪᓕᐊᓕᖅᐳᑦ, “ᐅᓇ ᑐᖁᑕᐅᓕ, ᐸᕋᐹᓯ ᐊᓂᑎᑕᐅᖔᕐᓗᓂ.” 19ᐸᕋᐹᓯ ᑎᒍᔭᐅᓯᒪᕕᖕᒧᐊᖅᑎᑕᐅᓯᒪᕗᖅ ᐊᑭᕋᖅᑐᓕᖅᑎᑎᓪᓗᓂ ᐅᐃᒪᔮᖅᑎᑦᓯᓚᐅᕐᖕᒪᑦ ᑕᕝᕙᓂ ᐃᒡᓗᒐᓴᒡᔪᐊᓂ, ᐃᓄᐊᖅᓯᒪᓪᓗᓂᓗ.
20ᐰᓛᑑᓯᐅᑉ ᐃᓄᒋᐊᒃᑐᑦ ᐅᖃᐅᑎᒃᑲᓐᓂᖅᐰᑦ, ᔩᓱᓯ ᐊᓂᑎᑕᐅᖁᒐᓗᐊᕋᒥᐅᒃ; 21ᐃᓄᒋᐊᒃᑐᓪᓕ ᕾᒐᓛᓕᖅᐳᑦ, “ᑭᑭᐊᒃᑐᖅᑕᐅᓕ, ᑭᑭᐊᒃᑐᖅᑕᐅᓕ!”
22ᐰᓛᑑᓯᐅᑉ ᐱᖓᔪᐊᓐᓂᒃ ᓱᓕ ᐅᖃᐅᑎᒃᑲᓐᓂᕆᕔᑦ, “ᓱᖕᒪᑦ, ᓱᓇᒥᒃ ᐱᕋᔭᐅᑎᖃᖅᓯᒪᖕᒫᑦ? ᓇᓂᓯᖏᓐᓇᒪ ᐊᑐᖅᓯᒪᔭᖓᓂᒃ ᑐᖁᑕᐅᑦᔪᑎᒃᓴᒥᒃ ᑖᑦᓱᒪᓂ; ᑍᒤᒻᒪᑦ ᑏᒐᖅᑐᖅᑕᐅᑎᓪᓗᒍ ᓴᒃᑯᑕᐅᖁᓕᖅᐸᕋ.”
23ᐃᓄᐃᓪᓕ ᐊᒃᓱᕈᒻᒪᕆᓕᖅᐳᑦ ᕾᒐᓛᕐᓗᑎᒃ ᓂᐱᓕᒫᒥᖕᓄᑦ ᔩᓱᓯ ᑭᑭᐊᒃᑐᖅᑕᐅᖁᓪᓗᒍ. ᕾᒐᓛᕐᖕᓂᕐᖕᒥᖕᓄᓪᓗ ᓵᓚᖃᓕᖅᐳᑦ. 24ᐰᓛᑑᓯ ᑕᕝᕙ ᐱᖁᔨᓕᖅᐳᖅ ᔩᓱᓯᐅᑉ ᑐᖁᑕᐅᑦᔪᑎᒃᓴᖓᓂᒃ, ᐃᓄᒐᓴᒡᔪᐊᑦ ᑍᒫᒃ ᐱᖁᔨᖕᒪᑕ. 25ᐰᓛᑑᓯᐅᑉ ᐊᓂᑎᑕᐅᑯᓕᖅᐹ ᐸᕋᐹᓯ ᑎᒍᔭᐅᓯᒪᕕᖕᒦᑦᑐᖅ ᐃᓄᐃᑦ ᐊᓂᑎᑕᐅᖁᔭᖓᑦ, ᐅᐃᒪᔮᖅᑎᑦᓯᓂᖓᓄᑦ ᐃᓄᐊᖅᓯᒪᓂᖓᓄᓪᓗ ᑎᒍᔭᐅᓯᒪᔪᖅ, ᔩᓱᓯ ᐱᔭᐅᑎᓕᖅᐹ ᐃᓄᐃᑦ ᐱᔪᒪᔭᖏᑦ ᒪᓕᒡᓗᒋᑦ; ᐃᓱᒪᖅᓲᑎᒋᓗᒍ ᐱᓂᐊᕐᕕᒋᓂᐊᕐᖕᒪᑦᔪᒃ.
ᔩᓱᓯᐅᑉ ᑭᑭᐊᒃᑐᖅᑕᐅᓂᖓ ᓴᓐᓂᖓᔪᓕᖕᒧᑦ
ᒫᑎᐅᓯ 27:32-44; ᒫᑯᓯ 15:21-32; ᔪᐊᓇᓯ 19:17-27
26ᐅᓇᑕᖅᑐᒃᓮᑦ ᔩᓱᓯ ᑕᓯᐅᕐᓗᒍ ᐊᓐᓂᓯᓕᖅᐹᑦ, ᐊᓂᓕᕐᓗᑎᒃ ᑲᑎᓯᕗᑦ ᐊᖑᒻᒥᒃ ᓮᕆᓂᒥᐅᕐᖕᒥᒃ ᓮᒨᓂᒥᒃ ᐊᑎᓕᖕᒥᒃ, ᓄᓇᐅᑉ ᐊᓯᐊᓂᑦ ᐃᒡᓗᒐᓴᖕᓄᑦ ᑎᑭᓯᒪᔪᒥᒃ, ᑖᓐᓇ ᓴᓐᓂᖓᔪᓕᖕᒥᒃ ᐃᖅᓱᒃᑎᓕᖅᐹᑦ ᔩᓱᓯᐅᑉ ᑭᖑᓂᖓᓂ.
27ᐃᓄᒋᐊᒃᑐᕐᔪᐊᑦ ᒪᓕᒃᐳᑦ ᑖᑦᓱᒥᖓ, ᐊᕐᖕᓁᓪᓗ ᐃᓚᖏᑦ ᒪᓕᖃᑕᐅᔪᑦ ᖁᕝᕕᐅᖅᐳᑦ ᐅᒡᒍᐊᕈᑎᖃᕐᓗᑎᒃ ᔩᓱᓯᒥᒃ. 28ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᐊᕐᖕᓁᑦ ᔨᕉᓴᓕᒻᒥᐅᑦ, ᕿᐊᑦᔪᑎᒋᓇᓯᓐᖓ, ᐃᓕᑦᓯᓐᓂᒃ ᕿᐊᑦᔪᑎᒋᓕᕆᑦᓯ ᕿᑐᕐᖓᑦᓯᓐᓂᒡᓗ. 29ᑕᑯᒋᑦ, ᐅᓪᓗᐃᑦ ᑎᑭᑦᓱᒫᖅᐳᑦ ᐃᓄᐃᑦ ᐅᖃᕐᕕᒋᔪᒫᖅᑕᖏᑦ, ‘ᓮᒻᒪᖅᑎᐅᓯᒪᔪᒥᒃ ᐃᓅᓯᖃᖅᐳᑦ ᐊᕐᖕᓁᑦ ᕿᑐᕐᖓᖅᑖᕈᓐᓇᖏᑦᑐᑦ, ᓄᑕᕋᒃᑖᓚᐅᖅᓯᒪᖏᑦᑐᓪᓗ, ᐊᒫᒪᒃᑎᑦᑎᓚᐅᖅᓯᒪᓇᑎᒡᓗ!’ 30#ᕼᐆᓯᐊ 10:8; ᑕᑯᑎ 6:16.ᑕᒪᓐᓇ ᓇᓪᓕᐅᑎᒃᐸᑦ ᐃᓄᐃᑦ ᐅᖃᕈᒫᖅᐳᑦ ᖃᖅᑲᓄᑦ, ‘ᑲᑕᒡᕕᒋᑎᒍᑦ’; ᐱᖑᖕᓄᓪᓗ ᐅᖃᕈᒫᕆᕗᑦ, ‘ᑕᓕᑎᑎᒍᑦ.’ 31ᑕᒪᒃᑯᐊ ᐊᑐᖅᑕᐅᔪᓐᓇᖅᐸᑕ ᐱᕈᖅᑐᑦ ᑐᖑᔪᖅᑎᓪᓗᒋᑦ, ᐸᓂᖅᓯᒪᓕᖅᑎᓪᓗᒋᓪᓕ ᖃᓄᐃᑦᑐᖃᕈᒫᖅᐹ?”
32ᐊᖑᑏᒃᑕᐅᖅ ᒪᕐᕉᒃ ᐊᓯᖏᒃ, ᐱᐅᖏᑦᑐᓕᓯᒪᔫᒃ, ᐊᒻᒪ ᑐᖁᑕᐅᔭᖅᑐᕐᓗᑎᒃ ᑭᑭᐊᒃᑐᖅᑕᐅᕕᒃᓴᒧᐊᖅᑎᑕᐅᒋᕘᒃ ᔩᓱᓯ ᐃᓚᒋᓪᓗᒍ. 33ᖃᖅᑲᒧᑦ ᑎᑭᓐᓇᒥᒃ ᐊᑎᓕᖕᒧᑦ ᓂᐊᖁᕕᓂᕐᖕᒥᒃ, ᑕᕝᕙᓂ ᔩᓱᓯ ᑭᑭᐊᒃᑐᖅᐹᑦ, ᐱᐅᖏᑦᑐᓕᓯᒪᔫᒡᓗ, ᐂᑉᐹ ᑕᓕᖅᐱᐊᓂ, ᐂᑉᐸᖓᓗ ᓴᐅᒥᐊᓂ. 34#ᐃᓐᖏᕈᑦ 22:18.ᔩᓱᓯ ᐅᖃᖅᐳᖅ, “ᐊᑖᑖᒃ, ᐃᓱᒪᒋᔪᓐᓁᕐᕕᒋᒃᑭᑦ; ᖃᓄᐃᓕᐅᕐᖕᓂᕐᖕᒥᖕᓂᒃ ᖃᐅᔨᒪᖏᒻᒪᑕ.”
ᔩᓱᓯᐅᑉ ᐊᓐᓄᕌᖏᑦ ᓇᓚᐅᑖᕈᑎᒋᓪᓗᒋᑦ#23:34 ᐃᒻᒥᕋᐅᑎᒋᓪᓗᒋᑦ ᐊᑐᓂᑦ ᐱᑖᕋᓱᐊᖅᐳᑦ. 35#ᐃᓐᖏᕈᑦ 22:7.ᐃᓄᐃᑦ ᑕᕝᕙᓂ ᓇᖏᖅᐳᑦ ᑕᑯᓐᓈᕐᓗᑎᒃ; ᔫᑎᓪᓕ ᐊᖓᔪᖅᑳᖏᑦ ᒥᑕᐅᑎᖃᖅᐳᑦ ᔩᓱᓯᒥᒃ, ᐅᖃᕐᓗᑎᒃ, “ᐊᓯᒥᓂᒃ ᐱᐅᓕᓯᓚᐅᖅᐳᖅ; ᐃᒻᒥᓂᒃ ᐱᐅᓕᓕᕐᓕ, ᒥᓮᐊᓯᐅᒍᓂ ᒎᑎᐅᑉ ᓂᕈᐊᖅᓯᒪᔭᖓ!”
36 #
ᐃᓐᖏᕈᑦ 69:21. ᐅᓇᑕᖅᑐᒃᓮᑦᑕᐅᖅ ᒥᑕᐅᑎᒋᕚᑦ; ᒪᔪᕋᕐᕕᒋᓪᓗᒍ ᐅᐂᓂᒥᒃ ᖃᒃᑭᓐᓇᖅᑐᒥᒃ ᐱᑎᓐᓇᓱᐊᖅᐹᑦ, 37ᐅᖃᕐᓗᑎᒡᓗ, “ᔫᑎᑦ ᐊᖓᔪᖅᑳᕐᔪᐊᕆᒃᐸᑎᑦ, ᐃᓕᖕᓂᒃ ᐱᐅᓕᓚᐅᕆᑦ!”
38ᖁᓛᓂᓗ ᑎᑎᕋᖅᓯᒪᔪᖃᖅᐳᖅ ᐃᒤᓕᔪᓂᒃ: “ᐅᓇ ᔫᑎᑦ ᐊᖓᔪᖅᑳᕐᔪᐊᖓᑦ.”
39ᓂᕕᖓᖃᑎᖓᑕᓗ ᐂᑉᐸᖓᑕ ᒥᑕᐅᑎᒋᕚ, ᐅᖃᕐᓗᓂ, “ᒥᓮᐊᓯᐅᓐᖏᓚᑏᑦ? ᐃᓕᖕᓂᒃ ᐱᐅᓕᓚᐅᕆᑦ ᐅᕙᒍᒡᓗ!”
40ᐂᑉᐸᖓᑕᓕ ᐃᓂᖅᑎᖅᐹ ᐅᖃᕐᓗᓂ, “ᒎᑎᒥᒃ ᓯᕘᕋᖏᓐᓇᕖᑦ? ᑍᒫᓪᓗᐊᖅᑕᐅᖅ ᑖᑦᓱᑐᓇᖅ ᓱᒋᐊᖅᑕᐅᔪᑎᑦ ᑐᖁᑕᐅᓂᐊᕐᓗᑎᑦ. 41ᐅᕙᒍᒃᓕ ᑍᒫᒃ ᐱᔭᐅᑦᔪᑎᒃᓴᖃᕋᓐᓄᒃ ᐱᓂᐊᕐᕕᐅᕗᒍᒃ ᐱᓂᐊᕐᖕᓂᕆᓚᐅᖅᑕᕗᒃ ᒪᓕᒡᓗᒋᑦ; ᐅᓇᓕ ᐊᖑᑦ ᓈᒻᒪᖏᑦᑐᒥᒃ ᐱᓚᐅᓐᖏᓚᖅ.” 42ᔩᓱᓯᒧᑦ ᐅᖃᖅᐳᖅ, “ᔩᓱᓰ ᐃᖅᑲᐅᒪᓛᖅᐸᕐᖕᒪ ᐊᑕᓂᐅᕕᖕᓄᑦ ᑎᑭᒍᕕᑦ!”
43ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᐅᓪᓗᒥ ᐂᑉᐸᕆᓂᐊᖅᐸᕐᖕᒪ ᖁᕕᐊᓇᖅᑐᕕᖕᒥ.”#23:43 ᐅᕝᕙᓗ “ᐸᕋᑍᓯᒥ”
ᔩᓱᓯᐅᑉ ᑐᖁᓂᖓ
ᒫᑎᐅᓯ 27:45-56; ᒫᑯᓯ 15:33-41; ᔪᐊᓇᓯ 19:28-30
44 #
ᒨᓯᓯ ᐂᑉᐸᖏᑦ 26:31-33. ᐅᓪᓗᖅ ᕿᑎᕋᓕᖅᑎᓪᓗᒍ, ᓄᓇᓕᒫᖅ ᑖᖅᓯᓚᐅᖅᐳᖅ ᐅᓐᓄᓴᖕᒧᑦ 3ᒧᑦ ᑎᑭᓪᓗᒍ, 45ᓯᕿᓂᖅ ᖃᐅᒪᔪᓐᓃᖅᓯᒪᑎᓪᓗᒍ; ᑐᒃᓯᐊᕐᕕᒡᔪᐊᑉ ᐃᓗᐊᓃᑦᑐᖅ ᑖᓗᑕᕐᔪᐊᖅ ᐊᓕᒃᐳᖅ ᒪᕐᕉᓕᓪᓗᓂ. 46#ᐃᓐᖏᕈᑦ 31:5.ᔩᓱᓯ ᓂᐱᖅᑯᖅᑐᓪᓗᓂ ᕾᒐᓛᖅᐳᖅ, ᐅᖃᕐᓗᓂ, “ᐊᑖᑕᒃ, ᐊᓂᕐᖕᓂᕋ ᐃᓕᖕᓄᑦ ᑐᓂᕙᕋ!” ᑍᒫᒃ ᐅᖃᕇᕋᒥ ᐊᓂᕐᖕᓇᖏᖅᐳᖅ.
47ᐅᓇᑕᖅᑐᒃᓮᑦ ᐊᖓᔪᖅᑳᖓᑦ ᑕᑯᒐᒥ ᐱᓂᐊᕐᖕᓂᐅᔪᒥᒃ, ᒎᑎ ᓂᖅᑐᓕᖅᐹ, ᐅᖃᕐᓗᓂ, “ᐃᓛᒃ ᐊᖑᑦ ᑖᓐᓇ ᓱᓕᓪᓗᓂ ᐸᓯᔭᐅᑦᔪᑎᒃᓴᖃᓚᐅᓐᖏᓚᖅ!”
48ᐃᓄᓕᒫᑦ ᑕᕝᕙᓃᑦᑐᑦ ᑕᑯᔭᖅᑐᖅᓯᒪᔪᑦ, ᑕᒪᑐᒥᖓ ᖃᐅᔨᒐᒥᒃ ᖃᓄᐃᑦᑐᖃᕐᖕᒪᖔᑦ, ᐊᖏᕐᕋᓕᖅᐳᑦ ᓴᒡᕕᖕᒥᖕᓂᒃ ᐸᑎᒃᓯᖃᑦᑕᕐᓗᑎᒃ ᕿᒃᓵᖕᓂᕐᖕᒧᑦ. 49#ᓘᑲᓯ 8:2,3.ᔩᓱᓯᒥᒃ ᖃᐅᔨᒪᓪᓚᕆᒃᑐᓕᒫᑦ, ᐊᕐᖕᓁᓪᓗ ᒐᓕᓕᐊᒥᑦ ᐱᓯᒪᔪᑦ ᐅᖓᓯᒋᔭᖓᓂ ᓇᖏᖅᐳᑦ ᑕᑯᓐᓈᕐᓗᑎᒃ ᑕᒪᒃᑯᓂᖓ.
ᔩᓱᓯᐅᑉ ᐃᓗᕕᖅᑕᐅᓂᖓ
ᒫᑎᐅᓯ 27:57-61; ᒫᑯᓯ 15:42-47; ᔪᐊᓇᓯ 19:38-42
50ᐊᖑᑎᑕᖃᓚᐅᖅᐳᖅ ᔫᓯᐱᒥᒃ ᐊᑎᓕᖕᒥᒃ ᔫᑎᑦ ᓄᓇᖏᑕ ᐃᓚᖓᓐᓂᑦ ᐊᕆᒪᑎᐊᒥ ᓄᓇᖃᖅᑐᒥᒃ. ᑖᓐᓇ ᔫᑎᑦ ᑲᑎᒪᔨᕐᔪᐊᖏᓐᓄᑦ ᐃᓚᒋᔭᐅᔪᖅ, ᐃᓄᑦᓯᐊᕙᐅᕗᖅ ᓇᓛᒎᖅᑐᒥᒃ ᐃᓅᓯᖃᕐᓗᓂ, 51ᑖᓐᓇ ᑲᑎᒪᔨᐅᖃᑎᒥᓂᒃ ᐊᖏᖃᑎᖃᓚᐅᓐᖏᓚᖅ ᐱᑦᔪᑎᒋᔭᖏᓐᓂᒃ ᐱᓂᐊᕐᖕᓂᖏᓐᓂᒡᓗ, ᒎᑎᐅᑉ ᐊᑕᓂᐅᕕᖓᑕ ᑎᑭᑦᓱᒫᕐᖕᓂᖓᓂᒃ ᓂᕆᐅᒋᔭᖃᖅᐳᖅ. 52ᑖᓐᓇ ᐰᓛᑑᓯᒧᑦ ᐅᐸᒍᑎᓚᐅᖅᐳᖅ ᔩᓱᓯᐅᑉ ᑎᒥᖓᓂᒃ ᐱᔪᓐᓇᖅᑎᑕᐅᔪᒪᓪᓗᓂ. 53ᔩᓱᓯᐅᑉ ᑎᒥᖓ ᓴᓐᓂᖓᔪᓕᖕᒥᑦ ᐊᖅᑲᖅᑎᑉᐹ ᐃᒻᒧᓯᕐᓗᒍ ᖃᓪᓗᓈᖅᑕᒥᒃ ᓵᑦᑐᒥᒃ, ᐃᓕᓪᓗᒍ ᐃᓗᕕᕐᖕᒧᑦ ᐃᓗᓕᐅᖅᓯᒪᔪᒧᑦ ᕾᖅᓱᒥ, ᑐᖁᖓᔪᒥᑦ ᓱᓕ ᐃᓗᕕᕐᕕᐅᓚᐅᖅᓯᒪᖏᑦᑐᒧᑦ. 54ᑖᓐᓇ ᐅᓪᓗᖅ ᐅᐸᓗᖕᒊᔭᕐᕕᐅᖕᒪᑦ, ᓴᐸᑎᒧᑦ ᓴᐸᑎᓐᖑᖅᐸᓪᓕᐊᓂᐊᓕᕐᓗᓂ.
55ᐊᕐᖕᓁᑦ ᔩᓱᓯᒥᒃ ᒪᓕᓚᐅᖅᑐᑦ ᒐᓕᓕᐊᒥᑦ ᔫᓯᐱ ᒪᓕᒃᐹᑦ, ᑕᑯᓪᓗᑎᒃ ᐃᓗᕕᕐᖕᒥᒃ, ᔩᓱᓯᐅᑉ ᑎᒥᖓ ᖃᓄᖅ ᐃᓗᕕᖅᑕᐅᖕᒪᖔᑦ ᑕᑯᓐᓈᕐᓗᑎᒃ; 56#ᒨᓯᓯ ᐂᑉᐸᖏᑦ 20:10; ᒨᓯᓯ ᑕᓪᓕᒪᖏᑦ 5:14.ᐊᖏᕐᕋᕋᒥᒃ ᑎᐱᑦᓯᐊᕆᒃᓴᐅᑎᑦ ᒪᒪᖅᓴᐅᑎᓪᓗ ᑎᒥᖓᓄᑦ ᒥᖑᐊᕈᑎᒋᓂᐊᖅᑕᑎᒃ ᐅᐸᓗᖕᒊᔭᖅᐰᑦ.
ᓴᐸᑎᒥ ᕿᑲᖅᐳᑦ, ᐱᖁᔭᓂᒃ ᒪᓕᒡᓗᑎᒃ.
Obecnie wybrane:
ᓘᑲᓯᐅᑉ ᐊᒡᓚᖏᑦ 23: EAIB
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
Eastern Arctic Inuktitut Bible © Canadian Bible Society, 2012, 2021-2023.